شاف اخته تتعثر.. فوگ الرمح كبّر
يازينب.
*1
غيّم اخو زينب لمن شاف اخته يسبوها
دمدم على رمحه وزعل من صاحو اخذوها
يرف شاربه ويهتز غضب اخته ويضربوها
من نحره لا حت ونته يسمع يشتموها
يسل سيفه ما يگدر.. فوگ الرمح كبّر
يازينب.. يازينب
**2
من رمحه يتلفت ألم والزينب عيونه
يتمايل برمحه اذا حيدر يشتمونه
ينزل يحاول والرمح گوه يرفعونه
وجه اخته من ضيم السبي شاف اختلف لونه
من السبي تغير.. فوگ الرمح كبر
يازينب.. يازينب
***3
بكل رحله يبره الزينبه ماتطلع بغيره
هسه اعله هزله بلا گمر من ديره الديره
يتزعم الرحله الشمر لا رحمه لا غيره
موكب سبايا بلا اهل ياصاحب يجيره
درب السبي الخدر.. فوگ الرمح كبّر
يازينب.. يازينب
****4
الحسينه بدموعه يصد رايد اذن يرجع
من رمحه يگصد كربلا من جسمه المگطع
يحمل مثل حيدر علي لاخت الحسن يفزع
من عالرمح يمطر حزن جفن اخته ظل يدمع
اسمح يابو الاكبر.. فوگ الرمح كبر
يازينب.. يازينب
*****5
مو راس مرفوع برمح هيبة علي كلها
غيره وشجاعه ومرجله بنص راسه شايلها
للشام ما داخل بعد بس رعبه داخلها
خلف اخته يمشي اعله الرمح يخفي بأثر ظلها
يسمونه موت احمر.. فوگ الرمح كبّر
يازينب.. يازينب
******6
يسمع شمر يشتم طفل يسدّد علي نظره
ٳياكَ واحذر لا تمد جفّك على حـُره
ما ميّت براسي علي لا اذبحك بخزره
آني الگمر واخت الگمر لا ماتذل مرّه
بروحي رجع حيدر.. فوگ الرمح كبّر
يازينب.. يازينب
*******7
من طاحت الرايه رفع راسه عوض عنها
العباس تنزف غيرته ما ينوجد منها
حيدر وزينب فاطمه يون لو سمع ونها
عينه اعله السياط وغضب جم سوط ضربنها
يازينب اتعثر.. فوگ الرمح كبّر
يازينب.. يازينب
كلمات الشاعر
السيد:آدم الحسني
ليلة 18 محرم 1444هـ
حسينة وموكب ام الحسن عليها السلام
البصرة_الفاو
تعليقات
إرسال تعليق