وين اروح للرادود مسلم الوائلي كلمات مكتوبة

 

📜 القصيدة: وين اروح 

🎤 أداء: مسلم الوائلي 

🖋 كلمات: حسن الترابي 

~

وين اروح .. وماكو نوح 

وكربله اتهد راسي ليله 

من الرماح .. استراح 

ويوگف حسين اعله حيله 

يطلع صبح غير الرمح مابي ذبح 

ويوگف حسين اعله حيله 

ويوگف حسين اعله حيله 

~

يمته يا عين .. 

اغفه والدم بارد 

مالي بالطف واحد .. لجمته الخيل 

بصدر الحسين .. 

لا ضمه ولا حافر 

ولا جدم بالعاشر .. يسحگه ويميل 

كل هلي بخير وسلامه وفيهم هواي 

ويم الحسين وبناته امسير الماي 

وبالمهد عبد الله وامه اتلولي فوگاه 

لا يفز توه الولد نام احجوا بهداي 

توه نام .. والسهام 

من المهد باگت ضحكته

نحره مال .. والدلال 

اتبده بالطف من رگبته 

رف ونلجم ونحره انثلم حار السهم

وفرفح بعين العقيله 

ويوگف حسين اعله حيله

~~~~

التفت وين ..

والعذاب بروحي 

وتنشد الله جروحي .. ينفتح باب 

العنده الحسين ..

ينذبح كل ليله 

والشمس تحجيله .. بحر التراب 

حسين يتگلب اشوفه ونحره ملجوم 

ركضت الخيل اعله صدره وركضت الگوم 

منين المه من الحوافر من الجدام 

بيش استره وضاعت وي ضلوعه الهدوم

صدره ذاب .. والتراب 

جدد جروح اعله گلبه 

نحره شاب .. لرباب 

من الخيم ركضتها صعبه 

يگوم ويطيح مابي يصيح والدنيه ريح 

بالرمل لجمة دليله 

ويوگف حسين اعله حيله 

~~

يكفي يا حيل ..

لليشوف حسينه 

غمض الدم عينه .. عالرمل طاح 

دنته الخيل ..

واخته ركضت صوبه 

بالحوافر ثوبه .. اتشگگ وراح 

ادنه للخيمه ورجع بالحافر انوب 

وزينب اعله التل تشوف حسين مگلوب 

يگوم كلما ينسحگ ويطيح يا ناس 

كافي يا خيل اعله صدره مات جندوب 

كافي اصيح .. يا ذبيح 

ميت وخيل اعله صدره 

گلبه لان .. ولا مجان 

بس كسر بيه واجبره 

ولا منه حد ما ظل بعد كله انمرد

تحيرت من ردت اشيله 

ويوگف حسين اعله حيله 

~~~~

نار الخيام ..

ما طفت بضلوعي 

والسبي موضوعي .. وركضت ام عون 

العنده الايام ..

كلها يوم العاشر 

ماكو بيهن باجر .. تخلص شلون 

يعينه الله التنسبي عماته يا ناس 

يشمت بگلبه الصبر وتخنگه الأنفاس 

بالهوادج زينب من السوگ للشام 

تنسبي شلون الاخت العدها عباس 

والدلال .. بالحبال  

يمشي من ديره اعله ديره 

صعبه حيل .. مو سبيل 

وبالقصر توگف اسيره 

زينبنه هاي كسرت گفاي ما بيدي راي 

وعندي بس الله اشتكيله 

ويوگف حسين اعله حيله 

°°°°°°°°°°°°°°°°°°°°°°°°°°°°°°