📜 قصيدة: ارض وسمه مشينة
🎤أداء: حيدر البياتي
🖋كلمات: ميثاق الحمداني
~
أرض وسمه مشينه بالاربعين
كل الطرق تؤدي الى الحسين
خطينه عالرايه
لحسين مشايه
بالاربعين .. بالاربعين
~~
كبرك .. چنه
گلب ال .. جنه
مشي مشي كلها تجي بالاربعينيه
مشي مشي يتغير اسم الكره الارضيه
مشي مشي تصير وعلي الكُره الحُسينيه
كل كربله تهتف هله بالگاصد اعليه
نمشي ترف بدينه الرايه
نمشي لكربله مشايه
نمشي وماكو غيرك غايه
ذللنه كل مصاعب واكصدنه الك
لو احنه من عطارد هم نوصلك
الوفايه وفايه
لحسين مشايه
بالاربعين .. بالاربعين
~~~
الزارك .. والله
زاير .. الله
مشي مشي مو بس بشر گاصد الك كلشي
مشي مشي حتى ملائكة العرش تمشي
مشي مشي جبريل كال امشي على رمشي
والطير من شاف الصحن كال احلى من عشي
بدربك نطلب شنتمنه
بدربك الجدم يتحنه
بدربك شفنه درب الجنه
يا غالي شفنه دربك اجمل بساط
اليمشي الك يسيطر فوك الصراط
كتاب الله بيه آيه
لحسين مشايه
بالاربعين .. بالاربعين
~~~
نتعب .. فدوه
انته .. تسوه
مشي مشي امي بتعبها صايره جنازه
مشي مشي بس بربعينك كلشي تجتازه
مشي مشي كالتلي امشي بلايه عكازه
تكلي اليحب ينسه التعب من يمشي لعزازه
محدبه وشمرت العوچيه
محدبه چنها عشرينيه
محدبه تواسي بالمسبيه
نمشي وتعبنه راحه ماكو عناء
كلشي بكلبنه يهتف يا كربلاء
جيناها عنايه
لحسين مشايه
بالاربعين .. بالاربعين
~~~
احلى .. مشيه
بهايه .. الدنيه
مشي مشي من كل بلد جيناك نتشرف
مشي مشي يحتار بينه كلشي من نصطف
مشي مشي عداد موسوعة كينيس يوكف
طفله وطفل شاب وكهل متعني لرض الطف
غيره العالم محيرينه
غيره من ابو فاضل بينه
غيره وعلى كبرك جينه
حيرنه كلشي بينه خدمه وسباق
ويا سفرة الزياره بطول العراق
صح سفره بس هايه
لحسين مشايه
بالاربعين .. بالاربعين
~~~
عيسى .. محزم
تكنس .. مريم
مشي مشي موسى بعصاته رايه متحزمه
مشي مشي كل نبي يتباها بالخدمه
مشي مشي هذا وصال العاشقين اسمه
حتى النبي سيد الرسل تعب الك جدمه
كلها كصدتك محنيه
كلها الملك والحوريه
كلها تصيح اجي برجليه
بالدنيه كلشي رايح بس انت جاي
نحرك يضامي اجينه نمشيله ماي
كلمن اجه بمايه
لحسين مشايه
بالاربعين .. بالاربعين
~~~
أرض وسمه مشينه بالاربعين
كل الطرق تؤدي الى الحسين
خطينه عالرايه لحسين مشايه
بالاربعين .. بالاربعين
محله .. مايك
فدوه .. لچايك
مشي مشي نمشي وفكرنه بسفرتك حاير
مشي مشي هاي المواكب منها ما صاير
مشي مشي محلاها كواك الله يا زاير
واليخدمك طول الدرب من الفخر طاير
خادم هله بيهم يندب
خادم من نعبره يعتب
خادم محله راعي الموكب
ممشانه والخدامه كحل اعله عين
المشايه والمواكب نهر الحسين
من منبعه الغايه
لحسين مشايه
بالاربعين .. بالاربعين
°°°°°°°°°°°°°°°°°°°°°°°°°°°°°°°°°°°°°°°°
تعليقات
إرسال تعليق