قصيدة : طفل رسام
اداء : باسم الكربلائي
كلمات : حسام الحمزاوي
طفل رسام...راسم جزيره
بدون خيام... شمس العشيره
راسم خضار هواي.. وبكل مكان الماي
فوگ الرسوم فياي.. شمس العشيره
1
طفل راسم الطف وسارح اخياله
مدري شلون شايل كربلا ابّاله
اصد اللوحته مابيها خياله
اظن شاف الخيول تصير جتّاله
ماراسم حسين الما بشر شاله
راسم ذهب طايح محد بحاله
لوحته الوان ماعدها ناصر
فقط نسوان ضدهن عساكر
بس ما رسم حوّاف.. ولا دنگن الجتاف
بيها علي ينشاف.. شمس العشيره
2
البالطف طشّروهن ما مطشّرهن
طفل من غيرته بالرسم جامعهن
عبايه بصف عبايه بغيره راسمهن
زينب من رقيه ما تميزهن
مثل عباس ما طلع خيال الهن
بحيث بلوحته امّوت الشمر يمهن
عليهن خاف من الشماته
رسم اوصاف تشبه خواته
ما خله شي معروف.. ميّت عليهن خوف
مثل الصقور اطوف.. شمس العشيره
3
لا خيمه لا رايه لا خوه
حته بلوحته امأكد على النسوه
بالوانه نصرهن اضعف الايمان
راسم سود اميه وابيض الدخان
ماراسم رمح ويشيله جف شيطان
صعبه يشوف اي حب عالرمح قرآن
رسم خيال لابس عمامه
وراه الاطفال كلها بسلامه
راسم سهم مكسور.. يم الشريعه طيور
فوگ العيال اتدور.. شمس العشيره
4
طفل مجنون ما يرضه الخدر ينداس
امبيّن يرسم وگاعد يوزع انفاس
من گد غيرته راسم رسم بأحساس
مخلّي بكل فراغ جفوف ابو النوماس
راسم جيش ميت كله راس براس
وراسم سيف فوگاه ريشة العباس
شفت باحساس.. راسم حنينه
رسم عباس.. شابگ سكينه
ينطيها من الجود.. مابيها شي الزنود
والتشكر المعبود.. شمس العشيره
بطارف ريشته راسم الدنيه ارماح
وجوّه اجدام زينب راسم الها اجناح
راسم نهر ما بي گطره للملاح
وراسم جود يجري سنين للفلّاح
ما راسم رضيع امدنگ السفاح
راسم غيمه بيد اطفالهم تنلاح
جرح ما صار.. شفته ب اللوحه
بقت تذكار.. بيها حط روحه
لوحه ترد الروح.. مابيها شي مذبوح
ولا بيها شي مجروح.. شمس العشيره
6
بآخر نظره اشوف الرسم يتبدل
طاحت دمعة الرسام على المحمل
يمسح بالرسم وبدمعته امبلل
يگول بعيني طايح وين المدلّل
درب الشام حته بالرسم يطول
الله يعينها الراحت على الهزل
يگلي الطاح شلته بديه
رسمتي راح ادفنها بيه
لوحه بگلب صندوگ.. ماتنعرض بالسوگ
بيها گلب محروگ.. شمس العشيره
هاي اللوحه بيها الماي متبدّي
مثل عبد الله من يطلب حلم وردي
ليش تلومني لو طيّنت خدّي
غير حسين دوّر كلشي ماعندي
رسايل هاي للواگف سهم ضدّي
اريده يشوفها من يطلع المهدي
الي ثارات ي التنطي بيّه
بعد هيهات ايدك بأديّه
باجر وراك حساب.. من الخيم للباب
بعده الجرح ماطاب.. شمس العشيره
ليلة 21محرم 1444هـ
موكب وحسينية ام الحسن (ع)
البصرة_الفاو
تعليقات
إرسال تعليق