قصيده الحب وحساب الفيس بوك _يحيى العلاق مكتوبة
قصيده الحب وحساب الفيس بوك
قصيده الحب وحساب الفيس بوك
كلها احساب..
دموعي وسهر ليلي اوكفتي اعلى الباب
امسجلهن عليك جروح فوك جروح
الخزن ولنزف والطاب ولماطاب
اشكد جنت احترم لون البراءه البيك
على وجهك خجل متنسي دم اركاب
ماخذ صفحه مني ابكل كتر بالروح
واكلك روحي الك سويلك الف احساب
عفت عالم لهفتي ورحت للمجهول
عالم افتراضي ومهزله والقاب
عارض صورتك للروعه ولفد شي
شافوها الاصحاب واصدقا لاصحاب
كل تعليق احس يطعني طعنة موت
يضغط ريتي اليضغط عليك اعجاب
كتبولك شعر واعترف كله احساس
بس مانوهو ..منقول للسياب
نفس الصوره هاي العدي صار اسنين
تذكر بالقلم من لبستهه احجاب؟
تذكر جنت اضمها ابنص كتاب الدين
ماامن عليها ابحضن غير اكتاب
اشلون اتكشفت للرايح وللجاي !!
ونا الماشوفت مكفاهه للطلاب
واتخيل كلام البيك يتغزلون
شايب مستعين ابصورة اجمل شاب
دخل ساء الادب وتماده بالموضوع
سحك فوك القيم والشيبه والشياب
واحد كالك ماضكت طعم النوم
رفقا بالمتيم نحل جسمه وذاب
حسبالك صدك بفراكك ايسلون؟!
ذوله امربربين وعاشقين الراب!!
شالو غيبتك ضحكو عليك اهواي
حتى اتراهنو تنجاب ماتنجاب؟
لتعول عليهم كلهم ايلعبون
لعبة مزرعه ومحصولهه الجذاب
بس انه الوحيد الفتك بيه الشوك
اسد كوه الجفن وطيوفك اتدك باب
ماطبلك (بيياهو) حتى ياهو اتكول
ولا انتظرك اتشرف على (الوتساب)
اذا تسأل علي تلكاني ويه الليل
عزائي(ابلسه فاكر) (والهوى غلاب)
تعليقات
إرسال تعليق