القصيدة: مُو بَس عَلمْ
الرادود: مُحَمَّد الجنَّامِيْ
الشاعر: وسام الشويلي
~~~~~~~~~~~~~~~~
شفتك نهر گاصد نهر
فرگتك حنية طهر
يابو فاضل
مُو بَس عَلمْ بيدك خيم
بيدك خدور الحَرم
يابو فاضل
رايح و ويّاك اخّذت انفاسي
مالي غيرك تدري يا عبّاسي
انته عمري
~~~~~~~~~~~~~~~~
إذا مرّه يخويه ردت اشوف ابعيني روحي
اعاين صورتك
إلي وجهك امرايه و كلشي اشوفه بس جروحي
تضيع بشوفتك
قريب انته على روحي و مثل ظلّي
تروح بعيد بس ما رحت من بالي
اشوفك مو جزء من عندي لا گلّي
اخوي انته وحبيبي وصاحبي الغالي
يبعد اهلي
وفه مملي
صِرت خِلّي
وصرت خلّك
عشرة عمر و اسمك عطر
وانته يا خويه شكثر
عندي غالي
انته الرفاگه والأهل
ترخص الدنيه وتظل
عندي غالي
حزام ظهر و هيبتي و نوماسي
مالي غيرك تدري يا عبّاسي
انته عمري
~~~~~~~~~~~~~~~~
الأخو محّد يعوضه و الوحيد أيعيش حيره
بقه بعازة أخو
منو غيرك إليّه و انته مو واحد عشيره
كفو منّك كفو
يسألوني اعله حبّك وادم اهوايه
و اگلهُم اكو واحد ما يحب روحه
أنه امن اتعب و انام اتغطّه بالرايه
اعله واهس ريحتك والخوه مملوحه
شَوصفنّك
شعَز منّك
اشمَنّك
هوه اعذيبي
وكت التعب راحه إلي
بيك هَمّي يِنجلي
يا عضيدي
ماگول إلي انته الحرس
انته للريّه نَفس
يا عضيدي
تسري وي دمّي و عشت بإحساسي
مالي غيرك تدري يا عبّاسي
انته عمري
~~~~~~~~~~~~~~~~
گبل لا تمشي اگلّك روحي هاي وياك تمشي
الگلب بسمك يدگ
اضيّع كلشي بعدك لأن يا خويه انته كلشي
اشيظل من نفترگ
أنه أوّل مره اگلهم وين عصَّاتي
لأن بس رحت يا خويه انحنه ظهري
إذا اكتِم حسرتي شيخفي دمعاتي
و من هسّه العقيله تصيح يا خدري
يبو الغيره
صدگ حيره
النظر ديره
على زينب
زينـب بچت و اتطالبك
خدري دمَه بشاربك
لا تعوفه
عنّي تحاچيك ابقهر
حسين مكسور الظهر
لا تعوفه
وأنه اگلّك يا هلي و يا ناسي
مالي غيرك تدري يا عبّاسي
انته عمري
~~~~~~~~~~~~~~~~
رحت واحنه بقينه بلا أمان و گلها تسأل
رجع لو ما رجع
عطش واطفال تبچي بالخيام و رود تذبل
وأنه گلبي انگطع
على هالحال و اسمع خويه ادركني
اجيتك بس اجيتك بالدموع اعثر
صحت عبّاس ناوي الوحدي تتركني
ما بين الشماته و حيرة الخدّر
دحاچيني
شيدلّيني
انعمت عيني
بسهم عينك
وينك صحت يمّك طحت
خويه من عندي رحت
يا هضيمه
فوگ الثره طاح الگلب
على اچفوفك ينتحب
يا هضيمه
هدّمتني بروحتك من ساسي
مالي غيرك تدري يا عبّاسي
انته عمري
~~~~~~~~~~~~~~~~
أدوّر على چفوك ارد احطهن على عيوني
يمن ليهن ضوه
عفتني ويه الشماته يعبّاس انخطف لوني
انا احتاجك هوه
منمدّد ابطولك لازم اضلوعي
واگلّك يابوفاضل هدّمت حيلي
احط ثغري اعله ثغرك واِشرَب دموعي
أنه ابچيلك يخويه وانته تبچلي
صحت وانحب
يالمعتّب
بعد زينب
منو إلها
يالنطرح صاح الجرح
ساعه بعدك وانذبح
و ابقه عاري
صدري اعله ظهري ينطبگ
بالحوافر انسحگ
و ابقه عاري
عالرمح واينادي بسمك راسي
مالي غيرك تدري يا عبّاسي
انته عمري
~~~~~~~~~~~~~~~~
~~~~~~~~~~~~~~~~
#محمد_الجنامي ° قصيدة • [ مو بس علم ] • اداء || محمد الجنامي • الشاعر || وسام الشويلي ° ليالي محرم الحرام 1444 ° العراق - البصرة - قضاء الفاو ° عزاء حسينية وموكب أم الحسن
تعليقات
إرسال تعليق