آيات الأربعين | باسم الكربلائي كلمات مكتوبة

📜القصيدة: آيات الأربعين

🖋الشاعر: علي السقاي

▪︎▪︎▪︎▪︎▪︎

طفّك مزار النگصده اْو مَنبالي

وَاشياعك اشعدهم مثيلك غالي

آيه اْو انرددها ابنداء العالي

( وَمَا لَهُم مِّن دُونِهِ مِن وَالِ )

باب الله انته ابهالآيه

والمؤمن ايبَيْن ابهايه

اِلگبرك يحِن گلبه اهوايه

اْو عنّك فلا يعدِل رايه

إقبل نجيلك مشايه

اترف ابحروفك چم رايه

مَحله الدرب ، مَحله الغايه

اهنا موكب ، اهناكه اقرايه

العالم يشوف .. كل هالزِحوف

تمشي اتجاه .. أرض الطفوف

▪︎▪︎▪︎▪︎▪︎

نمشيلك اْو ليك النواظر تربي

اْو كل زاير ابإسمك (حُسين) ايلبّي

ابآية عقيده ايگلَّك: اَمشي ابدربي

( إِنِّي عَلَىٰ بَيِّنَةٍ مِّن رَّبِّي )

دربك فلا نِبعِد عنّه

من الله هاي اَعظم مِنّه

يَمعاشرينك بالونّه

مشايتك أُنظر إلْنّه

گبرك إذا نُحرَم منّه

چنّه انحرمنه امن الجنّه

چم عازم اِتخَيَّب ظنّه

اْو خطوه ابطريقك يتمنّه

يدعي ابنحيب .. ابأمن يُجيب

إسمه يكون .. ابدفتر حبيب

▪︎▪︎▪︎▪︎▪︎

نوفي اللي قلّدنا زيارة مولاه

انزورك نيابه عنّهْ اْو ما ننساه

ابهالآيه كل شخص انحرم نحچي اوياه

( وَاصْبِرْ وَمَا صَبْرُكَ إِلَّا بِالله )

حگه ايتأذّه اْو يتأثّر

روحه اعله بُعدك ما تگدر

ابمُر الصبر ظل يتصبّر

وابأربعينك يتحسّر

واحنا التُوَفَّقنه نحضر

ازياره اْو عساها تتكرّر

عن هالضيافه نتشكّر

ما قصَّرِت يابو الأكبر

الشكر الجَزيل .. ابحقك قَليل

يامن هواك .. للرب دَليل

▪︎▪︎▪︎▪︎▪︎

يحسين يارب المشاعر لبيك

نمشي حُفاة اْو للحرم نگصد ليك

آية قُدُس وابكربله اتلوگ اعليك

( إِنِّي أَنَا رَبُّكَ فَاخْلَعْ نَعْليك )

منهو المثِل شخصك قدره

كلمن مشه اْو گاصد گبره

معبودك ايعظِّم أجره

وابكل قَدَم حِجَّه اْو عُمره

واجب نزور ابهالحَضره

لو كل سَنه انزورك مرّه

والما يزورك كل عمره

إيمانه ناقص بالعتره

لو حتى چان .. اِمْن اَهل الجِنان

ايحسبونه ضيف .. ابذاكه المَكان

▪︎▪︎▪︎▪︎▪︎

ما ننسه يومك يا إمام العبره

والما بچالك خل يراجع أمره

مِصداق ذكرك آيه بيها نقره

( قَدْ أَنْزَلَ اللَّهُ إِلَيْكُمْ ذِكْرا )

نَعُوذُ بِالله اْو نفزع

من عين لجلك ما تدمع 

اشلون الذي بسمك يسمع

يبقى اعله حاله اْو مايجزع

يالجسمك الدامي اتگطّع

السر السماوي ابهالمضجع

ابحرارة المقتل نجزع 

نتولّع اْو هم نتلوّع

هاي القُلوب .. خلها تذوب

تحرگها نار .. ذيچ الخُطوب

▪︎▪︎▪︎▪︎▪︎

إنته الحُسين اْو تبقى وجه الرحمن

يالإسمك اِتعلّىٰ اعله عرش الأزمان

مِتسلطِن اْو أسامي زُمرة سُفيان 

( ما أَنزَلَ اللَّهُ بِهَا مِن سُلْطَان )

يالگبرك اِتشامَخ طُوله

اتطوف المَلايك مِن حُوله

واللي يزورك يِدعُوله

ابأجر الزيارة المقبوله

ابهالگُبّه دَعوتنا الأُوله

المهدي يِطالِب بِذحوله

وابدَولة الله المأموله

كلمن إله حگ اينوله

ابحُرگة شعور .. كلما نزور

ندعي الإله .. ايعَجْل الظهور

▪︎▪︎▪︎▪︎▪︎

علي السقاي ٢٠٢٢

محبي باسم الكربلائي

العبرات الحسينية

قصيدة [ آيات الأربعين ] أداء: الحاج باسم الكربلائي كلمات: علي السقاي التوزيع : ميشال فاضل الهندسة الصوتية : EDOUARD MEUNIER إخراج محمد عادل البلوشي