📜 القصيدة: دافن اهل گلبي
🎤 أداء: مسلم الوائلي
🖋 كلمات: عباس طالب السعيدي
~~~~
جيت اعثر بدربي
دافن اهل گلبي .. بالتراب
ياهو الصبر مثلي
لو ميت احسلي .. بالتراب
شناسي انه يمهم .. امشي وارجعلهم
بالتراب .. بالتراب
~~~~
اصعب موقف عاش وياي
گبر العطشان عليه ماي
.. ومبلل اترابه
انه الشلعوا گلبه اعزاز
هم دفان وهم جناز
.. مو هين امصابه
مامش متن واتعطل عن الدفن
بلكي يگعدون
طر الفجر وانه احجي بصف الگبر
هسه يگومون
الغالي عله اعزازه
يجلب بالجنازه .. وره الناس
يگضيها بس ردوا
من عندي كلشي اخذوا .. وره الناس
مو بديه احبهم .. امشي وارجعلهم
بالتراب .. بالتراب
~~~~
اصعب موقف مر عالروح
من تدفن بيدك مذبوح
.. ومطشره ضلوعه
اجمع بي منا لليل
گد ما صدره مطشره الخيل
.. بالمنحر دموعه
ما يلزم جسمه من خيول الزلم
بي شمسوين
طول العصر ادفن بس خالي الگبر
جا شمخلين
مثل العطر جسمه
ما ينكض اشتمه .. يالهواي
خلصت بجي عيني
وما خلص حسيني .. يالهواي
يمه اخوته كلهم .. امشي وارجعلهم
بالتراب .. بالتراب
~~
ليش حسين بلا تابوت
لا تشييع ولا زاتوت
.. حته البجي سكته
لا فاتحته اطبها الناس
لا واگف بيها العباس
.. وزغيره فاتحته
ضيمي من امس شدفن من عدها الشمس
واهلي يتانون
كلما گلت راح اگضي خنصر شفت
ظل ما مدفون
مطشر ضوه الجنه
يا حيره شدفننه .. صدگ هاي
من اجمعت ظهره
لاگاني دم صدره .. صدگ هاي
خطوه لو عفتهم .. امشي وارجعلهم
بالتراب .. بالتراب
~~
امشي واسمع صوت هناك
هاي جفوفي ادفنها وياك
.. لا تبتعد عني
يا دفان اخذ الجفين
فدوه ادفنهن يم حسين
.. بلكي الله يشبگني
وتعثرت بجفوفه ويمهن طحت
وي عمي شلون
والجف نگع بالدم جن توه انگطع
من گتله ام عون
الطوله جبل وسفه
بزغر گبر كفه .. صحت ليش
شاورني من گبره
سلملي عالحره .. صحت ليش
گال اخذني الهم .. امشي وارجعلهم
بالتراب .. بالتراب
~~
رديت الزينب تعبان
عطشان ودافن عطشان
.. گوه انگل اجدامي
گالت جا يبني اشنساك
لو جايب عبد الله وياك
.. مو تدري بي ضامي
گتله الولد كبران ومو بالمهد
ما رد وياي
گالت علي حاجيني شبيهم هلي
لو شربوا ماي
ما شربوا اميه
جي انتي مسبيه .. يگولون
اخوانج بهيمه
وسئلوا عله الخيمه .. يگولون
حيره شرد اگلهم .. امشي وارجعلهم
بالتراب .. بالتراب
°°°°°°°°°°°°°°°°°°°°°°°°°°°°°°°°°
تعليقات
إرسال تعليق