القصيدة: ما شاء الله
الرادود: مُحَمَّد الجنَّامِيْ
الشاعر: كرارة حسين الكربلائي
~~~~~~~~~~~~~~~~
ما شاء الله
وجهك محلاه
لو صار الليل
اسهر وياه
أنه شفتك حلم مثل النجم يضوي بدلاله
تره وجه الفجر من وجنتك ياخذ جماله
ما شاء الله
~~~~~~~~~~~~
يالوجهك كوثر بالجنه
تعطش روحي وتشرب مِنّه
سُبحان الله وشگد تشبه اوصاف المَاي
سُلطان وعرشك بحساسي
ومن عطرك اشتم انفاسي
يوم الشفتك شفت الدنيه تحله بعيناي
يالحاجب عينك مثل السيف
حبيتك نسمه بعز الصيف
نايم بچفوفي دمعه وطيف
يا دمعه وطيف//٢
يصبي العين
ويعيون حسين
اشّهد بالله وفّيت الدين
يبو طول الحلو ثوب المجد طولك حلاله
تره وجه الفجر من وجنتك ياخذ جماله
ما شاء الله
~~~~~~~~~~~~
محبوبي بشكلك اتأمل
حگي بأوصافك اتغزل
لا قبلك لا بعد صاير مثلك محبوب
يالماخذ هيبه من احسينه
والشافك ما ترمش عينه
اسأل روحي بخدك شامه لو شمس غروب
من طولك يخجل غصن الياس
كل خوفي تحسدك عين الناس
محروس براية چف عبّاس
يا چف عبّاس//٢
يا نَجم سهيل
يضوي بكل ليل
والله الفرگاك ما احمل حيل
إذّ قرص الشمس مره انكسف انته ابداله
تره وجه الفجر من وجنتك ياخذ جماله
ما شاء الله
~~~~~~~~~~~~
أسمع هاي الناس تسولف
گالت اجمل واحد يوسف
لو يوسف ينظر لعيونك چا صاح الله
جدمك لو بالصحراء ايمُر
أقسم كل الگاع اتخضّر
غير انته ابن الرّد شمس الله بأصبع يمناه
شوف البعيوني بيك ايشوف
يا كعبه وروحي اعليك تطوف
من تِبعد گلبي ايظل مَلهوف
وايظل مَلهوف//٢
لوجهك اشتاگ
شوگ العشاگ
يا جاسم حان توديع افراگ
بَله يبني الولد يوم الشدد يبزغ هِلاله
تره وجه الفجر من وجنتك ياخذ جماله
ما شاء الله
~~~~~~~~~~~~
شد حيلك يا جاسم وافزع
اركب مهرك للموت اطلع
صيح أنه ابن الما رد ضيفه وسد الديوان
حد حدها العالت وگفها
صفها وطشرها ورد صفها
دمدم هدم غيم واقبض روح الفرسان
يبن الما نامت عالذل دوم
يا جاسم يومك هذا اليوم
وانته يسمونك موت الگوم
يا موت الگوم//٢
اعله اصحاب الفيل
امطر سجيل
من ماس الموت جرعها الويل
هله يبن الكُرم والماطفت جمرة دِلاله
تره وجه الفجر من وجنتك ياخذ جماله
ما شاء الله
~~~~~~~~~~~~
استشهِد خل عرسك بالجنه
ومن ادماك اتصير الحِنّه
أنه امك ناذرتك يبني لعيون حسين
صح فرگاك ايهدم حيلي
أصبُر بغيابك إدعلي
يُمه التفگد مثلك غالي يهظمها البين
رايح يوليدي والله وياك
يالما تنساني ولا انساك
ضايع منيدي اوين الگاك
ما بعد الگاك//٢
يا يُمه الروح
وياك تروح
عمري بفرگاك بس آه ونوح
بچه عمك الك وبمصرعك نوحه تعاله
تره وجه الفجر من وجنتك ياخذ جماله
ما شاء الله
~~~~~~~~~~~~
~~~~~~~~~~~~
تعليقات
إرسال تعليق