علي الاكبر عليه السلام
ما شاءَ الله جماله
تارس عيني بدلاله
گمر ظهر سحر كل كربله
حيدر شافو حيدر بعينه
حيدر واگف ينصر حسينه
...
علي الاكبر يا حلاته أذن الموت لصلاته عجب الدنيه بثباته وسيفه غيمه بالسمه
شاعر وسيفه قصيده بالرگب هوّس بإيده تصيح الله وتعيده
الرگب من تنزف دمه
مهرجان الموت بادي يوم عاشور الظهر
چان جمهوره مناحر تصفگله بكل شطر
سيد وجده محمد يعبر وما ينعبر
شيخ وفاتح مضيفه
وايعزبها اعله كيفه
علم هجم هزم سبعين الف
راواها الموت الاحمر
يشطر بالروس الاكبر
بده وحده العده منه اتخذف
حيدر شايل كل نياشينه
حيدر واگف ينصر حسينه
...
كربله تسولفلي عنه سيفه نار وهو جنه فنه التدناله فنه خبر كانَ ينحسب
الگابله ويگول زلمه هذا ما جايبته امه يطش بالجيش ويلمه يچهب وما ينچهب
سمه تلوذ بسمه منه السيف لمن يعتلي
الگاع والمو گاع صاحت لا فتى الا علي
صاح هاشم موش هينه الزلمه خل يتدنه لي
ثبت اكبر مواقف
للعز صارت سوالف
صگر يكر جمر يچوي الجمر
الطف ما چان اعله گده
ركضهم روحه رده
اسد لكد حصد روس الكفر
حيدر وگفاته بميادينه
حيدر واگف ينصر حسينه
...
غربل الميدان كله خَله بالجيمان خِله قائد الفرسان ذَلّه
وصل دمهم للشمس
صاحت جيوش آل ميه شجابنه لهاي البليه صاح يا ثار الزچيه
وسكته صارت ماكو حس
وجوهها من الخوف صفره وحمره من دمها الارض
عفيه ابن حيدر بسيفه خاطها طول بعرض
هاشمي وطلابه عنده وهالطلابه ما تفض
فارس سوّه المعاجز
يهتف هل من مبارز
بطل حمل ذهل كل الحرب
ليل وبالحومه عسعس
ذاك الوجه المقدس
غِضب ندب كتب قصة رعب
حيدر غيره يمطر اجبينه
حيدر واگف ينصر حسينه
...
بغيرة الكافل تحزم وابو فاضل گله يا عم يبن اخوي الغالي تسلم بيك ما ضاع التعب
فوت يا يوسف زمانه شبِّع العسكر مهانه گاله ترباتك آنه الذهب يطلع عالذهب
صاح بيهم مرت الاخره وخيّر الفرسان نز
صفن عزرائيل مدري شكثر من قائمته چز
سبحه چان الجيش بيده وطشها شاهود وخرز
ليل بمصباحه طرهم
آخر ساعه بعمرهم
فجر يطر عسر ما بي يسر
موسى وعصاته بيده
تلهم راس التريده
خطر كسر ظهر اهل الغدر
حيدر وينه الگابله وينه
حيدر واگف ينصر حسينه
...
لون ما أمر المنيه ما بقت منهم بقيه راد من الله هديه بالشهاده ينشمل
ما تعب من حرب عسكر تعب من العطش والحر صوبو هامة الاكبر ومطرت اعليه بالنبل
دمه غطه عيون مهره ورجع بي لهل الغدر
وليه ما بيها شهامه اتولته بطعن وطبر
محني الحسين اعتناله طاح فوگه من المهر
خضّب من دمه شيبه
ينحب فاگدله هيبه
يحن يون ابن منه انفگد
ماي اتبده شيلمه
مرتين يگله بسمه
علي علي شلي بعمري بعد
حيدر راح الچان الي عِينه
حيدر واگف ينصر حسينه
...
خادم الحسين ( عليه السلام)
كرار حسين الكربلائي
( ابو كميل)
تعليقات
إرسال تعليق