كلَّا وَ القَمَرْ | محمد فريدون - محمود أسيري | كلمات مكتوبة

 

كلَّا وَ القَمَرْ | محمد فريدون - محمود أسيري | ليلة ٧ محرم

كلَّا وَ القَمَرْ .. إنَّها إِحْدَى الكُبر

سحگ عالجيش اْو عُبَر .. هذا عبّاس

ابچفّينه القَدر .. وحده جَر بيها النَّهر 

او وحده شَب بيها سَقَرْ .. هذا عبّاس

ـــــــــــــــــــــــــــــــــــــــــــــ

قَسَم بالقَمَر و الرفع قَدْره

الْقَمَر بَـيـَّـن الله اِشإِله قُدره !؟

اْو گمر هاشم ايْدل عله الباري

( تجَلَّتْ بِه الآيةُ الكُبرى )

ربِّ الجَلاله .. ابحكمة فِعاله

سوَّه ابُوفاضل دليل القُدرْته

مَظَهر عَذابه .. لو شَد نِگابه

ايشوف الجحيم اليجرِّب سَطِرْتَه

كلَّا و العصُر .. الوگف ضدَّه في خُسُر 

أعذَرِ او ما ظل عُذُر .. عد الارجاسْ

منَّه الينسطُر .. سطرة إيده و الگبُر

سيفه لجهنم جسُر .. هذا عبَّاس

ـــــــــــــــــــــــــــــــــــــــــــــ

عِگد مَعْصب إخته عله امتونه

الزلم لو زلِم خلْ يلاگونه

ذبح نصهم ابقبضة ايْمينه

او ذبح نصهم ابخزَرْة اعِيونه

الموت ابخزرْته .. تذبَح نظرْته

و اليلتِفت له يموت ابمچانه

غاص ابْوَسَطْهُم .. ابسيفه خُبَطْهُم

إن تنكروني أبوفاضل آنه

الشارِد ما دَره .. اشلون يشرد يا تَره

مثل يوم الگنطره .. عالجثث داسْ

كل الّلي جَره : .. [حُمُرٌ مُسْتَنْفِرَه]

هَرَبَتْ مِنْ قَسْوَرهْ .. هذا عبَّاس

ـــــــــــــــــــــــــــــــــــــــــــــ

ابحرُبْهم عليْه بانَت الفَرحه

طحنهم شِعير ابوسَط رحَّه

وليمة جثث سوَّه من عِدهم

حُسامه شبَع و ارتوه رُمحه

ابحربه ايتونَّس .. لو غيره عبَّس

ايلاگي الحرب ملگه امِّ لولدها

او ماهِي عجيبه .. كبْش الكتيبه

ايْجيب الكتيبه اعْله كيفه اْو يرِدها

سيفه البالحرُب .. عالجماجِم ينطرُب

ابكيفه يگلبها گلب .. او تشهد الناس

لا ما ينغلُب .. ايدوّر الصّيد الصعُب

و السهل ما ينطلُب .. هذا عبَّاس

ـــــــــــــــــــــــــــــــــــــــــــــ

الأعادي عله المَشْرَد احتارْوا

لمَن شاهدوه عالنخل دارْوا

اسْمعَوْا صوته و أخذتهم الرَّجفه

الزلم و النخل من سعَف صارْوا

فضَّ المراكِز .. اْو لا من مُبارز

وحده اعْله جرْف الشريعه ايتمشَّه

ايحوم اعْله كيفه .. و ابچفّه سيفه

منْجَل نزل عالگصب ظل يحشَّه

ابدرْب المشرعه .. گالوْا آلاف أربعه

اهناك كلها امدرّعه .. ابْـ درِع و ابْـ طاس

او شبْه القارعه .. نزل ليث المعمعه

الجيش بالطّف زعزعه .. هذا عبَّاس

ـــــــــــــــــــــــــــــــــــــــــــــ

نِشَر بيرغه او جرْبِته ابظهره

جبل چنّه راكب عله مُهره

الشريعه كشفها او دخل ظامي

لچن العجَب ما شرب گطره

هاي الرُجوله .. هاي البُطوله

شال الشريعه او نفضها من إيده

ساقي العُطاشه .. يتروَّه حاشه

إلّا إذا گبله يشرب عضيده

سدَّر للخيم .. وارتوت كل الحَرم

آخ بس لولا السَّهم .. او ضربة الرّاس

شيَّال العَلَم .. مو مهم گلبه سِلَم

جرْبته عنده الأهَم .. هذا عبَّاس

ــــــــــــــــ

كلّا و القمر

ميرزا عادل أشكاني

الكويت – ذو القعدة 1443

اداء محمود أسيري محمد فريدون الشاعر ميرزا عادل أشكناني ليلة ٧ محرم ١٤٤٤هـ حسينية الرسول الأعظم - الكربلائية