القصيدة: وينك
أداء: مسلم الوائلي
كلمات: عباس طالب السعيدي
~~
يوليدي اليبطون اعزازه
لو رجعوا يلگونه جنازه
وانه اعله گد طولك صحت وينك
شمس الله ماهيه منهد عينك
عازة شوفت وجهك عازه
~~~
كلما اگلك يمه اشبگني
جنت اضم جفوفك عني
گتلي اتعذر لكن ذني
الله مسويهن لحسين
من جنه انسولف عالزهره
وتگوم اعله الباب تكسره
تلزم ضلعي وحيل اتعصره
وتگلي اليوجعها منين
يا يمه عنك لو گلت غالي
شو بس الحسين اليجي ابالي
متغيره اشوفنها السمه بعيني
كلما گلت راس الگمر عالي
اتسلم زينب وتحس بيها
وانته ابطني اترد عليها
فارغ مجانك يا ضوه حسينك
شمس الله ماهيه منهد عينك
عازة شوفت وجهك عازه
~~
من جنت اعطش وابدي اتعذب
تركض تاخذ ماي الزينب
هي اگبالك عود وتتعب
جا بالهيمه تبات اشلون
لو وي اختك ترضه اتلاگه
جا هسه امك فوگ الناگه
كون المثلك عادي فراگه
جا ليش ازرگ متن ام عون
گد ما حنينه وتدري بحلامك
تلبس حجاب الجربه گدامك
مشتعله نار بگلبي كل ساعه
دخانه تشبه ريحة اخيامك
حته عيوني بجيتك تحله
تكسر گلب امك مو سهله
شوفي انعصر بين العمه وبينك
شمس الله ماهيه منهد عينك
عازة شوفت وجهك عازه
~~
شد حيله الموت اعله جروحي
ما يدري انته الماخذ روحي
والأنشدهم گالوا روحي
شيلي وليدج حدر الخيل
گتلهم غير اگباله اخته
گالوا ملتهيه بفاتحته
والبر تركض بي ليليه
لا يگضي ولا يگضي الليل
اگبال الزلم گالولي ركضتها
گتلهم الله يساعد اخوتها
من گالوا ازرگ ظل متن زينب
گلت السمه امجلبه بعبايتها
جان اخيال اختك ما طالع
هسه عليه الناس اتباوع
بين الكفاله اموفي لا دينك
شمس الله ماهيه منهد عينك
عازة شوفت وجهك عازه
~~~~
گالوا گعده اتصلي هوايه
گلت اخذوني الها مصلايه
كون امشي الزينب مشايه
وخلي الخيل بضلعي تروك
وجهك صح كاتلني افراگه
بس لحسين اكثر مشتاگه
لو رد ابني وصار ملاگه
ماي اترس حته الكاروك
ما اگلهم اوليدي الگمر وينه
من اوصل انشد وين ابو سكينه
لو گالوا بعينك سهم عادي
حسين خو مابيها شي عينه
صح انته اوليدي الربيته
بس حسين اكثر حبيته
هذا الفخر لو گطعوا ايدينك
شمس الله ماهيه منهد عينك
عازة شوفت وجهك عازه
°°°°°°°°°°°°°°°°°°°°°°°°°°°°°°°
• قصيدة : وينك • أداء : #مسلم_الوائلي • كلمات : عباس طالب السعيدي • عزاء مسجد السيد الشهيد الصدر | 1444هـ • المكان | العراق - واسط - الكريمية
تعليقات
إرسال تعليق