امك واطلبك يمه يبني واحملك ذمه
عينك يايمه على اختك
زينب امانه بركبتك
يمه يمه
عتاب الأم ملح على عيون الجرح
واذا صار الزعل مصيبه
واعرف يالولد وفي وكد الوعد
واذا رادت نهر تجيبه
كونك ماتنام الليل حارس عالضعن تنطر
لاختك بالعطش عباس كون تغيم وتمطر
كص راس الهوى من تفوت نسمه وعالخيم تعبر
غريبه
نسمة هواهم ردها...تعبر عليها شحدها
تسوى الشوراب جلمتك
زينب امانه بركبتك
يمه يمه
************
ترى شما تلتفت على الوالي الاخت
مثل شيخ السلف وليها
تصح نظرة عتب تجي بساعة عتب
وابو الغيره الفهم حجيها
افهم من تباوع ليك اختك ساعة العازه
مرات اليحب العين يسمع نظرة اعزازه
ميت لو جنت وتصيح افزع واركض جنازه
عليها
افزع لخيتك جثه
والغث كلبها غثه
فزعة عشيره فزعتك
زينب امانه بركبتك
يمه يمه
************
ولا مثلك كفو اخو ونعمه الاخو
يمن ينكط وفه بمحنته
لجن يصبح شرس اذا عين الشمس
تشع نظرة غرب على اخته
ماتتوصى واعرف بيك فارس راعي الكحيله
طولك مايكفي اكماط لمن جنت الوليله
زندك جرغد امك هاي هو وطارف الشيله
عكدته
شيلة حنينه وجرغد
زندك علك من ينشد
حطهن علامه بجربتك
زينب امانه بركبتك
يمه يمه
************
اريد اتحط اثر على اخدود النهر
وعلى عيونه بزعل تسطره
ترى الماي الترف كلف مو عالكلف
العطش كلب الزلم يعبره
ازعل واطبك الجرفين والعب بالنهر جوله
مد طولك عليه وانشوف ياهو يزامط بطوله
كلب زينب مجرد ماي بارد يعني معقوله
يكســره
شبع نهرهم ذله والماي اجرحه وكله
شلتك لجن ما شربتك
زينب امانه بركبتك
يمه يمه
**********
واذا عالمشرعه واديك مكطعه
اذن مشت اسيره
عكب ما تنجتل تروح اعله الهزل
تره الجانت كبل اميره
زينب تصبح من الضيم بعدك جنها خيمتها
تعثر بالدرب وتكوم منتجيه اعله هيبتها
واثكل من جبل حمرين من الدمعه بايتها
الجبيره
حنت عباها بدمك
تمشي وكلبها يمك
تذكر محنة عشرتك
زينب امانه بركبتك
يمه يمه
كلمات الشاعر
احمد الذهبي
▪︎قصيدة [ ذمه ] ▪︎اداء | محمد الجنامي ▪︎الشاعر | احمد الذهبي ▫️ ليلة 4 محرم الحرام 1444 ▫️العراق - البصرة - قضاء الفاو ▫️ عزاء حسينية وموكب أم الحسن
تعليقات
إرسال تعليق