يامغير عنوان الموت
ومبدل قانون الذبح
دم نحرك من ينزف صبح
شفتك من شفتك عالرمح
نبي
*************1
اشوفك معاجز راح ابديهن من مصرعك
اليذبحك يشاهد تتجمع كلما قطعك
الملائك تنادي مو وحدك كل احنه معك
تگلهم ارجعوا ربك گلك ما اروعك
محبوب يغازل محبوب..انت تگله انطيك الدمه
هو يگلك اخذ السمه.. القدمته لا ما قدمه
نبي
**********************2
عرفتك مهابه الدنيه اطيح ومطيحك
بدمائك تقاتل وتخوف حتى بمذبحك
يذبحك شمرهم والموت بهالموقف ضحك
لأنها المنيه تحييها من تصافحك
انت الماء ومن الماء كل شي حي انجعل
والقاتل هو الانقتل.. نحرك مصحف والدم نزل
نبي
**************3
......
......
حروفك بعرش الخالق صارن نقش
الخيول بثقلهن ما هزن من مجدك رمش
داسوا صدرك ويريدون.. مايبقى من دينك اثر
لكن شافوا اسمك كبر.. والخنصر صار من انبتر
نبي
****************4
العقيله بأديها رفعت جسمك في كربلا
تنادي الهي هذا القربان اتقبله
تجاوب سمائك يازينب يا مية هلا
حبيبي قبلته وانطيته الكون باكمله
ياالكلشي مقدم لله.. گلك شتريد وماردت
غير الله ولاجله استشهدت.. كل طعنه بجسمك جسدت
نبي
***********5
العجائب امامك يتغطن بثياب الخجل
العجيبه دمائك والراس الكص راس الاجل
رمحهم صعدته وبهالصعده الباطل نزل
عجيبه رمهحم يتحمل ثكلك ياجبل
جسمك عفته اعله التربان.. طايح بس ابمعنى العلو
متوذر بس كلش حلو.. شيضيعك وانت بكل عضو
نبي
***************6
الزمان بذهوله ينظرلك يلقطلك صور
ينادي يعالم يتكلم مكطوع النحر
بظلام الليالي زينب من تنظرها بخطر
تنادي عضيدك من رمحك ابزغ ياكمر
لو من ضعنك طفله اطيح.. تتوقف وتوقف الرمح
والزينب عينك تنفتح.. تخبرها وكلماتك جرح
نبي
************7
ياكلشي بحياتي مااريد بدنياي التجي
اريدك عشكتك والامر بيدك والنهي
لكلشي نهايه بس حبك قد حارُ بهِ
واگلهم غرامك يتجدد كلما ينتهي
بس حرفين الحب يحسين.. منك الله الحرفه اقتطف
ومن زينب جبت آخر حرف.. اجمعهن حب ما ينوصف
نبي
************8
ختاماً شسولف انتَ اكبر من المعجزه
يظل للقيامه منصوب لاجلك هالعزه
عظيم وامامك اكبر قوه تظل عاجزه
اليفكر يهزك زينب بالخطبه اتهزهزه
گالت كلمه بوجه ايزيد.. راح انطحنك طحن الرحي
نمحيك احنه وما ننمحي.. والكلمه التحجيها وحي
نبي
كلمات الشاعر
وسام الشويلي
ليلة16محرم 1444هـ
حسينية ام الحسن
(ع) الفاو_البصرة)
تعليقات
إرسال تعليق