*{أطلب نظرته}*
لتظل تناشد ع الدرب وين
امشي اويه مسلم تندل حسين
اقرا بقصته شوف المنكتب
اطلب نظرته لو رايد تحب
١/بزقاق الكوفة مسلم خله مفتاح
يفك باب الغرام وعشك الارواح
ماتعرف تحب لو ناوي ترتاح
ركض بالكوفه مسلم لحد ماطاح
كون:بحبيبك تنشغل..شما بعدك عدل..لحد ما تنكتل..كون
كون:بعذابك تبتسم..نهارك بي حلم..بمصيرك ما تهم..كون
الما شاف غربه وعاش مخذول
مايوصل بغرامه وأحب ليكول
الحب لليهد مو للينسحب
اطلب نظرته لو رايد تحب
٢/اذا ما تنطعن وتعيش مغدور
معناها خلل بحساسك يدور
مو دوم النهاية بأخر اسطور
مسلم بالنهاية افتتح عاشور
عيش:وحيد بلا عدد..يصير الحب مدد..الّكه حسين اشفقد؟..عيش
عيش:اخذ مسلم مثل..بصحره الحب رحل..يدور ع الأجل..عيش
الحب هذا عجيب وعنده حالات
اليعيش ابلا عشك صار امنل اموات
الماعايش جمر ليفكر يشب
اطلب نظرته لو رايد تحب
٣/مسلم ينجرح من يسمع اخبار
من نحجي بغربته وبُعد الديار
من يمته الحُسين ومو وطن صار ؟!
اليحب يسكن غرامه ويترك الدار
دوم:اليحب ماله وطن..ولا يبقى بسكن..كلشي وبي ثمن..دوم
دوم:يخلصهه بسفر..مثل ماي النهر..ولايوم استقر..دوم
حتى السيف عاشك روحو شوفوه
من يعوف بيته يبيض اوجوه
غربه البعشك موطن تنحسب
اطلب نظرته لو رايد تحب
٤/اذا تعطش ابديرة وناسها انذال
احفر نهر حبك انته بالبال
ماي ابلا حسين يعذب الحال
العطش وي الحسين تكول شّلال
مات: العاش بلا عشك..نبض مابي يدك..وحك الله وصدك..مات
مات:الما جاسه الذبح ..ولا بي كل جرح..اختصار الكل شرح..مات
خليها اعله بالك هاي الاوصاف
اليحب حسين كون ايفطر الشفاف
لو حبك ذنب موت اعله الذنب
اطلب نظرته لو رايد تحب
٥/حتى الحفره بالحب تنعش الروح
حفروها لمسلم رادو يروح
ابتسم مسلم وكال بعز الجروح
الحب حفرته اتوّصل للسطوح
صار:على سطح القصر..العلو طبع البدر..مثل راية نصر..صار
صار:باب اهل الهوه..طريق النينوه..ضوه الماله ضوه..صار
عشك مسلم خبر بالكوفة ونذاع
اثاري النزل للحب يصعد بساع
لاهل الحب لوُن رايد تنتسب
اطلب نظرته لو رايد تحب
*الشاعر حسين طالب السماوي*
تعليقات
إرسال تعليق