مسلم ابن عقيل عليه السلام
انه اول يتيمه صرت بضعونك
عمي لا تبچي عذبني دمع عيونك
دمعك الغالي ما يرخص اريده
فدوه الك مسلم وفدوه حميده
عمي يحسين
...
بالدرب لمن صحتلي وچفك براسي مسح
اعرفت خلاني يتيمه ومسلم الغالي انذبح
فراگ ابويه شكبر جرحه و موت ثاني بالاصح
ومن شفت دمعك يعمي گلبي الف جرح انجرح
ما احس باليتم دام اشوفك سالم
والبقيه بحياتك يهيبة هاشم
يظل كلامي الك كل يوم اعيده
فدوه الك مسلم وفدوه حميده
عمي يحسين
...
لا يظل بالك عليه عمي وامسح دمعتك
راح اروحن آخذ امي ونگعد بظِل خيمتك
امي وَيّه ليله وانه وي رقيه ابنيتك
يديمك الباري علينه ولا حرمنه شوفتك
بشوفتك روحي تنسه العذاب العدها
منهي مثلي والحسين صبح والدها
انه رباني ابوي بهالعقيده
فدوه الك مسلم وفدوه حميده
عمي يحسين
...
بالله سولفلي اعله مسلم عمي وضحلي الأمر
صدگ ظل بلا معين وغدرته اهل الغدر
صدگ ضامي انگطع نحره ورمو جسمه من القصر
وبالحبل جروها جثته وكل عظم بي منكسُر
والدي مندفن لو بقه عالغبره
بالله منهو حضرله وبچه يم گبره
البگه براسك عله الحزو وريده
فدوه الك مسلم وفدوه حميده
عمي يحسين
...
حسين گلها يا حميده وتارس اعيونه الدمع
اي يعمي انگطع نحره ونحري مثله ينگطع
الخيل جرت جسم مسلم وآنه هم نفس الوضع
باجر اخيول ال اميه ما تخليلي ضلع
اسم الله گتله يعمي عليك من الذبح
راسي گبلك يريته يصير اعله الرمح
عمري دونك ابد ما اريده
فدوه الك مسلم وفدوه حميده
عمي يحسين
...
گالي انتي ورقيه ضيمچن ما ينحمل
من يشب نار المخيم تندبن يا ابالفضل
ويلي وبيوم اهدعش تمشن سويه اعله الهزل
السوط فوگ المتن يلعب مچتفات بفد حبل
والضعن يا حميده اذا بالكوفه مر
مسلم بگبره يبچي والچ يشبع قهر
لخاطرك امشي بالدروب البعيده
فدوه الك مسلم وفدوه حميده
عمي يحسين
...
خادم الحسين ( عليه السلام)
كرار حسين الكربلائي
( ابوكميل)
تعليقات
إرسال تعليق