#محمد_الجنامي
ضعن الهواشم | محمد الجنامي
للطف اجوني يالتنشدون
ضعن الهواشم وين يردون
شرفت كاعي هالميامين
مجبل عليه ضعن الحسين
يالتنشدون
يالتحدي بضعون الاهل تمهل
حط الرحال بدارنه وتفضل
تسألون عني وآنه عنكم اسأل
آنه اسم كاعي كربلا شرفتوا التراب
حته الهوى جنت اساله عنكم ياغياب
حي الله من يانه وهله بضعون الاحباب
كل ذره من اترابي تصيح
يوميه انشد عنكم الريح
انتظر جيته صار لي اسنين
مجبل عليه ضعن الحسين
ياالتنشدون
ريض ياحادي والارض ارضكم
افرش الكاع ودك وتد خيمكم
خلي يرف فوك السمه علمكم
ياهل المعاني والشرف.. ياسادة الكوم
مابيكم اليكعد طرف.. ديوان معلوم
يالبيكم الباري انعرف.. ياباب العلوم
حتى الهوى ظل يهتف وياي
مية هله ياسادة المـاي
ياسر حياة الماي والطين
مجبل عليه ضعن الحسين
ياالتنشدون
يانوك ريضي بمشية المحامل
زينب اجت يبرالها ابو فاضل
وكربلا تنادي والنعم ياكافل
عباس مد جفك سمه.. يالكلك فياي
يالذابح بسيفك ضمه.. يا اكبر من الماي
الماشافك بعينه العمه.. يانور عيناي
كل شبر مني يصيح باحساس
مشتاكه للجفوفك ياعباس
يالبيك ريحة ام البنين
مجبل عليه ضعن الحسين
ياالتنشدون
عباس فوك الغيم دك علمها
حكها اتباهى زينب انت يمها
حته الهوى ما يوصل الخيمها
شتوافي كاعي لو حجت يالكلك اعجاز
لغيرك ياكافل من اجت ماظنها تعتاز
والعدها مثلك ما بجت دمعاتها اعزاز
التاريخ عنك سولف وكال
شارة سلف ياشيخ الرجال
شاهد كلامي بهالكلمتين
مجبل عليه ضعن الحسين
ياالتنشدون
أخر كلامي بدمعتي اووداعي
ربك كتب هذا الاجل ياناعي
بعاشر محرم معركه اعله كاعي
تمنيت ما يطلع صبح.. ولا اشوفن الصار
كل بني هاشم تنذبح.. وياها الانصار
تصعد الروس اعله الرمح.. واخيامها بنار
زينب تروح بضعنه للشام
وحسين يمي امغطه بسهام
راس برمح وي النساوين
مجبل عليه ضعن الحسين
ياالتنشدون
#محمد_الجنامي ▪︎قصيدة ▪︎[ ضعن الهواشم ] ▪︎اداء || محمد الجنامي ▪︎الشاعر || مصطفى العيساوي ▫️رابط الفيديو 🔗🔗 ▪︎مكساج || حسن يونس ▪︎ مونتاج || مصطفى العتابي ▪︎ تنفيذ || شاريو للانتاج الحسيني ▫️ ليلة 2 محرم الحرام 1444 ▫️العراق - البصرة - قضاء الفاو ▫️ عزاء حسينية وموكب أم الحسن
تعليقات
إرسال تعليق