الرادود السيد عباس الشلاه
عمه يا علي السجاد .. صاحت زينب الكبرى
لابن امي حصل دفان .. يو لا ظل على الغبره
عمه يا علي السجاد .. لخويه ما حصل دفان
يدفن جثة ابن أمي .. وعلى الزهره يسوّي احسان
ما شفنه يظل ميت .. ثلث تيام على التربان
ما واحد تدناله
وعن حر الشمس شاله
عفت الولي بهالحالة
اخته ولاج گلبي عليه .. وگلب الأخت شيصبره
يا عمه عادة المچتول .. يدفنوه ما يظل مرمي
وخويه على الثرى عفته .. مطروح وكثر همي
مهو ابن أمي وچنت بحما .. عمت عيني على ابن أمي
رحت ميسره وعفته
وبگت فوگ الثره جثته
ما يدري اشجره على اخته
فگد وليانها وعزها .. وشماته ومبعد المسره
يعمه الله يساعدني .. حگي لو كثر ونّي
يعمه حسين ابوك يريد .. حفظ العايله مني
وانت من الظهر للساع .. يا عمه غبت عني
غبت عني ودليلي انعاب
وصحت وين ابن اخويه غاب
يعمه الغيبتك أسباب
وهسا جيتني تعبان .. چنك جاي من سفره
يعمه من الظهر للساع ..گلي چنت غايب وين
سمعها وهاجت احزانه .. ودمه سالت دموع العين
ناداها غبت عنچ .. رحت يم جسم ابوي حسين
رحت الوالدي شفته
ثلث تيام فارگته
يعمه ودفنت جثته
ورضيع البالسهم مفطوم .. وسدته على صدره
واخبرچ بعد يا عمه .. دفنت انصار ابوي حسين
كلها وكل اهل بيته .. وعساچ انشاء الله تأمنين
وزينب سمعته وصاحت .. علي الأكبر دفنته وين
تدري بوالده يحبه
شباب وفرگته صعبه
يگلها ونمرد گلبه
علي الأكبر يعمه صار .. يم حسين أبو گبره
وزينب سمعت وصاحت .. انشدك يا علي نشده
يعمه عادة الميت .. يصير على الترب خده
شلون ادفنت ابوك حسين .. يعمه وراس ما عنده
يسمع عمته وهل دمعه
وثگل عمه ولزم ضلعه
ويگلها واختلف وضعه
يعمه بدال خد حسين .. صار على الترب نحره
إلتوت وتحسرت زينب .. وصاحت والدمع يجري
عمه يا علي السجاد .. ضاج من الهضم صبري
انشدك عن ابو فاضل .. اخوي اللي كفل خدري
شلعت السهم من عينه
دفنت وياه چفينه
يعمه الجود چاوينه
اجيت وما جبت وياك .. جوده ورايته الخضره
عن راية بدر هاشم .. وجوده لا تنشديني
يعمه بعلتي وصواب .. حامي الظعن خليني
شفت عينه وچفينه .. بعيني ولا عمت عيني
ومع ضعفي وعظم گيدي
ادفنت حامي الظعن بيدي
وصحت يا حسرتي زيدي
وزادت حسرتي لاچن .. يعمه اشتنفع الحسره
يعمه اشتنفع الحسرات .. والون والدمع شيفيد
انتي ميسره وآنه .. ابتليت ابجامعه وبگيد
يعمه وبعد ما ندري .. من عدنه العدو شيريد
گولي انذبح والينه
ليش الگوم تسبينه
اشكثر وصه النبي بينه
احفظوا عترتي بعدي .. وهذي حالة العتره
الشاعر : معين السباك
الوزن : البحر الطويل
الموضوع : دفن الأجساد
تعليقات
إرسال تعليق