*مجيء الامام زين العابدين عليه السلام إلى كربلاء لدفن الأجساد وملاقاته بي بني أسد*
الأسديه اتحاشمت نسوانها...جايه تدفن غريب أوطانها
اشلون اجت نسوانها امهتكه الستور...اشلون عبره اوهايجه ابذيچ الصدور
اتشوف حرّه ناشره منها الشعور...اتشوف مخموره اتعمت بردانها
بالردان اتعمت ويلي اشحالها...الشدّة اللـهفه اتعثر بـذيالـها
اتگول من شان الدفن لرجالها...والمـناحه للنـسه مـن شانها
عار والله اعله الزلم للحشر عار...الجار للجار العرب تكرم الجار
ليش مرمي احسين اله ثالث نهار...او صحبته امن اكهولها و شبّانها
شالت الماي و تحت امن التراب...والزلم من خوفها امعچفه ارگاب
من كثرعار النسه و عظم المصاب...صارت النخوه و بچه ديـوانـها
من تناخو گالو اشبعد الصبر...هاي ذلّـه و عارها مدّ العمر
كون باچر نـنّشد شهنو العذر...انصير گاله للعرب بلـسانـها
اتناخت اوجوه الزلم واتحزّمت...أربعين امن العشيره اتلازمت
اشتدّت اعتدّت صدگ واتوزّمت...شافت العار ايـغـلب بـجـنانها
مشت من كثر الحيَه و گحمت الخوف...اولحگت ابجمع النسه ابوادي الطفوف
گالو اتردّن خـطـر بيـها نـشوف...انحاذر امن ازيادها و مـروانـها
گالن اوياكم نساكم رايحه...احسين مرمي و لابچه و لا صايحه
النايحه زينب او وين النايحه...اميسّره الحرّه ابحكم عدوانها
عيّن اوجمع اوجمع صارن سوه...لگو مصرع والثره ابدمها ارتوه
امغبّره بتراب من سافي الهوه...امغيّره ابحرّ الشموس ألوانها
حطّو اربيّه حذر من شر يزيد...التمّو اهتمّو عله دفن الشهيد
صعب شيله اودفنته عنهم بعيد...جبل وتـزلـزل ثجيـل اوزانـها
بين ماهم بالملامه اوبالجدال...طلع راچب گال شنتم يالرجال
اتفرّقوا عن الجثث يمنه و شمال...طايره مـن شـر أُميّـه أذهانـها
گال شنهو اوگوفكم يم الأجساد...كون بينولي الصدگ شنهو المراد
گال آنه ايمامكـم زيـن الـعباد...واسفر الهم من وچاد ايمانها
گالو احسين انتخينه الدفنته...ابكل جهدنه اولا گدرنه الجثّته
لا مواراته او لا من صحبته...الضايعه تحت الذواري أبدانها
گال احفرو اهناه والدفنه تهون...ابنوح مستعبر دمع تجري العيون
گالو ابلايه غسل ندفن اشلون...بلچي يروه امن الغسل عطشانها
گال هاذ الراي حگ لاچن الراي...ناشدوني هاي عنها النرك هاي
لو فرضنا ايحصل للتغسيل ماي...وين شـو كافـورها و چـفانـها
شگّو الگبره وجِه والدمع كات...شال أبوه اشلون اله صبر و ثبات
صاح ريت الموت يعدمني الحياة...اشلون أشـوفه امعـفّر ابتربانها
يا بني سد حطّو الأكبر يم أبوه...هاذ أخوي احزام ظهري وانه أخوه
هاذ الـمـغـبّر اوجـوه الحاربـوه...اشكثر جندل بالوغه امن أعيانها
والأصحاب اهناه من عنده جريب...خلّو دفنـهم سـوه شابٍ اوشيب
خلّو مفرد بس ابن ظاهر حبيب...الطلّگو دينه اوحـظه بجـنانـها
او بعد عباس البطل بالمشرعه...الجثّته ابحدّ السيوف اموزّعه
اشلون مصرع شبل حيدر مصرعه...امگطّعه اچفوفه الفنه جيمانها
*الشاعر المرحوم الشيخ عبدالأمير الفتلاوي*
▪️قصيدة لطم
دفن سيد الشهداء (ع)
كآصَفَ جِئتُ مِنْ سِجْنِ البَلاءِ
لِدَفْنِ العَرْشِ في أَرْضِ السَّماءِ
دَعُوني يا بَنِي أَسَدٍ دَعُوني
مَعِي طٰه وأصْحابُ الكساءِ
١/عُيونُ الكَوْنِ لا مَا أطبَقَتْ جَفْنا
فـوَجْهُ اللهِ ثـَــاوٍ لَمْ يَنَــــلْ دَفْنـــا
أتَيْتُ..وَخَلْفِيَ العلْيَا هَوَتْ حُزْنــا
وأَرْسَلَ ربُّها "أسْمَاءَهُ الحُسْنى"
إمَامٌ لا يُواريهِ العَوَامُ
فقطْ في الخَلقِ يدفنهُ الإمامُ
وعَنْكُمْ غابَ مَا شَهِدتْ عيوني
مَعِي طٰه وأصحابُ الكساءِ
٢/هُنا بَيْنَ السُّيوفِ وتحْتَ أحْجارِ
نظرتُ إلى الحُسينِ بجِسمِهِ العاري
سَمِعْتُ دُعاءَهُ مِنْ نَحْرِهِ الجاري
إِلٰهَ العٰــالمـــينَ اغْفِرْ لزُوّاري
وقبْري..ليسَ لي يَا ذَا المعارِجْ
ألا اجْعَلْهُ لأصْحَابِ الحَوائجْ
أتاني الإذْنُ في الدَّفنِ..اتركوني
مَعِي طٰه وأصحابُ الكساءِ
٣/رأيْتُ الطَّفَّ صَارَتْ أرضُهُ (طُورا)
وَنزْفُ السِّبْطِ سَالَ على الثَّرى (نُورا)
وإذْ قبرٌ تـَــراهُ العَيْنُ محْـــفورا!!
وفيهِ أحْمدٌ قَدْ ناحَ مفطورا...
رَسُولُ اللهِ قَدْ شقَّ الحفيرهْ
يرشُ بها مدامعهُ الغزيرهْ !
صرختُ فلمْ تزلْ جمراً شجوني
معي طٰه وأصحابُ الكساءِ
٤/دنَوْنَا نُنْزِلُ الأَوْصالَ في اللَّحْدِ
كأنَّ الذِّكْرَ يدْفنُ سورَةَ "الحَمْدِ"
بأُذْني قَدْ سَمِعْتُ المُصطفى جدِّي
يوسِّدُها ويدْعو "الثَّارَ يا مهدي"
وَلَكِنْ أيْنَ "بسْمَلَةُ" الْكِتَابِ؟!
أفِي طشْتٍ تُرى أمْ في الحِرَابِ؟
مصَابُ الرأسِ قَدْ أدمَى جفوني
معي طٰه وأصحابُ الكساءِ
٥/ولا أنسَى نحيبَ المُجتبى يُرْفَعْ
أتاني حاملاً فِي كفِّهِ "الإصْبَعْ"
وفَاطِمُ في أسَاها تذْرِفُ المَدْمَعْ
دنَتْ بالقلْبِ فيهِ السَّهْمُ لَمْ يُنْزَعْ!!
وحيدَرُ ناحَ مكروباً عَلَيْهِ
أتاني حاضِناً كِلْتا يديْهِ
مشاهِدُ ليسَ تُنسى للمنونِ
معي طٰه وأصحابُ الكساءِ
٦/بَكَيْتُ لصَوْتِهِ نَادَى من النَّحْرِ
و"عبـدَاللهِ وسِّـدْهُ على صَدْرِي"
أبي..تاللهِ هُدِّمَ يا أبي صبري
فأيْنَ الصَّدْرُ يا أبتاهُ لا أدْري!!
لَقَدْ شاهدتُ خيلَ الأعْوجِيَّهْ
تدوسُكَ يا غريبَ الغاضريَّهْ
فليتَكُمُ هُنَـــا لَــوْ تدْفُـــنوني
معي طٰه وأصحابُ الكساءِ
علي عسيلي العاملي
للدفن
.
.
يــابنــي اســد .. صـاحب الجسد .. التدفنونه
صدره منطحن .. خوفـــي بالدفن .. تلچـمونه
انتو جيبولي حصيره
وانه انــزله بالـحفيره
يابني اسد
--------------
ادري محتارين جسم حسين بيمن ينجمع
چيه امطشر عالتراب اهنا ظلع وهنا ظلع
اليبچي لينزل دموعه على نحره المنگطع
المنذبح كلـــشي يلچمه حتلو قطرة دمع
اليهــوه عالثره .. المفترض تره .. يتــركونه
بمنحره نغرس .. حافر الفرس .. وتشوفونه
المحنته كلش چبيره
انه انزله بالحفيره
يابني اسد
--------------
يلله خنـــلم جســـم ابويه الي توزع عالثـــره
اوصـاله اخــذتها الحـــوافر كل مكان مطشره
الخيل من سحگت ابويه اهناكه رجعت ليوره
والمكان الخـيل نمشـــي بلكـــي نلگه خنصره
بحرگه وبهظم .. مابقــه عظم .. تره سالم
ماكو اي عضو .. صاحي بالابو .. يهالوادم
لملمو الماله عشيره
وانه انزله بالحفيره
يابني اسد
_______
ابــــين مذبح نحر ابويـــه وبين دفنه خطـــوتين
ابهالمسافه وگـع منــــي جســـم ابـــــــويه مرتين
اونين اسمعه بصوت خافت وگمت ادور عالونين
اتقربتله ولنــــه هذا الـــصوت مـــن نحر الحسين
يمكن انلچم .. موضع السهم .. من احملته
ينزع صــعب .. غافي بالگلب .. ولاشـــفته
العالارض بدو عبيره
انه انزله بالحفيره
يابني اسد
--------------
لمن الحــفار گلـــــي خلصـــت هـسه حفر
روحي احسها گام تطلع والنفس گوه اجر
لملمت كل قوه بيه وحـزمت ظهـري بصبر
مدري چم طيحه طحتها انه يم باب الگبر
بالگبر طحت .. انه من صحت .. يمذبوحي
امنيتي من اون .. هسه اندفن .. بلا روحي
لوعة الوالد چبيره
وانه انزله بالحفيره
يابني اسد
--------------
اليدفن الميـــت يوســد خده كون اعله الترب
بجسم ابويه راس ماكو شلون اوسدنه صعب
ولدي مگطعــين جسمــه وذابل ابگــد الظرب
انه كل ماتچي جســـمه على وجــها ينـــگلب
گلبي باللـــحد .. ويلي مـنمرد .. عـلى الغالي
يوجع الحصل .. والدي وصل .. صفه اگبالي
ناظري المن اديره
وانه انزله بالحفيره
يابني اسد
--------------
حيدر تركي الكربلائي
دفن الأجساد الطاهره
لسان حال الامام السجاد عليه السلام
حسين الغالي. عفته موذر. ينزف دمه
جيت بدمعي للطف اعثر. ادفن جسمه
ودفن جميع احبابي ونحب يمهم
.........
آنه شفت بعينـي مقتل والدي حسين وتوذّر
وذبحت اخواني وعمامي. ظلوا بلا دفنه بالبر
بلا دفن ظلوا ضحايا. تلث ليالي نومه بالحَر
جيت اواري اجساد اهلي والگلب ذاب وتفطّر
شفت بعيني. حال حسيني. جسمه مگطع
ذابت روحي. بنار جروحي. وسيل المدمع
ودفن جميع احبابي ونحب يمهم
........
شلون اشيل حسين ابويه. بالسيوف امگطعينه
لو شلت من چتفه يوگع. ثاني چتفه امهشّمينه
لملمت جسمه بحصيره. وشلته بدموعي الحزينه
للگبـر نـزّلتــه بيـــــدي. وسمعت صوته وانينه
وسّد طفلي. يبني بصدري. من تدفنّي
قرّب بيدك. نحره لنحري. خل يشبگني
ودفن جميع احبابي ونحب يمهم
......
من شفت جثّة عضيدي مگطعه وينزف وريده
هذا اخوي حزام ظهري. موذّرينه وبيش افيده
اشعر بحيـلي تهـدّم. بعده من يلزمني بيده
ياعضيد المثلي يحفر. مرقد لجثّة عضيده
احفر گبره. ودفن جسمه. هذا الأكبر
كاسر ظهري. جرحه ودمه. وگطع المنحر
ودفن جميع احبابي ونحب يمهم
......
وهذا عرّيس الهواشم. جاسم الضحّه بشبابه
اتحنّه من دمه وتگطع. فجعوا الهادي بمصابه
احفرت گبره ودفنته. بلامته ودرعه وثيابه
ريحة المسموم عمي. ظلت اتفوح بترابه
ضحّه بعمره. لخاطر عمّه. ونصرت دينه
هذا القاسم. خلّد اسمه. بدم اجبينه
ودفن جميع احبابي ونحب يمهم
......
ثلّة الانصـــار صرعى بس جثث تنزف شفتهم
هالنشامه بحفره وحده. بدمعتي التجري ادفنتهم
ذوله انصـار العقيـــده. بالمدامع ودّعتهم
واحد وسبعين بالطف. فتية الحق سجّلتهم
يوم العاشر. ما عافونه. وفّوا كلهم
لبن الهادي. ضحّوا دونه. الله يحبهم
ودفن جميع احبابي ونحب يمهم
......
للگمر عباس عمي اعثر بجدمي اعتنيته
بلا چفوف ودمه يجري. عالنهر طايح لگيته
وسعّت گبره ودفنّته. عالشريعه العالي صيته
ياكفيل الهاشميه. عهدك وياها وفيته
زينب بعدك. ما رحموها يا كاغلها
صاحت وينك. من مشّوها بلا محملها
ودفن جميع احبابي ونحب يمهم
سيد زيد الفحام
________________________________________
جرحي جبير وتجري العيون بويه
وما ادري بيدي ادفنكم اشلون. بويه
ما تنحمل فركتكم
متحير بدفنتكم
*****
اجيتك والمسافه اجروح. وشوفن جسمك اكبالي
وذكرت اشلون بالعاشر يبويه ركضت عيالي
بحركه تواعديت وياك. وبجي ودمعتي اتلالي
تره الفاكد عزيزه ايموت. اشلون اليدفن الغالي
انه علي السجاد احاجيك. بويه
اشلون الحوافر داست اعليك. بويه
ما تنسي لوعتكم متحير بدفنتكم
****
اليدفن بالتراب اعزاز. تضل بهدومه ريحتهم
وانه الفاركتهم حيل. كسرت ضهري فركتهم
كمت احفر بديه اكبور وون وبجي المصيبتهم
اشلون انسه المشو عني. وتهون اعليه عشرتهم
للطف اجيت وصرت دفان. بويه
ويه الابو امفاركني خوان. بويه
روحي تره اشتاكتكم
متحير بدفنتكم
****
كمت اتعثر بممشاي. ورحت للمشرعه بهمي
درت يم النهر عيني. ولكيت اعله النهر عمي
اشلون اسحب سهم عينه. حرت والحاله تهظمني
كون ابدال جسمه اهناك. تكطع عالنهر جسمي
شلته بديه وطاح مرتين بويه
عمي الكمر ما عنده جفين. بويه
تجوي الكلب جمرتكم
متحير بدفنتكم
*****
تره الفاكد اخوه يا ناس. كلش ينكسر ضهره
وانه فاكد علي الاكبر. اخوي وكلبي شيصبره
للضيج الاخو ينراد وترد روحي امن اشم عطره
عافاني اخوي وراح وكسرتي بفركته كسره
كل ساع اطيح وناري تسعر. بويه
واشلون اودع راح الاكبر. بويه
راحت صحت لمتكم
متحير بدفنتكم
***
رحت يم جاسم العريس. وردت بجفوني ادفننه
شفته مخضب بدمه. وبيده يبست الحنه
لكيته اعله الترب مطروح. وحرت اشلون اشيلنه
يا بويه صحت كلبي. ما ينطيني اودعنه
ياهو الادفنه الليله محتار. بويه
بالقاسم ابدي لو بالانصار. بويه
تلجم تره امصيبتكم
متحير بدفنتكم
****
رحت يم الرضيع بشوك. وبنص النحر بسته
لو عندي يبويه اكماط. جان بجفي كمطته
عبد الله زغير اهواي. ليش النبله ذابحته
والهظمه الجبير اشلون. فوكك بويه وسدته
ضليت اصيحله دللول. بويه
فوك الترب نايم يمدللول. بويه
تكتل صحت غربتكم
متحير بدفنتكم
****
تمت
تحسين الخفاجي
نعي الى الدفنه
****
بيدي ادفنتهم. انه اعزاز الكلب بيدي ادفنتهم
من ودعتهم. ودعت العمر من ودعتهم
ناشدتهم. بدمع عيني الجفوني ناشدتهم
وتذكرتهم. اجيت الكربله وتذكرتهم
رحت صوب النهر ودموعي تجري
وعالعباس حيل انكسر ضهري
مدري المن اسولف ضيمي مدري
حنين وفوك صدره لحط صدري
كتله اكعد يعمي وتجري عيناي
جايبلك سلامي امن السبي وجاي
زينب بالسلام اتخصك اهواي
وتكلك خويه ماريدن بعد ماي
رحت يم جسم ابوي وتهمل العين
وشفت بالخيل رايح صدر الحسين
لميته بحصيره وبيه جرحين
وين انطي الوجه بويه صحت وين
هينه الفركه بويه اعليك كتله
يمن طولك صحت فدوه رحتله
جسمك شو تحرك باوعتله
صحت حسباله زينب خاف اجتله
شلت عبدالله فوكه وسديته
لو صح بيده بويه كمطيته
يبويه اهواي متغير لكيته
حاركته الشمس من كلبيته
رحت للاكبر وناري سريه
وكتله الاخو اشلون ايعوف اخيه
يخويه بفكدك اشسويت بيه
يخويه الفركه مو هينه عليه
للقاسم رحت والونه ونه
شفت عريس جفه ايريد حنه
ما يرجع بعد جسام جنه
دفنته بهظم كلبي وكمت منه
محتار بزمان اهواي محتار
ادفنت بيدي يبويه كل الانصار
بهل اللحضه وذكرت امصيبة النار
الشبت بالخيام وحركت ازغار
تمت
تحسين الخفاجي
تعليقات
إرسال تعليق