📜 القصيدة: شكراً يا خدام حسين
🎤 أداء: مسلم الوائلي
🖋 كلمات: عباس طالب السعيدي
~~
شكراً يا خدام حسين
.. انتم دللتوا الزاير
~~
رايتكم فد رايه .. خدام ومشايه
وتسوون اقرايه .. حي الله الخدام
وبهل الاعزوبيه .. رجعتوا الترجيه
حررتوا المسبيه .. وذليتوا اهل الشام
ملگاكم ما يشبه ملگه
وتشبگون الزاير شبگه
والعاشگ يتسودن حگه
مثل النجمه بوجه الليل
.. الخادم طير وطاير
~~~~
قانون اهل الخدمه .. المو خادم مو زلمه
الله انطاكم نعمه .. وگتوله مشكور
خيمتكم مو خيمه .. ترست حته الهيمه
واليمكم ذب ضيمه .. يرجع ما مكسور
خطار حسين تعشگونه
والزاير حجي اتسمونه
حجك مبرور اتلاگونه
شلتوا الزاير مثل الشيب
.. الفوگ الراس وداير
~~~
جبريل الحياكم .. بجناحه وشالاكم
وبصوته اتلگاكم .. اهلاً يا مشاي
شكراً يا وفايه .. دللتوا المشايه
الينطي حسين هوايه .. ينطيه الله هواي
حيرتوا الما لم اسماطه
ويعزب حته البگماطه
خيطتوا المجروح اخياطه
حاتم منكم ظل يغار
.. انتم حيرتوا الحاير
~~~
حبيناها السفره .. حب من اول نضره
خدام ابن الزهره .. وترفعون الراس
كل عام الله يعيده .. واكثر خير يزيده
واليرفع جف ايده .. تترسها ام عباس
واليخدم من گلبه بغيره
كل عام الله يكثر خيره
محبوبه حسين ومو غيره
هو الشايل حب حسين
.. الطاهر وابن الطاهر
~~~
حته الصاحب شيبه .. تراب الخدمه يحبه
روحه بگد ما طيبه .. تلگاه يرجع شاب
حته الجان محدب .. يعدل ظهره الموكب
معروف الگلبه يحب .. لو بهدومه تراب
واحدكم يشفه من التربه
والراسه ابيض يشبه گلبه
صحبتكم هيه اجمل صحبه
عالقدمتوا مشكورين
.. انصيح اليوم وباجر
°°°°°°°°°°°°°°°°°°°°°°°°°°°°°°°°°°
• قصيدة : شكرا ياخدام حسين • أداء : #مسلم_الوائلي • كلمات : عباس طالب السعيدي • هيئة 313 الحسينية | 1444هـ • المكان | العراق - ذي قار
تعليقات
إرسال تعليق