العليله عليها السلام
وحشه الليل من دونك وعيونك وحشه الليل
راح اشتاگ للملگه والفرگه تريد الحيل
بعدك نوح سالفتي .. راح تصير مملكتي
وحشة ليل
...
ليل الانتظار مو مثل النهار
ساعاته طويله
وبعالم سكوت شويه شويه اموت
واذبل ليله ليله
ليش بهالرحيل ماخذلك عليل ومفارگ عليله
ماعدها وسيله
دربك ليل مو واضح يالرايح ما انساك
بالتوديع ما ظلت بس كلمة الله وياك
وآنه وياي عاطفتي .. راح تصير مملكتي
وحشة ليل
...
خطوات الوداع .. ما لمتها گاع
اكبر من حياتي
ما گتلي تعاي .. وانه امنيتي هاي
اصعد وي خواتي
يالرايح بعيد .. تذبح بيه عيد
فرحة امنياتي
وتوديعك مماتي
بضعن الموت من تطلع ما ترجع عندي احساس
وبفرگاك يجرحني ويذبحني حچي الناس
كلها تگول ما رحتي ..راح تصير مملكتي
وحشة ليل
...
من خوف الزمان .. شيباتك امان
لا تحرمني منك
البعيونك تنام .. تتيتم حرام
خل تمشي اويه ضعنك
لو گال الحنين .. كلمة بابا وين
شنهو جوابي عنك
رايح مني چنك
ايبين شيب بخيالي يالغالي تشوفه الگاع
وين تروح يا روحي وجروحي حيل اوساع
ما ارتاح من وكتي .. راح تصير مملكتي
وحشة ليل
...
دمعة مستحاك .. ذكره تظل وراك
يمي من بچيت
لبيتك يا ضواي .. گتلك يمته جاي
ما شفتك حچيت
منها وجرحي صاح .. راح الغالي راح
وبزغري انحنيت
وصرت لحزني بيت
كلشي يموت من ترحل واتأمل دگة باب
اغروب الآه يعصرني ايذكرني بالأحباب
اتهد الحيل نايبتي .. راح تصير مملكتي
وحشة ليل
...
خادم الحسين ( عليه السلام)
كرار حسين الكربلائي
( ابو كميل)
تعليقات
إرسال تعليق