ها يزينب وحدج والدنيا ليل
يا غريبة وشايلة بدمعج نهر
منين اجيبلج يبت حيدر كفيل
بهالظلام منين ادورلج كمر
____________-
المسافة بين عينج والفرح
غيمة عطشانه وتدور بلا مطر
ها يزينب طالعة بهذا الظلام
اسم الله صاح اليل لو جدمج عثر
خطوة اجدامج مثل طير الغريب
بين الف صايود وجناحة انكسر
عاصفة حزنج تنوح الهه الجبال
وانتي راسج عالي يتحده الخطر
اليل يا زينب يطول على اليخاف
وانتي من كثر العتب ليلج كصر
____
شوفة خيالج كبل بالمستحيل
هسه ياهو الجان من حقة النظر
النوم سلطان ويسيطر عالجفون
الا انتِ نايمة بعينج سهر
يا بحر من الالم موجاته اه
يا وكت صار النهر يقهر بحر
ليلة العاشر عن الف عام وتزول
بين دمعه ودمعه نمشيهه بدهر
خفي دمعج خلي للشام الدموع
لمي صبرج باجر وداع وسفر
_____
لو ركبتي الناكة من يلزم اديج
مدي جفج يمكن الكافل حضر
من تعبرين الصحاري على الهزيل
عالرمال دموعج تخضر شجر
حزنج هوايه لجن عمرج قصير
وانا كل عمري لجل عينج صفر
وية طولج بي كصر جرح اليطول
وية ابو الغيرة وية طولج جف كبر
ها يزينب لا تمرين على اخوج
يموت صبرج من تشوفين النحر
_________
سحكته الخيل وتزع عالتراب
خنصرة المكطوع ينطيج الخبر
مثل ابوج امشي وانظري للامام
حيدر بصدرين يمشي بلا ظهر
يالكصدتي على النهر كلج عتاب
هله هله بكافلج من اعتذر
جفوفة ذبلن مستحه وطلبن سماح
لخاطر القادر اعذري الما كدر
ها يزينب وحدج والله المعين
انتِ دمعه والخصم كلبه حجر
تعليقات
إرسال تعليق