تسأل رقية محمد الجنامي كلمات مكتوبة
القصيدة: تِسْألْ رُقَيَهْ
الرادود: مُحَمَّد الجنَّامِيْ
الشاعر: وسام الشويلي
~~~~~~~~~~~~~~~~~~~~~~~~~
تِسْألْ رُقَيَهْ ابدمع
بُويه غَريب الوضع
عَمِتي اتــنُـوح
و انته مَجروح
و كلمة وداع استمع
~~~~~~~~~~~~~~~~~~~~~~~~~
مَرْعُوبَه اجت رُقيَه لأبوها تِسأله
يا بُويه الحَرم شِجاها دَمعها تهلّه
كِل حُرمه اعتنت وِلِيها بألمها تگلّه
المَا عِدها سَند عُمُرها تِخَلصه مَذَلّه
خُوّفني هَذا الحَچي
و اَسمع ونِين و بچي
فَاجِعْة اتلوح
و انته مَجروح
و كلمة وداع استمع
~~~~~~~~~~~~~~~~~~~~~~~~~
عَبْدالله أعاين أُمّه تِحضنه و تِشُبگه
هاليله الچِفن تگله بعد ما اطبگه
مِنّ ايدي آنه مِنّ اضيعك يَعبدالله شَلگه
يُمّه انته الهَوه و دِليلي بغيابك تِخنگه
تلُوليله و اتصد إله
و مِنّ مَنحره تقبّله
چَنّه مَذبُوح
و انته مَجروح
و كلمة وداع استمع
~~~~~~~~~~~~~~~~~~~~~~~~~
بُويه حَايره اجيتك و اريد الصَراحه
ليل العَاشر ويه رَمله شيصير بصباحه
ويّه القَاسم انظر إلها وداع و مَناحه
تِشكيله بدمع تگلّه بعد ماكو راحه
يِمكن ابنها الصُبح
بدال العِرس يِنذبح
عَـنّـك ايِـروح
و انته مَجٌروح
و كلمة وداع استمع
~~~~~~~~~~~~~~~~~~~~~~~~~
يا بُويه رحت للأكبر يِسولفلي الاريده
ضَمّاني الأُخو اعَله صدره و مِسح راسي بيده
لِيلى حاچته اسمعِتها و تعاين وريده
گالت تِرضه يُمّه أبقه غَريبه و وحيده
يا بُويه سُولف إلي
شِنهو اليصير بعليّ
دَمعه مَسفوح
و انته مَجروح
و كلمة وداع استمع
~~~~~~~~~~~~~~~~~~~~~~~~~
عَمّي بهالمسه رِحتله گلت خَلي اشوفه
و زِينب عَمّتي شِفِتها بدمعها تِطوفه
لِيش اتقبّله اعله عينه و اديها بچفوفه
و لِيش يگلها يالعقيله الخِدر ما اعوفه
تِحچيله عنّ يا نَهر
و اتگلّه ظهري انكسر
حِملي مطروح
و انته مَجروح
و كلمة وداع استمع
~~~~~~~~~~~~~~~~~~~~~~~~~
بُويه بحضنك آنه وانته دُموعك سچيمه
و گلبك دگته تگلّي المُصيبه عظيمه
ها ياخيمة المَحنّه بعد ماكو خيمه
و گلبي ايگلّي آنه باچر غِريبه ويِتيمه
نُوّمني بأخر حِضن
گلبي ولا مُطمئن
جَرحي مَفتُوح
و انته مَجروح
و كلمة وداع استمع
~~~~~~~~~~~~~~~~~~~~~~~~~
✍🏻https://t.me/bk_mj_96
~~~~~~~~~~~~~~~~~~~~~~~~~
تعليقات
إرسال تعليق