الرادود: مُحَمَّد الجنَّامِيْ
الشاعر: عبدالخالق المحنه
~~~~~~~~~~~~~~~~~~~~~~~
تَعالن عُوفن الخيمه
نِبات الليلةَ بالهَيمه
بلا خيمه نِريد نجرّب انبات
مِثل هذا الوكت بَاچر سِبِيات
بَٰاچِرْ الله يِستَرْ
~~~~~~~~~~~~~~~~~~~
نريد الليله نِتعلّم
كأن محروگ المخيم
عَلينه .. يويلي .. نعاتب .. أهلنه
ظلام و يِحرس القاتل
حَرسنه مو ابو فاضل
مُصيبه .. يباچر .. شِماته حرسنه
نِريد نعيش ليله من السبي هسه
دخيل الله مِسه باچر اذا أمسه
علينه اشما نبالغ اصعب و أقسه
صحابه و هاشم أو كِلهم
ولا واحد يظل منهم
تره عن المُصيبه باقي ساعات
مِثل هذا الوكت بَاچر سِبِيات
بَٰاچِرْ الله يِستَرْ
~~~~~~~~~~~~~~~~~~~
غَدًا عاي الزِلم صَرعه
چثث عالغبره مِتوزعه
والأصعب .. نِشاهد .. قَتِلهم .. ضِمايه
إلطمن وابچّن ابلوعه
النِحُور الحِلوه مگطوعه
نِنادي .. عَليمن .. زِلمنه .. ضَحايه
تره حتّى الطِفل باچر إله كَسره
يردّ ابحضن ابوه و منگطع نَحره
يويلي يموت ضلمي بحسرة الگطره
رباب ابصدمة الغالي
تِهز مَهد الطفل خَالي
عَسن هذا النهر قبل الطفل مات
مِثل هذا الوكت بَاچر سِبِيات
بَٰاچِرْ الله يِستَرْ
~~~~~~~~~~~~~~~~~~~
إذا طاحوا أهالينه
تجي ركضه زلم لينه
إتركن .. خِيمچن .. و اطلعن .. سِويّه
اكو يِنهب اكو ايسلّب
اكو بسوط الحقد يضرب
اسكتن .. و اصبرن .. و اركضن .. عليّه
تره كلها تريد اتباوع الطولي
عليّ كلچن التمّن لا يِنظرولي
اصيح المن و اخوتي ما يفزعولي
إذا وحدي يعرفوني
و إذا نِلتم يِضَيعوني
احفظن هالوصيّه يالنَجيبات
مِثل هذا الوكت بَاچر سِبِيات
بَٰاچِرْ الله يِستَرْ
~~~~~~~~~~~~~~~~~~~
علامات السبي عندي
إذا طاح الگمر تبدي
و اشاهد .. اخويه .. يواجه .. مصيره
ألا مِن ناصرٍ نسمع
نجاوب احنه بالمدمع
يضامي .. نِسمعك .. و ادينه .. گصيره
يباوع للشريعه و نظرته بحيره
كأنّه يگول افزعلي يبو الغِيره
الَريب بكربله ما واحد ايجيره
تره إبموتي يبو النَخوه
تظل زِينب بلا إخوه
ولا نِسمع بعد كلمة سلامات
مِثل هذا الوكت بَاچر سِبِيات
بَٰاچِرْ الله يِستَرْ
~~~~~~~~~~~~~~~~~~~
إذا شَفَّت شِمْر صَاعد
عَلى صَدِر الأخُو گاعَدْ
يِطُبرهَ .. يِذِبْحهَ .. يٰويِلي .. عَليَّه
يِرُفَعه مِن شَعر رَاسَه
يِنادي وُيَنه عَباسَه
يَزِينبْ .. دِشوفي .. ذِبَحْته .. بِديّه
يگلَي هَا يَزِينبْ أَرِفسه بَصدره
أحس أرتَاح گلبِي مِنْ أگطَعِتْ نَحره
وأنْا بِيِدي أگيدج وأقهر الزَهرة
تَره بَاچِر يِسَلبوني
سِياط اتوگع امتوني
دِگومن و ادعَن و صِيحن غِريبات
مِثل هذا الوكت بَاچر سِبِيات
بَٰاچِرْ الله يِستَرْ
~~~~~~~~~~~~~~~~~~~
~~~~~~~~~~~~~~~~~~~
تعليقات
إرسال تعليق