اخاف اصيح ياعباس...ليش اليوم عفتوني
زلزل بالشريعه وهد اسدودها
هله والله بشايل علمها وجودها
طالع بالعلم للعلگميه
عساج اصدود ياعين المنيه
هلاهل والحراير بان اسعودها
ـــــــــــــــــــــــــــــــــــــــــــــــــــــ
لفح الهيم مسجّر گلبه
لكن وفّه وذب الشربه
عباس الوافي بوعوده
وافي للمظلوم بحبه
وعده الزينب يملي الگُربه
اضرم بالمسنات وگبّه
يطب الماي معاهد ربه
صعگ ارعود تعاين حربه
خطف بروگ اتعين ضربه
عباس الوافي بوعوده
حذر والشمايل هاشميه
ينادي الموت خل الدور اليه
وبس للماي وصّل...سعد گلبه وتهلهل
ينادي الموت خل الدور اليه
ومن علگ الشعايل سد ادروبها
ومن عين المهابه اتطير گلوبها
تصيدها بنشب وايده نبلها
على اليمنه اليسر شد وعدلها
هلاهل والحراير بان سعودها
ـــــــــــــــــــــــــــــــــــــــــــــــــ
عذب ازلال وفاض بجفه
ورد الغرفه وگلبه بلهفه
شيال الحمل وحماله
جرّد لمعه وصار بجفه
وعافه وروى النفس بعفه
ملّى الجود وشده ولفّه
فوگ الراس البيرگ رفّه
بحر سلاح يموج بجفه
رمحه شراع وسيفه الدفّه
شيّال الحمل وحمّالّه
طف والشوف من عجّه يتكدّر
يشردها ويصيح الله واكبر
عليه الگوم حاطت...من الضربات عادت
يشردها ويصيح الله واكبر
وعن بحر الشريعه صار اشرودها
والصدر المنيه بسيفه ايعودها
وعينه اعله العلم ويه الرويه
طفح بالزود حمّاي الحميه
هلاهل والحراير بان اسعودها
ــــــــــــــــــــــــــــــــــــــــــــــ
فده العتره ووفّه النصره
والمظلوم يهل العبره
والعسكر جاري اعله ضعونه
ويشوفك مخسوف الگمره
ومخ الراس يسيل بحجره
واحتار ابن الزهره بأمره
بيا طيب يداوي الطبره
ويضمك مرات بحسره
ويخونه بشيلانك ظهره
والعسكر جاري اعله ضعونه
ويزيد الشجن من سهم عينه
وتذوب المحاشي من ونينه
دخلك يامشكّر...تصد بالعين مگدر
وتذوب المحاشي من ونينه
وفاض النور من روحه العطوفه
ظل ابن النبي يدور اجفوفه
ما مثلك اخو للاخو وفه
جفوفه امگطعه والعلم رفه
نوايح والضنايب طاح اعمودها
ــــــــــــــــــــــــــــــــــــــــــــــــــــ
رد حسين يصب ادموعه
والحوره طلعت مفجوعه
آحا ياغربة بو سكينه
مفرود وجبده منزوعه
محني وايدينه اعله ضلوعه
من حست الايتام ارجوعه
ركضت عالكافل مفزوعه
خُذنا ياحسين التوديعه
بنضم جفوفه المگطوعه
آحا ياغربة بو سكينه
خذنا للنهر يابن الصوامع
نداوي صواب راسه بالمدامع
نشيل الجود عنه...ثگيل وتاعبنه
نداوي صواب راسه بالمدامع
ولامه بالمدينه زفوا اسرورها
گولوله ابنها وفه انذورها
لابن المصطفى بالروح فدّه
تگنطر والعلم ضمه ابزنده
نوايح والضنايب طاح اعمودها
ــــــــــــــــــــــــــــــــــــــــــــــــــــ
أداء
السيد عصام الهاشمي
كلمات
المرحوم الشاعر غازي الحداد
محرم 1444هـ
تعليقات
إرسال تعليق