📜قصيدة : إبن الخليفه
✒️للشاعر : احمد الذهبي
هذا ابن الخليفه .. مو ابن السقيفة
وابن السند .. والمعتقد .. وابن الولاية
☘️☘️☘️☘️☘️
راعي الصحيفه .. رابع خليفه
الاول علي وهذا علي رابع امامه
بسمه ينادي .. صوت المنادي
وينه الزكي الساجد علي يوم القيامه
لو ما وجوده .. وعمله وسجوده
نقرأ على الدنيا وعلى الدين السلامه
حكمة فراسه .. دين وسياسه
واليفتهم معنى العقل يتبع نظامه
هذا ابن التسامح .. ليش ابن المصالح
وابن الحقد .. وقع عقد .. سوء النوايه
☘️☘️☘️☘️☘️
بعد العجايب .. وهول المصايب
واللي جره بطف كربلا من اهل الخيانه
والشر تجند .. بتاريخه الاسود
والمجتمع ظل يرتوي بكاس المهانه
دار القياده .. ورد السياده
رد ابن المرجع الشمس كلشي بمكانه
عمته باسرها .. كلم خدرها
گلها الحسن وحسين انه والكافل آنه
عالمكتوب اصبري .. يا زينب وابشري
راية علي .. ما تنثني .. وتكسرها راية
☘️☘️☘️☘️☘️
أسره وقيوده .. قمة خلوده
ومن انحنى مو مو منحي ابن الهواشم
ظهره التحدب .. خيمه اعله زينب
ستر وغطه صاير على ضعن الفواطم
اليضرب خواته .. يرده ابعصاته
سوط الشمر ما بي رحم لمن يهاجم
يعرف اصلهم .. وتاريخ اهلهم
لو وادم من الله استحوا بس مو آدوام
لو عدهم شهامه .. ذره من الكرامة
لو من عرب .. جا عالخدر .. صاروا حمايه
☘️☘️☘️☘️☘️
كلمة شجاعه .. وبكل قناعه
گال الزلم تكبر اذا يثگل حملها
وزينب حضاره .. وگفت مناره
ابخشم العده مو عالارض حطت رجلها
عشرة عمرها .. حسين وگمرها
كلمن صفه بديرة رمح وابعد شملها
بنت ام ابيها .. مو من اديها
هذا النزف دم الحبل جرحت حبلها
اختك يا بو فاضل .. مثلك ما تجامل
گال افتخر .. زينب تره .. بيه الكفايه
☘️☘️☘️☘️☘️
وارث نبيهم .. يخطب عليهم
بالمختصر بس الشرح رايد اطاله
عصاته سيفه .. وجرحه ونزيفه
بس من حچه طيح عرش اهل الضلاله
لو ما دريتوا .. بأصلي ونسيتوا
جدي السطر جدكم وانه هسه ابداله
الجهروا كفرهم .. علوا قصرهم
وابن القلع خيبر اجه ومن گاعه شاله
راس الجنه واثمن .. بيد المدري ابن امن
شافوا مخصرة .. ابن الضنه .. تحرك الثنايه
☘️☘️☘️☘️☘️
ثار اليزيده .. يطلب وليده
شاف الحكم ظل ينوخذ منه بقناعه
ابن العصابه .. حاسب حسابه
الناس العلي گالت نعم سمعاً وطاعه
واهل السياسة .. كرسي الرئاسة
ضيعة شرف عدهم ولا منهم ضياعه
هذا اويه جعده .. منطينه وحده
عبد الملك وابنه وشمر نفس الجماعه
من ولد الذيابه .. اشيطلع مو غرابه
جازوا علي .. بسم وذبح .. ولد البغايه
☘️☘️☘️☘️☘️
كلكم يساده .. نفس الشهاده
طف ودمه وسم وضمه كلمن نصيبه
هاي الجريمه .. وذيج الظليمه
فاعل نذل شايل بغض لله وحبيبه
اهل النذاله .. ولد العماله
كل المهم عدهم تظل زينب غريبه
بس الله شاهد .. واهل المراقد
طلعة ابو الثار اصبحت جداّ قريبه
من يطلع عليهم .. والله ايگص اديهم
والمنتقم .. من يبتدي .. الهم نهاية
☘️☘️☘️☘️☘️
#اللهم_عجل_لوليك_الفرج
◇◈◇⇩..تابعونا..⇩◇◈◇
ليلة 25 شهر محرم الحرام 1444 هـ قصيدة: إبن الخليفة أداء: الحاج باسم الكربلائي كلمات: الشاعر أحمد الذهبي المكان: كربلاء - موكب وحسينية الكميل
تعليقات
إرسال تعليق