خيرتك بوحده من الاثنين...بويه
لوتبقه لو تاخدني يحسين...بويه
شتجاوب ابنيتك.. ماانتظر جيتك
هذا حالي
1
يالناوي تمشي ونفترگ.. معناها بعدك اختنگ
انته الهوى انته
يانبض گلبي المنحفظ.. منهو اليعيش ابلا نبض
تسافر واظل ميته
ماراح اگلك لو رحت.. آنه اذبل بشوگي
لابويه دمي وداعتك.. ينگطع بعروگي
يعني تگلي بفرگتك.. مر الصبر ضوگي
بهيجي الوضع ياوالدي الموت راحه
وابلا اهل ماكو بالبيوت راحه
احجيلي سالفتك.. ماانتظر جيتك
هذا حالـــي
2
متعوده كل صبح ومسه.. بسوالفك مستانسه
ياابو الحجي الدافي
طير الگلب وانت الغصن.. والطير لمن يطمئن
فوگ الغصن غافي
من هسه اگلك لو رحت ماكو بعد راحه
والطير صعبه عيشته لو كسروا جناحـه
گلبي يابويه بفرگتك ينگطع سباحه
احسبني بويه لمن تروح ميته
ابقه جسد بعدك بلا روح ميته
بالحاله صارحتك.. ماانتظر جيتك
هذا حالـــي
3
بويه الحجي حجي الجرح.. آنه اقتراحين نقترح
واحجيلك الاول
ترحمني وتعوف السفر...يرتاح گلبي من القهر
لو گتلي ماترحل
حلفتك بكسر الضلع.. لا تكسر گليبي
من تبعتد عنه اختنگ.. ياريح العذيبي
بعدك اگبالي وما رحت وآنه طلع شيبي
من تظل يمي علتي اتطيب...والله
لو رحت عني حاجبي ايشيب.. والله
من تمشي راحلتك.. ماانتظر جيتك
هذا حالي
4
قصيدة ▪︎[ خيرتك ] ▪︎اداء | محمد الجنامي ▪︎الشاعر | وسام الشويلي ▪︎مكساج | حسن يونس ▪︎ مونتاج | مصطفى العتابي ▫️ ليلة 3 محرم الحرام 1444 ▫️العراق - البصرة - قضاء الفاو ▫️ عزاء حسينية وموكب أم الحسن
تعليقات
إرسال تعليق