اهلي سفُن وآنه امشي عالهزل
ميهمني السبي ما انكسر
حرگوا خيمتي وآنه ستر
خيام خيام
************1
دنيه تغيرت ما اگول طبع بنادم تغير
نعطش واحنه ابونه الماي وامنه بسورة الكوثر
ﭼـا مو نعمة الله حسين ليش اعله الثرى مطشر
يم الله وسمع جبريل صوت عظامه تتكسر
شمس الضحى ياسورة الضحى
تـﭼوي بجثث طحنوها بالرحى
دهري بموتتي ما ينتظر
حرگوا خيمتي وآنه ستر
خيام خيام
*************2
ماخفت آنه من النار ساعة حرگ المخيم
هوَ المثلي شايف ضيم گلبه اعله الـﭼوي امعلّم
بس آنه الهضمني حسين شفته مگطّع مقسّم
من گد ما عليه مسحوگ لو شنسوّي ما يلتم
صاير وصل من شدة السحگ
وهنا حرت حلمانه لو صدگ
سحگوا نعمتي وماتنغفر
حرگوا خيمتي وآنه ستر
خيام خيام
***************3
شيفيد العتب وي ناس حتى حـﭼايه ماتسوه
جابولي الضعن والنوگ وين التمشي باالگوّه
ماكو اسم الله من تميل ناگه بضعن المروه
من گطعوا نحر عباس گطعوا ريحة الخوه
ريحة اخو ما خله هاالدهر
ماكو نفس باخواني بس نحر
ذبحوا عشرتي بيوم اليسر
حرگوا خيمتي وآنه ستر
خيام خيام
***************4
ﭼـان المحمل وي الغيم نجمه الكافل يصعده
مثل السعفه يرجف ليش ماكو اليعرف يشده
هز راسه وزعل عباس رايد ينزل يسنده
عاين لي بخجل من شاف لا من ﭼـتفه لا زنده
فوگ الرمح وعيونه عالضعن
يدري المشت ما عدها اي وطن
صاح بنخوتي وينه شمر
حرگوا خيمتي وآنه ستر
خيام خيام
**************5
رايه آنه اعله زند حسين ﭼـف الزهره عاگدني
كلما اعثر بممشاي زوده بروحي يسندني
لكن حيرتي من الناس لو شامت يناشدني
وين اخوانـﭻ وما اگول بس الله اليساعدني
اعثر وارد من هيبته انتـﭼـي
ادري المشه ما اعوضه بالبـﭼـي
خيمة هيبتي بيها استتر
حرگوا خيمتي وآنه ستر
خيام خيام
**********6
الحاجب دومه فوگ العين وآنه اعله الزمن حاجب
امشي وي الضعن بالليل ما اگول الگمر غايب
قام بواجبه ومشكور واخته تكمل الواجب
بس لوسكنه گالت وين زينب مدري شتجاوب
لو بالدرب سألتني عن گمر
ماتحتمل لو اگلها عالنهر
تنزل دمعتي من تنذكر
حرگوا خيمتي وآنه ستر
خيام خيام
****************7
ماتعبني درب الشام لبوه واگطع الصحره
واحتل منبر ابن زياد وانصب مأتم بقصره
واحـﭼـي ويسكت الديوان واطلع منه منتصره
لو جيت بگلب مكسور مو معناها منكسره
هذا القدر من ربي هالوعد
وآنه وهلي وي الله عالعهد
رفعة هامتي ابقى افتخر
حرگوا خيمتي وآنه ستر
خيام خيام
كلمات الشاعر
احمد الذهبي
ليلة17محرم1444هـ
حسينية ام الحسن (عليها السلام)
الفاو_البصرة
تعليقات
إرسال تعليق