قصيدة : لاجلك اكتب اشعاري
أداء : باسم الكربلائي
الشاعر : ضياء الربيعي
لاجلك اكتب اشعاري.. واتقرب الى الباري
واترجه انحسب يحسين.. قطره أبحرك الجاري
1
اكتبلك واعرفك زين.. كون وما يحدك حد
ابحر بيك وانت بعيد.. واغرگ بس يجيني المد
سكنت بجرفك وادري.. أمان وأمنت ياسد
متفضل عليه هواي.. وافضالك فلا تنعد
شفتك عايش بروحي.. تلهج باسمك جروحي
شاكتب شاقرا وانت البيك.. تاهت مجمل افكاري
2
شاقرالك اذا القرآن.. بسمك يقرا ويرتل
ثوب العز الك يحسين.. وبس اعليك متفصل
ظامي وماتريد الظل.. بجروحك شمس تنزل
كلشي انطيته والباري.. كلشي باسمك مسجل
تذكره بآخر انفاسك.. يرتل بالكهف راسك
بعت كل ما ملكته وجان.. ربك للنحر شاري
3
اذا ضيعتك شالگه.. انت الاغله والاثمن
عايش الك لو هالناس.. سألوني تعيش المن
عمري ابلا نظرتك خوف.. وبس وياك يتأمن
انت التكشف الكربات.. خيل الهم اذا هجمن
خسران الذي عافك.. والاعمه اللي ما شافك
عشگتك والدليل ادموع.. عيني وحسرتي وناري
4
صعبه ومستحيل الماي.. يطهر من يلاگي الدم
بس دمّك طُهر للماي.. دمّك ينطق ابلا فم
بشسعك لو لمست الگاع.. بيه الگاع تتيمم
التراب الماي صوت الريح.. صله النورك وسلم
يااوسع سفُن طه.. بسم الله مجراها
يمنعني الخجل لو اجيت.. اطلب تقبل اعذاري
5
جبرائيل خادم جان.. يفخر من يهز مهدك
وبموتك نشر ظله.. وحط جنحه تحت خدك
وخادم جان الك عباس.. سمعت بكثر ما ودّك
يجلس جلسة الخادم.. يدنّك لو حضر عندك
جبرائيل يستاهل.. ويستاهل ابو فاضل
لو اقتبس ذرّة نور.. منهم يعله مقداري
6
اتقرب الك يحسين. والكلمات متوافي
ظلمه بنص محيط وموت. وشينفعني مجدافي
نخيتك ياسفينة نوح.. صارت ترجف اطرافي
ماعندي سواك بيوم.. يظهر كل أمر خافي
حاشه بساعة المحشر.. تنساني يبو الاكبر
وما ترضه افترگ عنك.. ويصير الشمر جاري
ليلة 21محرم 1444هـ
موكب وحسينية ام الحسن (ع)
البصرة_الفاو
تعليقات
إرسال تعليق