كعدة السجاد ١٤٤٤هجرية
ثورة هداية ياعلي السجاد
أيام حزنك على القلب تنعاد
انته صنعت ثورتك من حزنك ودمعتك
ثورة هداية ياعلي السجاد
--------------------
تشوف كل إنسان يكضي بالحياة ايام عمره
واحد بسعيه وكفاحه يحصّل من العمر ثمره
واحد بنوم وسبات بلا فوائد يمر دهره
ذاكه الشخص فاز وعبر حصّل نتائج بالدهر
أوجد لأيامه أثر بيهن الوادم تذكره
وزين العباد بدمعة عيونك
ظل البشر مصلح يذكرونك
خير صنعت لأمتك من حزنك ودمعتك
١----------------
أصبحت مرمى السهام ودارت عليك النوايب
بدم ابوك السيف يكطر وصحبه ورجال الغوالب
عين أميه عليك ظلّت كل فعل منك تراقب
ما بين حزنك والدمع وتكليفك وذاك الوضع
قررت صوتك يرتفع ثورة وتنول المكاسب
تصنع الدمعه ما يصنعه السيف
عندك ارادة وحكمه بالتكليف
وتفجرت محنتك من حزنك ودمعتك
٢----------------
دورك تعرّف الأمه الخير وتحرر اديها
وعلى الينفعها ويضرها تفهّمها وتدليها
تنتهج درب الرسالة وتمحي داء الجهل بيها
وأسلوبك النافع وصل للناس وبدأت العمل
واصلت سعي بلا ملل تعلّمها وتراعيها
دستور إلها بدمعك كتبته
منهج عمل للأمه حررته
صفحاته من سيرتك من حزنك ودمعتك
٣----------------
أمل عندك جيل ينشأ يفتهم معنى الإرادة
بعقله يتفهّم مصيره ويبدأ بخدمة بلاده
مو بسيطه على الواقع يا علي دور القيادة
دورك لإنقاذ البشر دورك تصد عنها الخطر
يا علي تحديت القدر وعازم تنول الشهادة
تراعي وتريد الأمة تتفهّم
بالمعرفة والعمل تتقدم
إلها نشرت حكمتك من حزنك ودمعتك
٤-----------------
آل أمية انگلب شرها وكل مفاسدها عليها
وعجزت تبرر فعلها وبني الأمه تحتويها
وظلت الثورات تهدم كل حلم بالحكم ليها
الما يعمل بذمه وعدل باچر بفعله ينسأل
البالظلم يتعزز يذل العزة چذبه يعيش بيها
انته الحظيت بحب شعب ثائر
نهر المحبة يجري للحاضر
ما تنتهي محبتك من حزنك ودمعتك
٥----------------
يا علي تنسه المشاهد عينك وشافتها هيه
الصار بيكم يوم عاشر من ألم بالغاضرية
نظرت عماتك تلوذ من السلب من آل أميه
وخيامهن نار أصبحت متون اليتامى تجرحت
رجال العشيرة تذبحت وأصبحت فوك الوطيه
كل موقف سنين وبقه بصدرك
ما گدر يمحيه ياعلي صبرك
تتعذب رويحتك من حزنك ودمعتك
٦----------------
موقف الألّم عيونك ونار خلاها حياتك
شفت تتراكض بين الخيم يالساجد خواتك
تنزل دموع العيون يا علي حتى بصلاتك
موقف يهز قلب الحجر
باقي على قلبك أثر
ما يمحي آثاره الدهر
عاشت وياك الجروح ليوم ما غمّضت عينك
٧--------------
تمت
لطم السجاد ١٤٤٤هجرية
من كربلا ليوم الموت عينك تهل دمعتها
تتذكر أحبابك عينك يالسجاد الله يعينك
عينك تهل دمعتها
-----------------
يالساجد أصوات اليتامى بسمعك
كل لحظه كل ليلة بمراره يفجعك
بالنوم واليقظة تسيل لدمعك
أحزانك لوين التروح إتبعك
كربلا ودم الاجساد تتذكر لحالتها
متفارك عيناك الذكره إحساسك يشعر بالعبره
عينك تهل دمعتها
١----------------
وشلون تنسه موادعك ويه حسين
لمن كعدت ويه الأبو عين بعين
من حزنك جبال الأراضين تلين
وحدك ولا عندك بالوداع معين
ما تركتك هاللحظات ولا غايبه ليلتها
تتذكرها تكول الليلة ودمعك يالسجاد تسيله
عينك تهل دمعتها
٢------------------
ساعة على ساعه تلتهب أحزانك
موقف رهيب تشاهده بميدانك
مثل الأضاحي مذبحه اخوانك
تشوف المواقف صابر بإيمانك
متوذره فوك الكاع سيوف العده تركتها
كل طبره تشوف على الطبره تنظر أحبابك على الغبره
عينك تهل دمعتها
٣------------------
يا ألم تنساه يا ألم ما تنساه
يا علي قلبك حاضره كل ذكراه
كل نبضه قلبك ترتفع بيه الآه
كربلا يرسمها بعيونك تلگاه
ويعيد إلك كل آلام عينك حزن شافتها
ما تنسه الآلام جروحك تتعذب لجل الطف روحك
عينك تهل دمعتها
٤--------------
الأيام صعبة وذكرياتك أصعب
بنار الخيام الروح كلسا تلهب
تذكر رضيع البلمهد يتعذب
بالخيم ما ظل ماي منه اليشرب
عالمشرعه بالآلاف أهل الرده حاطتها
ويتعذب عبدالله بمهده على شفافه الذبلن چالورده
عينك تهل دمعتها
٥----------------
صورة رقية الماتت بأرض الشام
تذكرها قلبك يحترك بالآلام
المجروح قلبه عينك تسهر متنام
وجرح البقلبك من قيود الظلام
رگبتك من قيد اعداك يبن الصبر جرحتها
من چفوفك قيدك ولجدمك ومن جيدك ضل ينزف دمك
عينك تهل دمعتها
٦------------------
تمت
لطم السجاد ١٤٤٤هجرية
ليلك متنام عينك
وتشوف خيام عينك
من يوم الوصية من الغاضرية
ليلك متنام عينك
--------------
يا علي السجاد شصنع بيك الهم
من كربلا عشت العمر تتألم
چن الحزن فوك الجوارح خيّم
دموعك صور عن الجره تتكلم
نار الأحزان ليلك
منظر أبدان ليلك
ظلت عالوطية من الغاضرية
١--------------
تتكلم عيونك كلام لسانك
مطبوعه ظلت كربلا بوجدانك
تراقب چنت احداثها بصيوانك
وصارت محطات الحزن ميدانك
لا عين تهيد بالهم
الأحزان تزيد بالهم
وليوم المنية من الغاضرية
٢---------------
كلما تصد عيونك لعماتك
تتذكر الطف وتزيد آهاتك
يا منظر يهيّج يضل دمعاتك
خايفه وتركض تنظر لخيّاتك
جرحك ما طاب ساعه
يبن الأطياب ساعه
ينزف بالأذية من الغاضرية
٣----------------
چم طفله عينك شاهدتها إنسحكت
چم حره عينك شاهدتها نسلبت
هم شفت سكنه بالسياط نضربت
هم شفت فوك حسين زينب وكعت
جروح والآم كلها
ذيج الأيام كلها
چم طفله سبيه من الغاضريه
٤ـــــــــــــــــــــــــــ
إجتمعت الوادم تنظر على الايتام
وتتلاعب عليها سياط الظلام
غربه وسبي وحسره ودموع والآم
من بلدة الكوفه ولحد ارض الشام
لا رحمه الناس عدها
وحق ينقاس عدها
شگد صعبة الرزية من الغاضرية
٥-----------------
كل المواقف زادت بآلامك
وتحضر صورها المؤلمه كدامك
اللي يعلم بوضعك أبد ما لامك
خلّصت بالهم والحزن أيامك
ظل قلبك نار يلهب
جمر الأطهار يلهب
عالروح النقية من الغاضرية
٦---------------
تمت
كعدة السجاد ١٤٤٤هجرية
يا صبر يطفي عيون الجروح
طول العمر تتعذب الروح
عينك على أحبابك حزنك يدگ بابك
طول العمر تتعذب الروح
----------------
شلون تغفه الليل عينك وشاهدت أفجع مذابح
تنهب خيامك الكوم هذا جاي وذاك رايح
هالمآسي والنوايب ارتوت منعدها الجوارح
وأصبحت أيامك ألم من حركو بنار الخيم
وتتصارخ أصوات الحرم وبالحرب الحسين طايح
هاي الصور يا علي بالعين متروح من عيونك سنين
ترسملك مصابك حزنك يدگ بابك
طول العمر تتعذب الروح
١-----------------
الينجرح بالدهر مره يعاني من جرحه سنينه
يمر بيه الليل يرسم صور آلامه لعينه
وانته چم عزيز عينك ليه تشوف مكطعينه
بعينك شفتهم عالثره أجسامهم متوذره
وظلت صورهم حاضره والقلب ينبض حنينه
جسم الحسين ونحره بالعين
عباس ومكطعه الچفين
لآثار أطنابك حزنك يدگ بابك
طول العمر تتعذب الروح
٢---------------
بيدك انته وسدتهم كلمن دفنته بحفرته
وكلمن تگلّب جروحه بيدك وعاينت جثته
حتى عبدالله الرضيع ياعلي بيدك دفنته
وصّاك ابوك بهالأمر وسّد رضيعي على الصدر
واريته بتراب الگبر والنظر تنزف دمعته
راس الرضيع على الرمح صار
وچفوفه تنظر عينك زغار
والدم على ثيابك حزنك يدگ بابك
طول العمر تتعذب الروح
٣-----------------
شلون تنسه وجه زينب من بعد ما غاب أخوها
شلون تنسه صوت سكنه وبالسياط يعذبوها
تشوف عماتك خواتك يسلبوها ويضربوها
وانته عليل بخيمتك لا والدك لا اخوتك
خيل ورجال الحاطتك وللخيام يحاوطوها
شيكدر العاجز يصنع هناك
بصبرك تدور هناك عيناك
والصبر محرابك حزنك يدگ بابك
طول العمر تتعذب الروح
٤----------‐------
وبطريق الشام عينك تنظر لعمتك زينب
ونار الجروح بضميرك ياعلي كل لحظه تلهب
يا مصاب يحسبه قلبك ياعلي أعظم وأصعب
وكلهن مرارات وحزن منعدهن جروحك تون
تعجز تترجمهن لسن ولو تعدهن ردت تتعب
جروح وبقن للموت وياك
ما فارگن لحظات دنياك
والألم ينتابك حزنك يدگ بابك
طول العمر تتعذب الروح
٥-------------
لو بعض همك يصير على الجبال العاليه تذل
هالسبب تشرب الماي ودمعك على الماي ينزل
تكوم تكعد كل حياتك كربلا لسانك يرتّل
مصيبتها بيك شأثرت الوادم بقلبك مادرت
كلشي بحياتك غيّرت والجروح جروح تشتل
طعم الحياة بطعم الاحزان
ما حمل مثلك حزن إنسان
ما ينشف صوابك حزنك يدگ بابك
طول العمر تتعذب الروح
٦---------------
على فراش وانته تذكر الطف ومحنته
العمر كله ودمع عينك ما نشف من ألم عشته
والدي مذبوح ظامي ياعلي كلسا ذكرته
لمن خلص عمرك ألم
وماناسي نيران الخيم
ولا ناسي صرخات الحرم
لو جبل قلبك يذوب من ليالي الغاضرية
٧---------------
تمت
كعدة السجاد ١٤٤٤هجرية
ثوب الأسود ثوبك واجهت الظلام
يالساجد باسلوبك واجهت الظلام
من صبرك وإيمانك من دمعك واحزانك
واجهت الظلام
-------------------
فترة يبن الهادي صعبه بين واقعها وحجمها
أصبح الحاكم يزيد الما توانى بسفك دمها
وعينك تشوف الأحداث اللي تصير وتقيّمها
وشتعمل بهذا الوضع يا صورة فكرك يتبع
أسست ثورة من الدمع حزنك الظل يترجمها
ثورة حق عالباطل من صلب الآلام
تنبيه لكل غافل من صلب الآلام
مو يوم ولا يومين ثورة بدمعات العين
واجهت الظلام
١------------------
كلمن يفسّر أفعالك يبن خير البشر صوره
خصمك يشوفه اعتزال للسياسه وكل أموره
وادم تحسبه تقيّه من نظام انعرف جوره
بغايتك أكثر من بُعِد حزن وعباده تعتمد
تحفظ ردت درب الرشد وترشد الوادم لنوره
تحفظها بأفعالك أفكار الإسلام
تنشرها بأقوالك أفكار الإسلام
دورك لا مو عادي تمثّل روح الهادي
واجهت الظلام
٢------------------
يزيد راد يسكّت الحق بذبح ابوك وأهل بيته
يطفي أنوار السماء ويخفي حكم العدل نيته
وتبقه بس دولة أميه وتصبح الوادم رعيته
وبكيفه يلعب بالبشر لا وحي يكول ولاخبر
وتاليها أخفاه الدهر وسالفه ظلت قضيته
أيام على أفعاله إبن الشر مادام
ظل لعنه بتمثاله إبن الشر مادام
ودورك ياشبل حسين موجود ليوم الدين
واجهت الظلام
٣----------------
أسست هاي المآتم حتى متموت القضية
وشيعتك بعدك تعيش بهويتها الحسينية
وتنتقل هاي المجالس حتى تصبح عالمية
هاي الأفكار الخيّره لليوم ظلت حاضره
والأجر دنية وآخرة يضل عالزهرة الزجيه
عاشت هاي أفكارك بعيون الأيام
تتفتح أزهارك بعيون الأيام
بلمتنه وجمعتنه بمجلسنه ودمعتنه
واجهت الظلام
٤----------------
هدّمت فكرت يزيد الراد بالشر يثبتها
وعام بعد العام ننظر من دموعك حطمتها
وقلعة الدين العريقة بنور هديك شيدتها
هذا الهدى وهذا الفكر هيهات يوم ويندثر
ليوم القيامه يستمر بالأخلاق الأسستها
عين الباطل تغفه عين الحق متنام
نار الباطل تطفه عين الحق متنام
لا بالسيف ودرعه بالكلمه والدمعه
واجهت الظلام
٥----------------
زرعت بذرة خير بينه وكبرت بجالك البذرة
ومن بعد صبر الليالي بذرتك أصبحت شجرة
الخير بالاحرار يثمر عذب مايه يصير نهره
حسين انذبح لجل الهده وثورته تضل متجدده
الله بالحق أيده لأن لله أهدى نحره
لكن ظلت بينه آثار الآلام
نذكرها تبچينه آثار الآلام
لرب الحق صلينه بهالآثار البينه
واجهت الظلام
٦---------------
حملت نار الذكريات وعشت طول العمر صابر
كربلا أسباب حزنك واليتامى والحراير
يا صبر لجروح قلبك سيدي يكدر يجابر
آلامك رماد الخيم
أحزانك أصوات الحرم
ظلت معاناتك ألم
كل ليالي العمر حزنك يبن الحسين ومدامع
٧----------------
تمت
تعليقات
إرسال تعليق