القصيدة: حِلمْ وَالدة
الرادود: مُحَمَّد الجنَّامِيْ
الشاعر: وسام الشويلي
~~~~~~~~~~~~~~~~
يمه وغلاة عيونك
ضايعه من دونك
بالتراب شلونك
حاجيني يبني
وجهك ذبحني فراگة
انشد و مشتاگة
هم بعد نتلاگة
حاجيني يبني
مهضومة..محرومة..من عندك يغالي//٢
~~~~~~~~~~~~~~~~
يبني هوايه تانيتك
بين ضلوعي خليتك
احلم بيك وايناغيك
گلبي بامنياته
بعدك ماصرت وآنه
بيك اهوايه فرحانه
ويوم الجيت صار البيت بعيوني اشحلاته
ما اشم الهوه يبني
خدك چنت اشمّه
واحسب يا وكت تحچي
حتى اتگلب يمّه
بعدك بالمهد وآنه احلم انته زلمه
حلم انته وما دام الحلم//٢
ذاك الحلم يوليدي ماي طاح امن ايدي
منذبح يا عيدي عبدالله يمّه
ردتك ذخر وبالگبر عكّازه
تمشي بيّه اجنازه عبدالله يمّه
ما ادري يا ذخري ابقى ابلايه والي//٢
~~~~~~~~~~~~~~~~
اگعد آنه واجروحي
روحي اتعاتب بروحي
ها يا روح بس النوح
عمري المن اريده
لا ميته ولاعدله
العيشه بفرگتك ذلّه
ونّ الليل هدّ الحيل يبني أمّك وحيده
ما اندل بعد دربي تتعثّر مشيتي
اگعد بالشمس يبني ولا ادخل لبيتي
ابجيلك يعبدالله حد ساعة منيتي
هدم حيلي .. فگدك يالولد//٢
كل ما تغمّض عيني صوتك ايناغيني
واگعد ويرميني سهم المصيبه
گد ما احن بغيابك اشِم عطر اثيابك
ماترد يالصابك سهم المصيبه
ابچيلك واشكيلك من ضيم الليالي//٢
~~~~~~~~~~~~~~~~
الماي شما اشوفنه
گلبي يسولف ابونّه
انته اهواي ردت الماي
ما ضگته يويلي
وآنه شلون يالغالي شرب الماي ينهالي
أشرب نوح يالمذبوح والجمره بدليلي
گطعولي العمر يمّه من گطعول وريدك
اصرخ يابمتت ظامي دمعاتي شتفيدك
ها يالبالگبر نايم اگعدلي اريدك
آنه خلافك مكسورة ظهر//٢
يالردتك اتباريني
ابلا ولي مخلّيني
إگعد وتچّيني ما اگعد امشي
اعتب عفتني وحيدي
ولو گمت يوليدي
على الحايط ايدي ما اگدر أمشي
ها يبني جاوبني چا وينه دلالي//٢
~~~~~~~~~~~~~~~~
محنيّه بسبب فگدك
فارغ بس اهز مهدك
واحچي وياه دمعه وآه
والحسره اعله طولي
ابچي وما گلت كافي
هسّه بيا گبر غافي
وين الچان بالأحضان غافي وبيهِ الولي
ما ابطّل دللولك لا يبني اعله بختك
اوگع وگعة الميته من اذكر ضحكتك
چا شيصير انا بحالي من اتخيل رگبتك
يعبدالله عاميني السهم//٢
متعمده أهيج اجروحي
ومن ونيني ونوحي
بلكي تطلع روحي چا شنهو عمري
شو طوّلت يا موتي
ما وصلّ لك صوتي
حضّرت تابوتي چا شنهو عمري
مشتاگة ونتلاگه لو حان ارتحالي//٢
~~~~~~~~~~~~~~~~
✍🏻https://t.me/bk_mj_96
~~~~~~~~~~~~~~~~
تعليقات
إرسال تعليق