ملك الموت كل ما راد قائد || باسم الكربلائي || ليلة 9 محرم || قاعة بغداد الكبرى
ملك الموت كلما راد قائد
حسين ايروح ينطي احلى واحد
من حسين شابك علي الاكبر.. شويه شويه كام الكاع تزغر
من كله الرساله تريد منحر..اليوم ايكله اشوفك ولد حيدر
كله انطيني سيف يصير شاهد.. حسين ايروح ينطي احلى واحد
************
اخذ لتخاف گله الدين يسوه..خير من الله عدنه ارگاب حلوه
الموت يگله ما خليت تجوه.. يگله اولادي لله تروح فدوه
كلما شاف راس الرمح بارد.. حسين ايروح ينطي احلى واحد
***************
طلع من المخيم يشبه اثنين.. يشبه وجه طه وغيرة حسين
من شافوه وصلهم شايل الدين.. ظمو روسهم كل الشياطين
رد عطشان الاكبر نهر رايد.. حسين ايروح ينطي احلى واحد
***********
من گد ما حلو نشاف باله.. ماشايف بشر ابيض خياله
حته الموت من صد لجماله.. تمنه الموت يستشهد بداله
من شاف الزمن رايد مجاهد.. حسين ايروح ينطي احلى واحد
**********
راح وظهره يلمع جنه طاووس.. ياهو يبارزه الباحسين متروس
فوگ اگلوبهم بالمعركه ايدوس.. من فوگ الفرس ويطبر بروس
لوجه الله اگول اولادي عاهد.. حسين ايروح ينطي احلى واحد
*********
سيف شگد حلو بجفوف ترفه.. يرجّع عسكر من يشيل جفه
محد بارزه باسهام صلفه.. طاح وكلشي گام ايطيح وسفه
صوت من الخيم للعرش صاعد.. حسين ايروح ينطي احلى واحد
***********
گام الموت من حسين يخجل.. كلما يطلب يوديله الاجمل
حسين يگله اخذ لا الله يزعل.. بياض وجوهنا من الله يقبل
اهل البيت نوفي من نواعد.. حسين ايروح ينطي احلى واحد
كلمات الشاعر
حسام الحمزاوي
ليلة 9 شهر محرم الحرام 1444 هـ
قصيدة: ملك الموت كل ما راد قائد
أداء: الحاج باسم الكربلائي
كلمات: الشاعر حسام الحمزاوي
المكان: قاعة بغداد الكبرى - العزاء المركزي للسيد الحكيم
تعليقات
إرسال تعليق