قصايد المشايه
اجيت الحضرتك مشاي رايه تشد ضهر رايه
من ديره لديره اسحوف وماتعبت المشايه
*******
اجيت الحضرت عطشان وصدري خنكته العبره
شايل عالمتن بيرغ وحيهم صاحت الزهره
اركض والكلب ملهوف ملكه الطير للشجره
ومن كثر ماخذني الشوك. كلبي صاير اشكبره
والهله تصيح الخدام من اولايه لولايه
*****
يالجفك سفينة نوح طوفان العشك خذنه
ارايه العلمناره انشوف جنه اشراع للجنه
عالكبه ترف يحسين شايلها الكمر جنه
حكنه اشما ننوح اعليك. يالتستاهل الونه
حجه وبيها الف عمره عدنه ازيارتك هايه
****
نسحك عله الجمر جاين نار وبالكلب تسعر
يالمذبوح الك جمرات تطلب ثار للمنحر
ولو مسنه العطش وياك نذكر لوعت الاكبر
واطول المسافه انريد منريد الدرب يكصر
ردانها المساف اطول كون ابدربك اهوايه
******
يمعيشنه نص الخير علينه خيرك اتبده
ديوانك بده من الفاو سفره الصحنك اتمده
والعزم يبو السجاد الكل زوارك اتشده
ومكضيه الحوائج بيك ماضل طايح بشده
يمدللنه جا شنريد منك غير الكفايه
*******
نوصل حضرتك وانطوف حجه واجب علينه
والي يلوم خله يلوم مايعرف شكو شبيه
احنه وياك عشك جنون عابس خل يسمينه
للحضره نجيك اسحوف لوقصرت رجلينه
وهل الجلمه بصفر كل عام انموت وياك شرايه
*******
تمت
أحمد الخفاجي
زينب بلايا الكفلها
لا تخلّوها
يلّه شدّوا الحيل الها
بعزه عينوها
وعلي ويّاكم
ــــــــــــــــــــــــــــ
العشره الاولى وياها اهلها
هوه بيها ما يمـر
المصـايب بدت توّهـا
حِده بناگتهـا الشمر
لا اخو الها يصح
والبگه براس الرمح
السبي الها ذبـــح
من مشت درب الاسر
شلون شده ومن يحلها
وبيش مگضيه
اجت ما ينشاف ظلها
ومشت مسبيه
واسوا مولاكم
وعلي ويّاكم
ــــــــــــــــــــ
شگال گلبه بأسر اخته
آه يا راعي العلم
هادم الاصنام .. بنته
مشت مسبيه لصنم
وقل هو الله احد
عالهزل تمشي شبعد
ما بقى الها سند
إلا فزعه من الخدم
يا هضيمه بت ابوها
بلايا كافلها
عالصدر لطموا لاخوها
وعالمتن الها
بهاي تنخاكم
وعلي ويّاكم
ــــــــــــــــــــ
فزعوا الها يا غيارى
وغطوا لعيون الشمس
وعالارض كتبوا عباره
ظلها ممنوع اللمس
هاي بت حامي الحمه
والوديعه فاطمه
الها كلشي نقدمه
دمع والدم والنفس
بشّرت بينه ابن اخوها
لا تخيبوها
تامر و فوگ السبوها
الدنيا گلبوها
الهاي ربّاكم
علي ويّاكم
ــــــــــــــــــــ
زامطت بيكم وكلكم
گد عهد بت حيدره
بكل ارض نصبوا علمكم
يارجال القسوره
بكل وطن خَلّوا علم
بكل صدر نصبو خيم
بكل حسينيه خدم
من تمرها الطاهره
ولا تخلوها تدوّره
لو اجت هيه
ووين ما تنظر الزهره
تلگه لطميه
منو تحدّاكم
وعلي ويّاكم
ــــــــــــــــــــ
يا زلم ابنَ مظاهر
تربية عابس هله
جون بيكم يظل حاضر
امنوا بت عقد الوله
انتو اهلها ومن مثلكم
خدم لو مشايه كلكم
خلقت خصيصاً الكم
هلا بالزاير هلا
بالعقيله خدموا امها
ومن ترد باچر
كون تلگه كل خدمها
بكربله جابر
هذا ملگاكم
وعلي ويّاكم
الشاعر علي العابدي النجفي
بالهوسه گبل الماي
اتلگّوا كـل مشاي
وخدّام .. ربّاط الهوسه
ـــــــــــــ
من سمعوا براية مشي
يم راس البيشه تهـتز
فزعو بهوسه ويا هلا
حاتم طي من عدها فز
ياخذ تحيه لكل طفل
بيمن يوصفه يعجز
وشايب على عناد المرض
ابغيرته يتعـكّز
يرجف بس هز الگاع
من حشّم بويه بساع
مولود .. هد بكاروكـه
ـــــــــــــــــ
على قدر اهل الكرم
گالوا تجـي المكارم
وعلى قدر هاي الخدم
شنهو بس الله العالم
عشرين مليون العدد
عالاقـل الهـم قادم
وزوار شو ماكو السنه
خادم يگل لخادم
وواحد من واحد جاي
يتداين چم مشـــاي
كل دار .. عازت مشايه
ــــــــــــــــــ
خدام حد شوف النظر
محد يحدهم بالعـد
يتنافسون بهالكرم
ياهو الـ اطول سفره مد
بلا حطب غيرتهم كفـت
جمرة وفه ماتخـمد
عالروس حطّوه الخدم
والزاد شحده يبرد
اصل الغيره الكل راس
ماسح چف العبــاس
واحزام .. حزمهم بيـده
ــــــــــــــــــ
اشيترك الصوّر خدم
هاي الزياره شسجل
يتنافسون اعله اليجي
يا هو اليضيفه اول
يفزع يبشر كل هله
واطفاله تصيح تفضل
چن الحسين وطب اله
لو زاير بداره حل
وامه التگعد بالباب
من العتبه تشيل تراب
لو داس .. زاير لاعتابه
ــــــــــــــــــ
ولو گالوا الهم انتهت
ماظل بالشـارع زاير
بهذا الخبر كسرة ظهر
مو بس كسر للخاطر
العوده مو چنه دعه
چن المنيه باچر
اتطيح السمه فوگ الارض
لمن يطيح الچادر
من الموكب لو يرحون
بس اجساد يردون
والروح .. يَمّه يخلوها
ــــــــــــــــــ
الشاعر علي العابدي النجفي
مشايه وقائدنا المهدي .. كل خطوه بيا حيدر تبدي
مشاية .. عناية .. والراية بيدين المهدي امعليها
..........
عيشني دمع مولاي من الزهرة للمهدي
واجمعني اعله كلبك ماي كلما تعطش ايندي
يحسين العمر لحظات تكظي ايامه وتعدي
لاتبعدني عنك يوم جاغيرك انه شعندي
ياكعبة وجبريل ايطوفك يكرب للنار الي ايعوفك
ياجنة .. سجلنه .. زوارك .. بالمحشر نزحف مشايه
....
اجاك المهدي الك مشاي واعله اثاره اتخطه
يحسين ودخيلك جاي ومثلك يغفر الغلطة
كلشي انطيته ل الله وهاك كلك كلشي الك انطه
واعله الدنيا والتكوين واعله الكون الك سلطه
ها يحسين اتلكه احبابك .. جينه ازحوف اليوم البابك
وعيونك .. ماننسه .. لمصابك .. واعلينه اوعود انوافيها
..........
مشاي اعتني وممنون بحبك من عشت ذايب
وامشيت اشكثر يم ناس ومن الناس ارد خايب
ادري الي مشالك فاز وادري الماترد طالب
وإمَّشي الصحابه عليك ردتك هم الي صاحب
عاهدنه وعهدك منبيعه .. شوف ابعينك هاي الشيعه
وانصارك .. مجتمعه .. والدمعه .. يحسين ابصحنك نجريها
..........
انت ابدنيتي اللحظات وانت الدنيا والبيها
يا باقي العمر والراح وياك اسنيني خليها
لاتبعدني عنك يوم يمك روحي بقيها
وابجيلك دمع يعقوب حدما عيني اعميها
والمهدي الدم تارس عينه .. شافك مذبوح الله ايعينه
من شافك ..بالصحره. .. عالرمله. . وارمال بعينك تمليها
..........
اخلافك شنهو طعم العيش كون و لاعشت عمري
لوماشم ظريحك اه ششتَم والله ما ادري
ناذرلك سنيني ادموع و ونين ولطم صدري
وانطر بالشغف ملكاك واعشك لوعتي وصبري
كلما عاشور ايمر بينه نحسبله اشكد ويرد لينه
وانتاني .. بالدمعه نحسبلة .. وافروض الخدمه أنأديها
......... زهير الابراهيمي
#زينب_اجت_مشايه
اگعد يسبع الگنطره. زينب اجت مشايه
.........
وينك يراعي المرجلَه. زينب اجت مشايه
تسأل عليك بكربله. زينب اجت مشايه
يابالفضل بالعايله. زينب اجت مشايه
منّ السبي متغيّرَه. زينب اجت مشايه
اگعد يسبع الگنطره. زينب اجت مشايه
.........
دلّيهه چا وين الگبر. زينب اجت مشايه
حاچيها المن تنتظر. زينب اجت مشايه
تشكيلك جروح شكثر. زينب اجت مشايه
بممشاها تتعثّر تره. زينب اجت مشايه
اگعد يسبع الگنطره. زينب اجت مشايه
.........
بعد السبي يابالفضل. زينب اجت مشايه
مجروحه من شد الحبل. زينب اجت مشايه
مهضومه والمدمع يهل. زينب اجت مشايه
لتگلهه يختي المعذَرَه. زينب اجت مشايه
اگعد يسبع الگنطره. زينب اجت مشايه
.........
عباس گوملهه بعَجَل. زينب اجت مشايه
مفجوعه كاتلهه الخجَل. زينب اجت مشايه
لا عدها اخوه لا اهَل. زينب اجت مشايه
اشرف اخت وشرف مَرَه. زينب اجت مشايه
اگعد يسبع الگنطره. زينب اجت مشايه
.........
يم گبرك تنوح وتون. زينب اجت مشايه
معقوله لختك ما تحِن. زينب اجت مشايه
ما عدها آلام شتظِن؟ زينب اجت مشايه
ما تسأل عليها شجَرَه زينب اجت مشايه
اگعد يسبع الگنطره. زينب اجت مشايه
.........
ستقبلها ياراعي العلَم. زينب اجت مشايه
مهضومه بطفال وحرَم. زينب اجت مشايه
متعوبه من درب الألَم. زينب اجت مشايه
يالمندفن تحت الثرَه. زينب اجت مشايه
اگعد يسبع الگنطره. زينب اجت مشايه
.........
متغيره من ضيم السبي. زينب اجت مشايه
متكفله بعيال النبي. زينب اجت مشايه
تقبل يسبها الأجنبي. زينب اجت مشايه
وينك يوارث حيدرَه. زينب اجت مشايه
اگعد يسبع الگنطره. زينب اجت مشايه
سيد زيد الفحام
رف كلبهه الرايه
طلعت المشايه
...............ياهلا بزوارك
****
كلها ... مشايه تعنت كربله اتلكينه
والمعزب ... هذا ناده ياهله وفر بينه
شرف.. هاي الخدمه عدنه والعزم منطينه
احسين ..خيمتنه الجبيره نعتني الوالينه
گدها عدنه احجايه
طلعت... المشايه
*
اتحركت كل المشاعر بدت دكات الكلب
گالو ....نعوف اربعينك بالمنع سد الدرب
شما يمنعونه نجيلك زحف مجنون المحب
والعشك لحسين واجب منهو كايل مستحب
عالعهد وفايه
طلعت المشايه
****
امفتح البيبان والله والتنافس بالكرم
والملائك حيره وكفت شافت العز والخدم
مايهم.... بالأف زاير ضيف ورافع علم
والمعزب ناده جاره اتفضل ويانه الشهم
بالكلب شرايه
طلعت المشايه
،****
احتارت ويانه المواكب شنهو تنطي الزاير
تامر وتنهه علينه وعلي صار وحاضر
ماكو واحد بينه كاعد كلشي خادم صاير
واليضيف هذا زاير وجهه ابيض باچر
كلها الك عنايه
طلعت المشايه
*
هاي يا محلى تجاره شوف قيمة هالصرف
باچر الزهره توفي اكثر واكثر ضعف
والصرف منكم تسدد باچر يزود الألف
كلشي يم الزهره حتما بالوجه صار العرف
والخدم چن ايه
طلعت المشايه
****
نحسب احساب اربعينك والدمع لجلك همل
انت خيمتنه الوحيده بيها يلتم الشمل
بيوتنه عفناها تدري حضرت تمشي الاهل
والكلب يخفك دخيلك انت بوسكينه الامل
والوجوه امرايه
طلعت المشايه
*
تمت بعون الله
خادمكم...... يوسف عباس الفتلاوي
يارب ارزقنه المشّايه
ــــــــــــــــــــــــــــــــــــــ
احسين الخير واشگد حلوه ايامه
بعباية فاطمه ايغطّون خدّامه
زينب تقره مجلس واحنه لطّامه
وعبّاس ايهوّس بالرايه
ــــــــــــــــــــــــــــــــــــــ
وعشرين ابصفر من أعظم الأجواء
ترجع من سبيهه زينب الحوراء
و حتما بالـمواكب تحضر الزهراء
نعمه امن الباري امودّايه
ــــــــــــــــــــــــــــــــــــــ
قد قامت مواكبنه الحسينيه
الى طف العشق بالأربعينه
عله الاقدام نمشي ونقره لطميه
وللمهدي اجنود اووفايه
ــــــــــــــــــــــــــــــــــــــ
مولاي ونعرفك ماتسد بابك
واحنه انصارك الزوار واحبابك
يخنگنه الحنين ونشتم اترابك
والروح اتصير امدمّايه
ــــــــــــــــــــــــــــــــــــــ
اهلاً بيك زاير لـمن ايگولون
الدمعه انعوفهه ونبچي عليك اعيون
وچم عابس الصار ابخدمتك مجنون
وبحبك ظل هايم رايه
ــــــــــــــــــــــــــــــــــــــ
هنياله التوضّه ابصحنك أو صلّه
وروحه بالحسينيّات متصله
الزارك ياحسين ايزور عرش الله
ويصعد بالحب بايه وبايه
محمد الجماسي
#حان_المشي
حان المشي. للأربعينيه
حان المشي. والرايه شيعيه
.........
يالله ياشيعة علي كلكم غياره
بيا علي تحزّموا طلعو للزياره
رفعوا رايات المشي بعلو المناره
بيكم المذبوح يعلن انتصاره
بهذا الدرب. كل حاجه مگضيه
حان المشي. والرايه شيعيه
.........
غيره بيكم من طلعتو زغار وكبار
نزلت الأملاك تحرسكم يزوار
ثوره ممشاكم نحسبه ونتو ثوار
ما تهابون المنايا مثل الانصار
شيعة علي. كلكم فدائيه
حان المشي. والرايه شيعيه
.........
وبرغم طول المسافه ما تتعبون
غيرة الانصار بيكم عابس وجون
لا يهمكم حچي العاذل واليبغضون
زيدوا اصرار بمشيكم خل يموتون
من كربله. الصرخه السماويه
حان المشي. والرايه شيعيه
.........
عالدرب خدامكم تنشد عليكم
شتاگوا لشوفتكم وهيبة مشيكم
موكب بصف موكب يخدمون بيكم
الله يتقبّل سعيهم وسعيكم
كل الخَدَم. خدمتها مرضيه
حان المشي. والرايه شيعيه
.........
بهذا ممشاكم تواسون السبيه
زينب الرجعت تون للغاضريه
تشكي آلام السبي لَبِن الزجيه
تگلّه يبن امي دريت شصار بيه
زينب اجت. مهضومه مسبيه
حان المشي. والرايه شيعيه
.........
المهدي يالزوار لاشك يمشي مشاي
يمشي ويصب الدمع يتحسّر هواي
ادعوا للمهدي يزوار الفرج جاي
ياخذ بثارات جده الماشرب ماي
يفني الظلم. والدوله مهديه
حان المشي. والرايه شيعيه
سيد زيد الفحام
_________
تعليقات
إرسال تعليق