القصيدة: عَلَمْنّي رَحِيّلَكْ
الرادود: مُحَمَّد الجنَّامِيْ
الشاعر: كرار حسين الكربلائي
~~~~~~~~~~~~~~~~
عَلَمْنّي رَحِيّلَكْ
كلشي ما تسوه الحياة ابلا حبيب
عَلَمْنّي رَحِيّلَكْ
الما يعيش اوياك يتسمه غريب
عَلَمْنّي رَحِيّلَكْ
~~~~~~~~~~~~~~~~
يا ضوه عيوني برحيلك مات بعيوني الضوه
يالمدلّلني بوجودك كلبي من بالفركه انجوه
شكثر جانت دنيه حلوه نصبح ونمسي سوه
و هسه كلشي بعيني ظلمه و ميت بريتي الهوه
عايفني غريبه
يالرحت انت الجرح وانته الطبيب
عايفني غريبه
الما يعيش اوياك يتسمه غريب
عَلَمْنّي رَحِيّلَكْ
~~~~~~~~~~~~~~~~
امنهد ما سفرت عني وجفن ما لاكه جفن
كل فرح ما طاب روحي وعشره عاشرني الحزن
يالجنت اغفه اعله ايدك هسه اغفه اعله الحزن
ابنيتك افراكك كتلها و متت من كد ما اون
صدكني يغالي
من وداعك ما طفه بكلبي اللهيب
صدكني يغالي
الما يعيش اوياك يتسمه غريب
عَلَمْنّي رَحِيّلَكْ
~~~~~~~~~~~~~~~~
عفت بيه اشلون حيره شحجي للعنك سأل
لاني ميته و لاني عدله يالحنين انطيني حل
من رحت بستان عمري وداعة عيونك ذبل
اغله انسان بحياتي عافني بغربه و رحل
المن احجي جرحي
كلها غربه وانته مبعد مو قريب
المن احجي جرحي
الما يعيش اوياك يتسمه غريب
عَلَمْنّي رَحِيّلَكْ
~~~~~~~~~~~~~~~~
الوالد البنته عليله تظلم بعينه السمه
رحت و دموعك تكلي وداعة الله فاطمة
انتي موتج من غيابي وانه موتي من الضمه
كبل ما ودع عيونك ريت بعيوني العمه
تعبني انتظارك
الشيب اخذ روحي كبل وكت المشيب
تعبني انتظارك
الما يعيش اوياك يتسمه غريب
عَلَمْنّي رَحِيّلَكْ
~~~~~~~~~~~~~~~~
بويه بن حذلم اجاني وكسر كلبي بجيّته
واختصرلي و بده بكلمه حسين كطعوا ركبته
حسين فوك الرمح راسه حسين رضّوا جثته
حسين فوك الرمل عاري و سلبوها عمامته
ما زرتك يغالي
و من بعد سلمت عالشيب الخضيب
ما زرتك يغالي
الما يعيش اوياك يتسمه غريب
عَلَمْنّي رَحِيّلَكْ
~~~~~~~~~~~~~~~~
~~~~~~~~~~~~~~~~
قصيدة || علمني رحيلك ▪︎اداء || محمد الجنامي ▪︎الشاعر || كرار حسين الكربلائي ▫️ ليلة 4 محرم الحرام 1444 ▫️العراق - البصرة - قضاء الفاو ▫️ عزاء حسينية وموكب أم الحسن
تعليقات
إرسال تعليق