القصيدة: فَگدَكْ مُصِيبَة
الرادود: مُحَمَّد الجنَّامِيْ
الشاعر: أحمد الذهبي
~~~~~~~~~~~~~~~~~~~~~~~
رَايِح يَبَعد اُخُوكْ
يا هيبة المِلوك
شيظل بعد لِبوك
فَگدَكْ مُصِيبَة
عَلِيْل .. اُخُوك .. و ايده اعلى خَده
وراك .. يِمُوت .. من يُبقى وَحده
رَايِح يَبَعد اُخُوكْ
~~~~~~~~~~~~~~~~~~~~~~~
سَهمك ابعيني
و سيف نحرك حز وريدي من يذبحك
خُويه دليني
تَيّهتهن يا هو جرحي و ياهو جرحك
كِلشي من بعدك سواد ميّت ابعيني الضوه
الحَسره من طلعت وراك مابقه بريتي هوه
اجروحي اليدورن عليك ظلّن ابعازة دِوه
عليك اذا تروح
ينلچمن الجِروح
جرح الگلب يِنوح
ايّس طبيبه
مُصاب .. عذاب .. عشته ابمصابك
عِتاب .. يسيل .. دَمعي الشبابك
رَايِح يَبَعد اُخُوكْ
~~~~~~~~~~~~~~~~~~~~~~~
شِفتك اگبالي
يريد ابونه يشيل جسمك و انته طايح
ما گدر يوگف
انحنه وناده ليش منّي يبني رايح
يا علي شفت الدموع ابعين ابوي ابلا بچي
چنه من دنگ عليك عنده وي طولك حچي
يگلّك الأب من يطيح بس عله ابنه ينتچي
صاح ابتده الخِتام
على العمر سلام
من يبچي للخيام
يوصل نَحيبه
يخوي .. جيوش .. كلها اعلى ابونه
وحيد .. غريب .. لمّن يجونه
رَايِح يَبَعد اُخُوكْ
~~~~~~~~~~~~~~~~~~~~~~~
تِدري يا خُويه
المو اخوته اتشيل حمله شنهو نفعه
مو هوه العالي
نَسمه وحده تِحني ظهره من تِدفعه
يبقه مكسور الوحيد والأخو احزام الظهر
بعدساعه وظهر ابوي ينكسر يم النَهر
من يگطعون الچفوف و ينذبح ضيّ الگمر
من يوگع العضيد
يتخوصر العجيد
والدنيا عالوحيد
تِفتر عجيبه
يصيح .. تعال .. يا خويه و ارجع
واخوه .. ذِبيح .. ما چنّه يسمع
رَايِح يَبَعد اُخُوكْ
~~~~~~~~~~~~~~~~~~~~~~~
وانته بالخيمه
وِصله وِصله شفت جسمك شالته امك
حيره من حيره
لِيلَه حارت مدري تبچي لو تِلمّك
مارضت ميت نگول گالت وليدي غفه
هيّه اُم والاُم يَخوي كتله من العاطفه
گلب اليفارگ ضناه العالم ابعينه طفه
طور النعي الحَزين
گلب اُمك الحِنين
ينبض بچي و ونين
گلب الغَريبه
حَرام .. تِلوع .. اُم اعله ابنها
تِموت .. وراه .. من گد حِزنها
رَايِح يَبَعد اُخُوكْ
~~~~~~~~~~~~~~~~~~~~~~~
گطِّعوا طُولك
وانته چنك عافيتنه واغلى منها
ويلي يا عَينك
ما شِفتها اتراب والدم ضيّعنها
وينها الفگدت شباب اليوم تِذكر فاطِمه
وينها الفگدت شباب خل تِواسي فاطِمه
طاح الأكبر عالتراب وصدره بسهام انرمه
فوگ حر جرح السيوف نار گلبه امن الضِمه
مِنّ النَزف خذاه
صوت الجرح صداه
مات العِطش عساه
و ايشح نَصيبه
اصيح .. وراك .. يا خويه تاني
يريت .. يخوي .. موتك خذاني
رَايِح يَبَعد اُخُوكْ
~~~~~~~~~~~~~~~~~~~~~~~
✍🏻https://t.me/bk_mj_96
~~~~~~~~~~~~~~~~~~~~~~~
تعليقات
إرسال تعليق