هذا لطمنه كل سنه على حسين واولاده
************1
جمر تحت الرماد ويشتعل دمنه
حرام النوم اذا بيّن محرمنه
مثل عابس جنون الحب تعلمنه
اعله گطع النحر مانگطع مآتمنه
والمارضى بلطم الصدر باقي اللطم بعناده
**************2
مجالسنا نعيش نموت نحييها
الجفوف بلا لطم كل خير مابيها
كون الدنيه بس بحسين نگضيها
وناس البينه تطعن بينه شعليها
مانستمع حـﭼـي البعض لو بالحـﭼـي يتماده
****************3
على امصاب الحسين الدمعه محبوبه
الساعه بمجلسه من الجنه محسوبه
اليلطم صدره ربك يغفر ذنوبه
خير حسين يترس عينه وجيوبه
هذا الحسين بكل وكت ماتنتهي امجاده
**************4
يلومونه ويگولون اللطم بُدعه
وتغثهم لو تطيح من المحب دمعه
مشينه والهدف نكسب رضا البضعه
فدوه ضلعونه اعله المنكسر ضلعه
طبع اليحب لاخر نفس مايخشى من جلاده
***********5
نصيحه شما يكثرون الينقدونه
على الخدمه بعد اكثر يشجعونه
يذبحونه ونصيح حسين يلگونه
حسين الله خلقنه لخاطر عيونه
هذا ابو اليمه ملك سيد وشيخ الساده
***************6
بدينه وي الحسين ونتنهي يمه
ومتفضل علينه هواي ابو اليمه
عشنه وشفنه كل الخير بالخدمه
نعمه حسين والله يديم هالنعمه
سبط النبي مثل الشمس ما غطته حسّاده
***********7
ضحّى بدمّه وبدم ولده وخيامه
حتى الشيعي باﭼـر يرفع الهامـــه
قليل شما نريد نضحّي گدامه
ﭼـبيره اعلينه اذا سمونه خدّامه
لبيك يابن يافاطمه صوت الضماير ناده
كلمات الشاعر
كرار حيدر الخفاجي
ليلة17 محرم 1444هـ
حسينية وموكب ام الحسن (ع)
الفاو_البصرة
تعليقات
إرسال تعليق