جسام | بندريه | مرتضى حرب | حسين باهض الحلفي
جسام.. بين الويلاه والهلهوله احتار الصوت
هلهوله بزفة بين.. من موتي يقر العين
يمه يمه يمه يمه.. الولد يمه
محتاره مدري اصرخ مدري افرح
مدري الدمعه البعيوني.. نثرت ياس
محتاره اعلگهن شمعاتي
لو تكفي الحسرة الشعلت شيب الراس
محتاره مدري الطم مدري ابجي
ماعرف الهاج بروحي يا احساس
محتاره وي عرسك وي موتك
بالصار وياك تحير الباب الناس
جسام.. جن زافوف الموت وهوس ياستار
جسام.. حته اللون ابين الدم والحنه احتار
محتار بهاللونين.. من موتي يقر العين
يمه يمه يمه يمه.. الولد يمه
جسام.. جسام
***************************
ذهلوني يم جاسم ادعيله
للحومه ابنج ومبرقع زفيناه
ذهلوني ولن ساعه وهوستهم
من زفة عرسه وليدج رديناه
ذهلوني مغشينك من شفتك
وجفوفك حمره وگالوا حنيناه
ذهلوني واتسآئل گالولي
عريس مدلل نام وغطيناه
مذهول.. صوتي وخافن صوتي يطير عز النوم
مذهول.. فكري يلوم بروحي ويدفع بيه اللوم
مذهوله ابين اثنين.. من موتي يقر العين
يمه يمه يمه يمه.. الولد يمه
جسام.. جسام
******************
ها جاسم ها يمه ماتگعد
متلهفه لهاي الفرحه يوم وياك
ها جاسم متعجبه مو وكتك
اله بهالساعه النوم اللي هنّاك
ها جاسم ها الحنه جبناها
ياهو الغير امك هاذه اللي حنّاك
ها جاسم ماتسمع معقوله
شيبات امك يوليدي التتنخاك
ياحيف بس الموت يفرق يگدر جسم وروح
ياحيف ميت خاف وهذا خضابك دم وجروح
وخضابك گلي منين.. من موتي يقر العين
يمه يمه يمه يمه.. الولد يمه
جسام.. جسام
********************
ربيتهم لمن دنه الخير
وفروا من ايدي فرة الطير
*******************
مكفوله ومو ثكله ومهيبوه
والعدها وليد و مثلك ماتنضام
مكفوله ومأمنه ومعتمده
وياي رباي وتعبي الموش اوهام
مكفوله وي ابني ومتأمله
گرّب عرسه وماتقبل عيني تنام
مكفوله ومسلوبه ومجتوفه
آنه واحلامي بناگه الارض الشام
احلام.. حته اليحلم لازم يحلم بس بخوف
احلام.. كبرت صارت اكبر من مقياس الشوف
تنقاس بتسع سنين.. من موتي يقر العين
يمه يمه يمه يمه.. الولد يمه
جسام.. جسام
****************
من صوتك ناداني يايمه
صرت بعرشك اتربع ياسلطان
من موتك اذاني واشتمه
عطرك من ايدي تبده اعله التربان
ياصوتك خلاني مهتمه
يايمه اسمعها بصوتك جن آذان
ياموتك راواني من همه
ميت وارمال الگاع تصير اجفان
ياگاع هم سمعانه بيوم تراب يجفن النور
ياگاع هم سمعانه بواحد عريس بعاشور
ويبارك عرسه حسين.. من موتي يقر العين
يمه يمه يمه يمه.. الولد يمه
جسام.. جسام
****************
هذا الجنت ما حاسبته يصير
يمشي العطش بجنازة البير
شافك الطير وما رضه يطير
صوتك گطع رزق العصافير
ردتك ذخر لايام شيبي
من انحني تجازي حليبي
بندرية جسام أداء #مرتضى_حرب #حسين_باهض_الحلفي كلمات المرحوم #راجح_العبادي محرم الحرام 1444هـ #هيئة_مجانين_رقية ع البصره قضاء الدير ساحة الشهداء المركزيه
تعليقات
إرسال تعليق