نمشي لو صار الدرب نار
نمشي لطف ابعشگ حار
نمشي على موعدنه زوار
نمشي
______
نمشي وبراحة ادينه ارواحنه انخليها
ولو الف عام المسافه الكربله نمشيها
درس علمنه ابو فاضل الكلمه من نحچيها
ما تصير اثنين والله وحده ونوفيها
كلمه وانطيناها لحسين
كلمه لو دربه مشي سنين
كلمه ما نثنيها أحرار
نمشي
_______
فوگ ظهر الليل نمشي مثل مشي انجومه
معركة عدنه الزياره والمسافه الحومه
الموت نتلگاه ملگه هو كلمن يومه
لخاطر حسين اشنضحي ما نوافي أدمومه
دمه لسه بمذبحه ايسيل
دمه بريش اجناح جبريل
دمه غالي وينطر الثار
نمشي
______
عدنه نهرين بوطنه وكلها تعرف هايه
والله خالق نهر ثالث نهر من مشايه
بالمشي تطفه جهنم من رفيف الرايه
الغايه نوصل يم ضريحه وشحلاة الغايه
مو عد ويه حسين خدام
مو عد لو نمشي الف عام
مو عد لا متهمنه اخطار
نمشي
________
من يعظمها الشعائر تقوه يحمل گلبه
حسين من زاره بضريحه كمن زاير ربه
حسين من گد ما نحبه نشم عطره بحبه
انطوف شباجه بدمعنه جن نطوف الكعبه
كعبه بيها واجب انطوف
كعبه امان وماكو كل خوف
كعبه گبر المنذبح صار
نمشي
________
كامل الزيارة واضح جم حديث انشاهد
الله يغفر كل ذنوبه للحسين الكاصد
گبل چان اجفوف تقطع وعشرة يعدم واحد
نمشي لو ننذبح كلنه غصبن اعله الحاقد
جنه گبر حسين يا ناس
جنه بابه اجفوف عباس
جنه تملك كربله اسرار
نمشي
_______
طفه جمرة ايعيش بينه ومن يطفي الجمره
الخطوه نمشيها بطريقه عالنواصب ثوره
انوزع اعيون ابمشينه وبثواب. الزهرة
حتى لو اموات نوصل هم نشم الحضره
نوصل ونشم اطهر اتراب
نوصل ونلگه حسين عالباب
نوصل وتستقبلنه النصار
نمشي
_______
https://t.me/ammarmmm
أبو يحيى المسعراوي
تعليقات
إرسال تعليق