اولاد مسلم عليهم السلام
زينب طبت الكوفه هيه وراس اخوها حسين
اتگله اعذرني يا مسلم راحولك يتامه اثنين
...
راحولك يتامه اثنين من احترگت الخيمه
ضاعو مني يا مسلم من فرينه بالهيمه
ادور بالدرب كله وآنه بالسبي وضيمه
من اهد ظهرية العاشر مالي علم راحو وين
...
يمسلم بس حميده وياي تنام وشايطه تگعد
اعله اخوتها تناشدني وتمرد گلبي من تنشد
تگلي ادعيلي يا عمه اخوتي بالسلامه اترد
ومن فرگاهم لهاليوم ابد ما غمضتلي عين
...
يمسلم زين من راحو چا وياي سلبوهم
لو بالسيف مذبوحين لو بالخيل سحگوهم
لونهم هسه موجودين مثلي بحبل چتفوهم
يمسلم بلكت اولادك ردو للوطن عدلين
...
مسلم صاح من گبره وبگلبه الجمر يلهب
فدوه اولادي خل يرحون انتي المهم يا زينب
دخبريني اعله ابو السجاد صاحت طاح واتسلب
يمسلم عالرمح راسه وچبده من السهم نصين
...
گاللها عله ويلادي القدر حل ونفذ امره
الحارث لازم اوليدي ابراهيم وگطع نحره
ومحمد يشوف اشلون اخو يرفس عله الغبره
واخذهم روس لبن زياد الولد ما رحم بيها البين
...
ولداي
عاشرت الحزن من يوم ولداي
وبگلبي ما يطيب الجرح ولداي
انه الزهره واشوف اثنين ولداي
بالمسيب يذبحوهم سويه
...
يمهم
ويلادي اروحن دوم يمهم
ويومي تمنيته گبل يمهم
كل ساعه يصيح الموت يا امهم
الحگي اوليدچ بحضن المنيه
تعليقات
إرسال تعليق