📜 القصيدة: ذبحوا صحبانه
🎤 أداء: مسلم الوائلي
🖋 كلمات: حسن الترابي
~~~
انه الذبحوا كل صحبانه
ورد منهم عينه اعله اردانه
گد ما حاير حته اخيالي وياي احتار
ظل يندار بصفحه وانه بصفحه اندار
انه الذبحوا كل صحبانه
انه الذبحوا كل صحبانه
~~
گلت الحيله وردتكم يا اعزاز حسين تجوه
واگف ومن حشمتكم حيلي ما ينگلني خطوه
ردت اطيح اگبال زينب وجلبت بصفاحي گوه
انه ابوكم مدري اخوكم المهم گومولي فدوه
صاحوا بالميادين
شويه ونذبح حسين
من شافوني يمكم كاض گلبي
انده بالمطاعين
هذا الميت منين
واحد منكم يدليني دربي
يخوان عيوني محلفتكم گوموا وياي
انه التعطش يمكم روحه وينسه الماي
مو ماي الكم عطشانه
انه الذبحوا كل صحبانه
~
عازة عيوني وبجيت وصعبه مني اطيح دمعه
المشكله اعزاز اعله گلبي وگلبي الموادع يطلعه
كلشي ما ظل عندي غير اخيالي وخايف اضيعه
حته طولي موش اليه ساعه وعله الخيل اوزعه
حيره وصاحت الناس
عافك حته عباس
لا ظل صاحب ولا ظلت اخوان
مدري شغمض العين
صاحوا طاح الحسين
واگف ما طحت بس انه عطشان
ما طايح واگف وعيوني مفتوحات
واحد صاح الواحد بالطف يمكن مات
بالموت عيونك غرگانه
انه الذبحوا كل صحبانه
~~~
وحدي وظليت افزع بلكي بيكم لله هده
ياهو منكم ما امطشر كون بس ميت وگعده
حيل مابيه وألمكم شلون ألم وانه التبده
تعثرت وبظهري صاحوا هذا حال اليبقه وحده
حسبالي الوكت جان
ليل وانه كبران
وبيدي تلمست يعزازي الگاع
ثاري اليفگد الشوف
عيونه اتصير الجفوف
بس ما تنحفظ نظرات الوداع
بجفوفي تلاگيت وياهم بس دموع
كلما انده منهم واحد الگه ضلوع
ثاري الماتوا كلهم انه
انه الذبحوا كل صحبانه
~
التثگل جروحه اعله گلبه يتعب ومن ضيمه يذبل
انه اخو السبعين واحد الثاني يلجم جرح الأول
يمهم انه حسين اصيحن راح اروح ومنكم ازعل
التفت محد لحگني وياهو اليراضيني اسئل
حسبالي اليموتون
من ازعل يگعدون
ويراضوني لو شافوني زعلان
انه الماله نغار
تبجي عليه الزغار
الله يعينك اعله الفرگه تعبان
زينب شافت طولي اتمايل يهل الحيل
شمت صدري وگالت بالك من الخيل
يحسين ضلوعك ذبلانه
انه الذبحوا كل صحبانه
~~~~
ودعتكم هسه اريدن زلمه گد فراگي اودعه
ومثل ما ثلمتوا گلبي گلبه كون عليه اشلعه
امشي وتلفت وتعبه يموت ومن بعيد اشيعه
يركض جفوفه اعله صدري ومن حوافرهم يجمعه
ياهو اليگدر الهاي
يبرد گلبي بالماي
يذبل عالرمل وابرد فرد نوب
لو سلبوني الثياب
يستر طولي بتراب
ولا اظل عاري وعله الغبره مگلوب
سكته وانه اتنطر واحد يگعد كون
يوگف يم الخيمه يدني التل لم عون
ما تگدر تركض تعبانه
انه الذبحوا كل صحبانه
°°°°°°°°°°°°°°°°°°°°°°°°°°°°°°°°
• قصيدة : ذبحو صحبانه • أداء : #مسلم_الوائلي • كلمات : حسن الترابي • عزاء مسجد السيد الشهيد الصدر | 1444هـ • المكان | العراق - واسط - الكريمية
تعليقات
إرسال تعليق