اِشْماخذه من عندي يا گاع الطفوف
باتْره من اِخْوِتي أربع چُفوف
ابعيني شفتها امگطّعه .. بين الخيَم و المشرعه
ــــــــــــــــــــــــــــــــــــــــــــــــــــــــــــــــــ
آنه زينب گلبي بس اِجروح شايل
بين أبو السّجاد أسعي اْو أبو فاضِل
هذا مرمي اعله الفرات .. ذاك مرمي اعله التُراب
اچفوف هذا امگطَّعات .. او ذاك مسلوب الثياب
أشتكيله .. گلْت أروحن للشريعه .. و أشتكيله
اشلون أشيله .. و اهو چفّينه گطيعه .. اشلون أشيله
إله مدّيت إيدي لاچَن ما يفيد
اشلون يلزم إيدي و اهُوَه ابلايه إيد
او نظرات عيني اموزّعه .. بين الخيَم و المشرعه
ــــــــــــــــــــــــــــــــــــــــــــــــــــــــــــــــــ
وگفة الكافِل جِزَت حدِّ الرُجوله
اتستَّروْا خلْف النَّخل يَـ لّله اگدروله !
طاحت الچفْ اليمين .. و أخذ بيْساره الفَقار
او [ كَمَنَ لَهُ لَعِين ] .. و گطَع من عنده اليِسار
ما يِهِدها .. رايته ابگطعة ازنوده .. ما يهدها
ما يِردها .. ابلايَه چف ضربة عَموده .. ما يِرِدها
مثل أبو فاضل تلاگي مستحيل !
طاحت إيده او قابض اعلْه الرايه حيل
او ظلِّت الجثّه امبضعَّه .. بين الخيَم و المشرعه
ــــــــــــــــــــــــــــــــــــــــــــــــــــــــــــــــــــــــــــــــــ
ارْجَعِت يمِّ احِسين بوْنين اْو صوايِح
و ابطريقي الگيت چفِّ اِمْن إيده طايح
اتگرّبت يم الحُسين .. او شايله چفَّه الشِّمال
ثاري چفِّينه الثنين .. امگطّعه فوگ الرِّمال
من وريده .. شفِت دم ابْن امّي جاري .. من وريده
او إصبع إيده .. ضايع ابنُصِّ الصّحاري .. إصبع إيده
امحيَّره او وگْفِتي يم چفَّه تُطُول
اشلون ألگه خنصره بين الخيُول
و الخيل جالت مسْرِعه .. بين الخيَم و المشرعه
ــــــــــــــــــــــــــــــــــــــــــــــــــــــــــــــــــ
اوْصَلِت يمّه او شحچي و أدري الحچي قاسي
ابفعلة الجَمَّال تِنْدَك الرَّواسي
جرّد الخنجَر بِديْه .. او يگصر الساني شگول !
راد يتجاسر عليه .. اگبال عين أمَّه البُتول
قاسي گلبه .. مثل ظُلمة ليل حالِك .. قاسي گلبه
راد سَلْبَه .. شافه عاري او رغم ذلِك .. راد سَلْبه !
مدري أبچي اعْله الچفوف العالفُراتْ
لو عله اللّي امْن أجِل ثوب امبتّراتْ
و انشمَرِت اچفوف أربعه .. بين الخيَم و المشرعه
ــــــــــــــــــــــــــــــــــــــــــــــــــــــــــــــــــــــــــــــــ
الكعبه بيها أربع أركان الربَّعَتها
و آنه كعبه اچفوف أخُوتي الرافعتها
تالي هالأربع چفوف .. عفّروها بالهَجير
و أنا گمْت اِعْليها اطوف .. و ابكترهم أستجير
الطيحه هاذي .. طيِّحَت هيبة دَلالي .. الطيحه هاذي
اْو يا مَلاذي .. ابلا ملاذ أصبَحِت تالي .. يا مَلاذي
اعْله الچفوف الأربعه ابحزني أدُور
او للمخيم أرجَعِ اِمْنشره الشُعُور
او منّي الجِدَم بالهَم سِعه .. بين الخيَم و المشرعه
ـــــــــــــــــــــــ
ميرزا عادل أشكناني
[ أربع جفوف ] أداء الملا #محمد_بوجبارة كلمات الشاعر ميرزا #عادل_اشكناني مخطوطة - عباس فاضل مكساج - حسين نجم مونتاج - حبيب بوحمد ليلة 7 محرم الحرام 1444 هـ - 2022 م #حسينية_سيد_الشهداء - دولة الكويت
تعليقات
إرسال تعليق