لشهادة السيدة رقية عليها السلام
--------------------------
ياخرابه ،، راس ابواليمه يوصيچ ابوصيّه
ياخرابه ،، الله الله امــأمنچ بنتــي رقيــّه
من ترفرف روحها الفگدت وليها
من يوسدوها الثره سمّي عليها
@@@
طير جنه نازل ابهــــاي الخرابـــه
بين جنحينه انطوه حزنه اومصابه
بعده اصغيّر عُمر واشگد عذابـــه
منكسر گلبه وعلا منّه انتحابــــــه
طير جنّه ،، كثرت ابهــــالدنيه آلامه وجراحـه
طير جنّه ،، من همومه منكسر گلبه اوجناحه
عن رقيّه هــالخبر لو تســـأليهـا
من يوسدوها الثره سمّي عليها
@@@
شهگة الروح ابتدت بالغاضريه
اتوزعت بين الخيم والسمهريّه
بينها وبين المصارع چم رزيه
طفله من كثر الهضم بالعمر ميّه
بالمصايب ،، شاب مفرگها الطفوله الهاشميه
بالمصايب ،، سلّت اسيواف ابضغاينها أميه
اشگد صغيره والنوايب تبتليها
من يوسدوها الثره سمّي عليها
@@@
طفله واگيود السبي كلش ثگيله
نوبه تسحب گيدها ونوبه تشيله
ونوبه تنظر بالدمع صوب العقيله
تگول عمه ع الثگل مابيّه حيله
من سبيها ،، شافت انواع العذابات ابدربها
من سبيها ،، اشما بچت من الحزن طاغي ضربها
بالحديد الهاشميّه امغلليها
من يوسدوها الثره سمّي عليها
@@@@
الحديد اويه الشمس زيّد المها
ويّه كل خطوه الثره يچوي جدمها
وفوگ جمرات الخيم جمرة هضمها
مرّه تشكي للابو ومرّه لعمها
بويه وينك ،، شوف حالي بويه من هضمي نخيتك
بويه وينك ،، دوريتك بالدرب بس مالگيتك
ضاعت العدهم عزيزه امدلليها
من يوسدوها الثره سمّي عليها
@@@@
الدنيه متغيره عليها ابلا جنايه
وصلت الشام وخرابتها النهايه
اتدور الوالدها بادموع الشكايه
بويه وارم متني شوف اجروحي هايه
اشگد تأذت ،، طفله ما تتحمل ادروب الطويله
اشگد تأذت ،، تندعي لله ابهضمها وتشتكي له
يارقيه اشگد مصايب تحمليها
من يوسدوها الثره سمّي عليها
@@@@@
من كثر ماباچيه تعبت رقيه
غافيه صارت على اتراب المنيه
شافت ابأحلامها روح الزچيه
اتگوله بابا شفت بعدك اذيه
مر عليّه ،، بابا مشتاگه احظنك مر عليه
مر عليّه ،، فزت اوشافت طشت راس الشفيه
شهگت آخر شهگه باخر نظره ليها
من يوسدوها الثره سمّي عليها
-------------------------
ثامر بوجبارة الاحسائي
#لشهادة السيدة رقية عليها السلام
————————————
يا يابه ،، اشتگت لك يا يابه
سچابه ،، دمعتي سچابه
@@@
يا يابه ، ارجع و حاچيني
مشتاگه ، النظره ياضي عيني
يالبُعدك ، كل وكت يچويني
كل ساعه ، هالشمر ياذيني
واصوابه ، متني شوف اصوابه
@@@
اخذوني ، هالغرب مسبيه
واگيودي ، ثگلت اعله ايديه
ناديتك ، ما ترد اعليّه
يا يابه ، ما تشوف البيه
لهّابه ، جمرتي لهّابه
@@
جرّوني ، بالحبل جروني
وامتوني ، بالله شوف امتوني
من أبچي ، بالرمح ضربوني
من انده ، باسمك ايشتموني
باعتابه ، گلبي حن باعتابه
@@
يابويه، جينه شام الكلفه
والشامت ،صد علينه ابطرفه
يتشمت ، يمنه يضرب دُفه
بالمجلس ، ذابحك يتشفّه
باخضابه ، منحرك باخضابه
@@@
يابويه ، بالخرابه جينه
جابونه ، انه ويّه اسكينه
انشدها ، يختي بويه وينه
حيّرني ، ما أظن ناسينه
واغيابه ، چنه طال اغيابه
@@
عن زينب ، شاحچي اه عن زينب
ملچومه ، والگلب ظل يلهب
والشافت ، في غيابك يصعب
يابويه ، بالمجالس تنسب
ماهابه هالشرف ماهابه
—————————-
ثامر بوجبارة
#لشهادة السيدة رقيّة عليها السلام
———————
گيد ومعصمها ترف
وحادي الناگه صَلِف
تمشي ما تگوه على ظهر الهزيله
طفله واگيود السبي اعليها ثگيله
@@@@
ضحكة الذبّاح تسري ابوسط لمخيّم
والسمه دخّان وتمطر بس مطرها دم
ابكل كتر نيران وجّت والفضا اظلم
راس لحسين اعله رمحه وشمر ما يرحم
منذبح ع الغبره مات
والعده ابكل الجهات
ولن رقيّه اتدوّر اعليها العقيله
طفله واگيود السبي اعليها ثگيله
@@@@
ياشبيهة فاطمه امها ابكل شي مظلومه
ام ابوها وام ابوها ومنّه محرومه
والمتون امن الاعادي ابسوط ملچومه
تبچي هذي وهذي تبچي ابعين ملطومه
حتى البواچي امحرمه
ومنها المتون امورمه
اشلون تتحمل ضرب واهيه نحيله
طفله واگيود السبي اعليها ثگيله
@@@@
راح ابو البسمه الحنونه وانطحن صدره
ياحظن بعده يلمها الخاطر ايجبره
طفله يا ناس اشعمرها وتبقى منكسره
يجرح الاحساس منها جاري العبره
ابسوطه لوّعها الرجس
توگع اتگوم ابرفِس
اتدور احسين ابدمعها تشتكي له
طفله واگيود السبي اعليها ثگيله
@@@@
بويه ما اكوه عليها ركبت الناگه
فوگ ثگل اگيودي بويه ابچفي حرّاگه
بالدرب اصفن وادورك رد لي مشتاگه
واسأل اعليك العقيله بويه شالعاگه
يرضه اماشي حرمله
وانه عنده امدللـه
سوطه يتلوّه اعله متني ودم يسيله
طفله واگيود السبي اعليها ثگيله
@@@@
دخلت الشام اشثگلها والوضع يصعب
نظرت الشمّات تذبح آه يا زينب
والفواطم بالخرابه رحمتك ياااا رب
وراس ابو اليمه هديّه ابطشت لمذهب
ينكث اسنانه النذل
وزينب المدمع تهل
واليتيمه ياهضم تگدر تشيله
طفله واگيود السبي اعليها ثگيله
@@@@
امن الحلم فزت رقيّه يجرح المنظر
اشتاگت الطفله الأبوها ورادته يحضر
وين ابويه ما اريده عنّي يتأخر
بالطشت شافت كريمه منگطع منحر
والطشت دمّ انترس
شهگت وغاب النفس
بالخرابه خلصت الرحله الطويله
طفله واگيود السبي اعليها ثگيله
--------------------------
ثامر بوجبارة
#لشهادة السيدة رقيّة عليها السلام
———————
أوداج وگلب وامواعد الرفگه
والملکه يحل في لحظة الشهگه
ميته كلها لحلام
طفله ابخربة الشام
@@@@@
ذبحوا البراءه ابكربله والمدمع ايسيل
حدّايه يحدوها ابحقد من هجمت الخيل
بعد المحنه والعطف تغفه ابحظن ويل
طفله يويلي من مشت بيديها زنجيل
مثل المنذبح هالطفله مسبيه
واجروح المتن الف وتسعميه
امن اجروح الأبو الهام
طفله ابخربة الشام
@@@
طفله على ظهر الهزل وابميلة النوگ
باللوعه والمتن الترف ياوسفه ممزوگ
ماذيّه من سوط العدا والأعظم الشوگ
راح الأبو ومنها الگلب بالفرگه محروگ
ويلي امچتفه راحت على الناگه
والأعظم عليها البوها مشتاگه
تتنطر خبر هام
طفله ابخربة الشام
@@@@
لمن وصّلوا شام القهر بيديهم الگيد
بيها الشماته ابكل كتر لن بيها چن عيد
يتشمّت اعليهم وسف بالمجلس ايزيد
يحرگ گلب زينب قهر هالطاغيه ايريد
من ظيم الزمن حسره بعد حسره
وابوسط الخرابه نامت العتره
بيها تغفه واتنام
طفله ابخربة الشام
@@@@
زينب تلم شمل اليتم تجري الدمع دم
ياخويه والله اتمرمرت بالحالة تعلم
هاذي رقيه من رحت ياخويه بالهم
لو تغفي لحظه الشوفتك يابوها تحلم
يا ريّة ورد بس وسفه مخنوگه
واعله اوداج ابوها ابلهفه مشبوگه
واعليها الحزن حام
طفله ابخربة الشام
@@@@
حان الوعد والملتقى وسط الخرابه
من فزّت وصاحت رعب وينك ييابه
جابوا لها راسه ابطشت شافت خضابه
شهگت ولن مامن النفس لحظة غيابه
هالگلب الترف شالگطع انياطه
بالله ابيا ذنب كل الهظم حاطه
وابعمر اربع اعوام
طفله ابخربة الشام
-----------------------
ثامر بوجبارة الاحسائي
ميمر للسيدة رقية عليها السلام
--------
منّ القدر ،، عمري گصر ،، وسط الخرابه المثوّه
@@@
آنه شبيهة فاطمه سمّوني
مثل الوديعه الگوم هم ضربوني
منّ الضرب مثل أُمي زرگه امتوني
قنفذ اجه ،، ابصورة شمر ،، سوطه عَلي يتلوّه
@@@
مشتاگه بويه الشوفتك مشتاگه
اگيود السبي فوگ الثگل حرّاكه
كم مرّه بويه أوگع امن الناگه
وزينب تهل ،، دمع الحزن ،، يا خويه دهري اشسوّه
@@@
ابعمر الورد وانظام واشگد عُمري
هالگوم ما راعوا سنيني وصغري
واللي ضربني يدري باصلي يدري
لاچن رجس ،، مابيه رحم ،، مابيه لا شيمه ونخوّه
@@@
ابكل الفروض اتنطرك يا احسيني
امصلاتك افرشها ابرموشي وعيني
چا ما أشوفك ياوكت تلفيني
أذّن علي ،، ابوگت الفرض ،، بس والدي ماهوّه
@@@
هالشام اه يابويه من ضيم الشام
من بعد عزنه هسه بالخربه انام
والخاص يتفرج علينه والعام
عيد وسعد ،، ضحكة فرح ،، أهل الشماته بلوه
@@@
يابويه انه امدللة قلبك هاي
هذا الوكت يابويه ردتك وياي
ماطالبه لازاد لا شربة ماي
انته العذب ،، لرويحتي ،، من شوفتك اتروّه
@@
يا بويه طالت غيبتك چا وينك
مشتاگه بويه البسمتك والعينك
چا بس أشوفك راس وين احسينك
بس من شفت ،، راس ابطشت ،، روحي اطلعت ياسلوه
—————————
ثامر بوجبارة الأحسائي
#لشهادة السيدة رقية عليها السلام
—————————————-
ميته ياعمه رقيه ع الطشت مو نايمَه
( السلام عليكِ ياشبيهة فاطمة )
خل نغمّض عينها
راحت اويه احسينها
ياشبيهة فاطمه
@@@
آية الموؤده رجعت بالخرابه اتنزلت
ابمصحف احزان العقيله من رقيه (سُئلت)
ابيا ذنب بالله وجنايه بالهضيمه (قُتلت)
وابوسط طشت المنيه ابروح ترفه اتبسملت
صعدت انفاس القداسه للسمه لن ترتفع
والسؤال الكله حيره تموت ليش ابهالوضع
اگصيره لنّ اسنينها
راحت اويه احسينها
ياشبيهة فاطمه
@@@
اشگد يحب الله الطفوله بيها كل رقه وجمال
طفله في عمرچ رقيه طفله بس مالت دلال
لا عذاب اعليها يرهم لا سبي ولا جر حبال
اشگد تحملتي رقيه والله حيرني السؤال
سوط يضرب بيها گوّه وبالرمح يضربها ذاك
ندري بيه ثگل السلاسل يا أبوها اشگد اذاك
صابره الله يعينها
راحت اويه احسينها
@@@@
ما تفارگها عيونك وانته راس اعله الرمح
امدللة گلبك تراها امن الضرب كلها جرح
گلبك اعله الرمضه ذايب فوگ ماظل منطرح
كل وكتها بعد عينك ليل ما بعده صبح
بالدرب عينك عليها يا أبو الگلب الحنون
اتشاهد اسياط الاعادي ورّمت منها المتون
عينك اتصد عينها
راحت اويه احسينها
@@@
اشكثر عانت هالحنونه وابرغم گصر العمر
من بعد بسمات ابوها هسه تتروع خزر
امدللـه باحضان ابوها صار يزجرها الشمر
اشگد عمرها وبالله تحچي ربي الهمني الصبر
نوبه تمشي ويضربوها نوبه توگع بالحديد
نوبه تتحرگ جدمها امن الشمس ويعتها گيد
ما يرحموا اونينها
راحت اويه احسينها
@@@@
لا تسألون الهواشم لا تطلبون الجواب
آه يا شام الأذيّه آه يا شام العذاب
ما بعدها اي رزيّه ما بعدها اي مصاب
حتى هذا الطفل منهم بالمصايب راسه شاب
يا علي السجاد الله يعينك ابهالابتلاء
هالشفت بالشام أعظم لو مصيبة كربلاء
لو يتيمه وبينها
راحت اويه احسينها
@@@@
من بعد ضيم المجالس من بعد ضيم الشوام
زينب ابوسط الخرابه اعليها تتفرج عوام
اتأذت الطفله رقيه اعليها تتشمت لئام
هناك تشتاگ الأبوها ورادت ابحظنه تنام
بويه وينك يا حناني ما تجي اتشوف الجره
من بعد حظنك خرابه وچنها بويه مگبره
ابهالعمر سابينها
راحت اويه احسينها
@@@@
دورت وينه ابوها وينه طوّل غيبته
اتگول مشتاگ لبويه ما يجي مو عادته
والرجس امر عبيده اخذوا ليها الطلبته
ماتت ابضيم وهظيمه ع الطشت من شافته
امغسله جابوا لجلها اتگول لا ما أقترب
خافت امن اثار بيها ما درت من الضرب
زينب اتدفنينها
راحت اويه احسينها
——————————-
ثامر بوجبارة الأحسائي
٠٢-٠٢-١٤٤١هـ
٠١-١٠-٢٠١٩م
#لشهادة عزيزة الحسين السيدة رقيه عليها السلام
--------------------------
مابيه نفس بس مختنگ عليّه
من يضربوني ايگول : اسم الله رقيه
اريد اتشوف متني
آنه الدللتني
@@@@@
عنها شسولف الشام ،، نظرات الشامت اسهام
فوگ الهوازل نمشي بس ماكو هوادج
ذاك الشتم اهلنه ،، وهذا اليجي ويگلنه
الحمد لله اللي فضحكم يالخوارج
هالشام شفنه بيها اصناف العجايب
كلش صعب زينب تصد الها الاجانب
بعد المعزه نفترش تالي الخرايب
وابمجلس ايزيد الرجس ندخل طلايب
المو خوش اوادم تنظر الفواطم
يا غيرة الله خبّري الهواشم
ما ترحم سبتني
آنه الدللتني
@@@@@
العنده ابو مثل احسين ،، من يفگده ايجيبه امنين
الموت رحمه ايصير له شلّه ابحياته
والشتله من غير الماي ،، اتموت لو عدها اهواي
واش ينفعه لهواي من يبست شفاته
وانه بويه الماي عندي بعده لي الموت
انياط گلبي گطّعوها وسط لطشوت
اشلون لمتنه النهايه اشلون تابوت
اثنينه خانگ نفسنه اثنينه اسكوت
اه يا طشت بيه انذبح دليلي
مشتاگه بس ابيا وضع يجيلي
ارجع يالعفتني
آنه الدللتني
@@@@@
عنّت عليّه چفّه ،، وابحظنه ساعه اغفه
ما مر عليّه ايام ما متعوده فرگاه
ابأخر وداعي شفته ،، يضرب يزيد ابشفته
آه ياطف كربله اشخليتي من آه
بيها عبد الله اعله صدره وانه عالراس
في كربلا والشام يعني وذر يا ناس
امگطعينه بويه وآنه ابحيرة (ت) احساس
فوگ ما مكسور ظهره ابعمي عباس
يا كربلا ما ينوصف عذابي
من صغري واگف ينطر اعله بابي
الدنيه عذبتني
آنه الدللتني
@@@@@
مشتاگه بويه اشوفك ،، وامحيره ابظروفك
لو يصح بيدي اجيگ الطف واگعدك
لون موتي ابخرابه ،، وبيك التگي يا يابه
اتمنى اموتن ما اريد العمر بعدك
غِفْيَت عيوني امن السبي واركوب لنياگ
وامن الضرب سوط العدو يابويه حرّاگ
منّ التعب من البعد من نار لفراگ
وابحلمي شفتك گلت الي يابويه مشتاگ
تاليها يابويه ابطشت اشوفك
راس وأثاري جسمك ابطفوفك
أهوال العمتني
آنه الدللتني
@@@@@
يالباربعينه مشّاي ،، مرني واخذ دمعي ماي
واعلى الگبر رشه عسى يبرد غليله
ابركب الهواشم الجاه ،، يعذرني ما جيت اوياه
بس خايفه وضعي ايفطر له دليله
مرّوا عليّه بالدرب ياهل الكرامه
من گبري اخذوا رايتي مني علامه
گولوا له گلبي ايبلغه شوگه وسلامه
يشرح له كل اللي جره وكل الظلامه
گولوا له تسأل اعليك الغريبه
بالشام ميته وبالگلب لهيبه
بالشام الدهتني
آنه الدللتني
--------------------
ثامر بوجبارة
٠٣-٠٢-١٤٤٣هـ
١١-٠٩-٢٠٢١م
#على لسان حال السيدة رقية
_________________
بويه يحسين ،، خذني جرح نازف من اجروحك
بويه يحسين ،، خل روحي اتعانق قُدس روحك
خذني ضمه ابروح
بويه يا مذبوح
بويه يحسين
@@@
بويه نزلت دمعتي آني رقيّه
گوم بويه امسحها لا تجرحني هيّه
خوفي لا تتشمت العدوان بيّه
خوفي سوط الشمر يتلوهّ عليّه
دمعي يجري ،، بس لحظه مر ابچفك ابخدي
دمعي يجري ،، *غيرك أبو يحسين ماعندي*
تعّباني النوح
بويه يا مذبوح
بويه يحسين
@@
گوم اليّه الخاطر الله أرد اشوفك
خوفي بويه ما ألاگيك امن اعوفك
والله مشتاگه الحنانك والچفوفك
بويه اعذرك ياللي فجعتني ظروفك
بويه بويه ،، ابجمر المخيم جدمي محروگه
بويه بويه ،، امصابك شلع گلبي من اعروگه
اشبيّه ما مجروح ؟!!
بويه يا مذبوح
بويه يحسين
@@
بويه ما ريدن اعذبك بالتشرحه
خوفي ازيد اجروح كلبك فوگ جرحه
اشسوه عبدالله يبويه حين ذَبْحَه
شالحچالك ناظره يوم اليشبحه
اشحال اخويّه ،، حين اللي صابه حرمله ابسهمه
اشحال اخويّه ،، ترفه رگبته وتسفح ابدمّه
ظامي گلبه ايفوح
بويه يا مذبوح
بويه يحسين
@@
بويّه صرت الوحّدك من راح عباس
منكسر ظهرك تشوفك هاي لرجاس
ظامي وابسيف الشمر غابت الانفاس
وصدرك ابخيل العده ياوسفه ينداس
منين اجيبك ،، باچر ترا العدوان يسبوني
منين اجيبك ،، لو بالسياط اتلوّت امتوني
والدمع مسفوح
بويه يا مذبوح
بويه يحسين
@@@
راح اروحن للسبي ومنّ العده انظام
بوداعة الله الملتقى يابويه بالشام
بالخرابه من عيوني تغفى وتنام
روحي تتلاگه اويه روحك مو بالحلام
منّ أودعك ،، أمشي اويه زينب عمتي مسبيّه
منّ أودعك ،، بالحسره أمشي وگيد بيديّه
أبچي ما مسموح
بويه يا مذبوح
بويه يحسين
——————————
ثامر بوجبارة الأحسائي
٢٤-٠٧-٢٠١٩م
٢١-١١-١٤٤٠هـ
#رقية_عليها_السلام
عمه عمه اتمنيت اني الراهب
عمه عمه واشبگ ابوي الغايب
آه بيه حسره
آه وينه نحره
جنت الحبيبه وهسه الغريبه
الداسته الخيل من وين اجيبه
ميت والاسهام كلسا تصيبه
شعظم المصيبه
المات بموت عباسه
ذبحوا كل هَلَه وناسه
وحطو عالرمح راسه
ثوبه ثوبه متشگگ أمن الحافر
ثوبه ثوبه انسلب يوم العاشر
صار كلشي عثره
آه وينه نحره
.
.
.
.
عطشان أبويه يا عمه صعبه
جا يمتى اشوفه ماي ارد اشَربه
مشتاقه اخلي راسي اعله گلبه
گلبي واحبه
لساه ما خلص ذبحه
الوادم تضحك لجرحه
الشاله يهوس برمحه
ذابل ذابل وجهه المتعب الزهره
ذابل ذابل وعيونه كلش حمره
بي الله ادره
آه وينه نحره
.
.
.
.
عمه المسيحي مات اعله رسمه
كون بمكانه واسهر واشمه
وبدموع العيون اغسل له دمه
لا ما الجمه
ما اگله اني عطشانه
ارسمه يمشي ويانه
موش اشفافه ذبلانه
ارسم ارسم رأسه مع كل جسمه
ارسم ارسم من شعره عمه لجدمه
ماي واعله صدره
آه وينه نحره
.
.
.
.
بالملگه أصبن دمعي اعله دمعه
ترفعيلي رأسه مو انه ارفعه
مچويه اديه خافن اوگعه
ياذيني وضعه
مثل بچيه اعله اخوه عباس
هيج ارد ابچي فوك الراس
حريمه ذبحوا الاحساس
ميته ميته حسبيني لو شفته اني
ميته ميته من القهر واحزاني
نوح گلبي جمره
آه وينه نحره
.
.
.
.
عالوالد أسأل جند ال اميه
يگلولي عفناه للاعوجيه
يا عمه مطحون چبد الزجيه
بالغاضريه
خنصر أيده ما هوه
يجر هذا الهوى كوه
بلا اولاد لا خوه
وحده وحده والشمس تصهر جسمه
وحده وحده جامد بعينه دمه
صار ساحه ضهره
آه وينه نحره
.
.
.
.
يا عمه بالشام يكثر تعبنا
الرايح الراد الواگف يسبنا
ومن نظرت الناس يوگف گلبنا
محد يحبنا
احجار من السطح يوگع
علينا ولا فرد يفزع
ودمنا من الوجه يطلع
يوگع يوگع الماي حار اعلينا
يوگع يوگع ومثل الخيم يجوينا
اوجوه كلها حمره
آه وينه نحره
عبدالله الشويلي
تعليقات
إرسال تعليق