اربع كتب
أداء الحاج باسم الكربلائي
الشاعر السيد سيف الذبحاوي
اخذ اربع كتب مني.. نزل بيهم وحي حزني
حرزمن نور.. لعطش عاشور
اخذ اربع كتب مني
علي لنور العدل آدم..وانا لستر الوفه حوّى
وقبل اولادي اخرس جان.. صيت الخوه مايسوى
انكسر صبري لضلع فاطم.. وشعلت بكل ضلع نخوه
لفحول الناس نسبوني.. ونسبني الباري للصفوه
أنا دعوة وصي حاير.. يريد انصار للعاشر
ونذرت بدور.. لعطش عاشور
اخذ اربع كتب مني
قلب ام وعليك يخاف.. الخطر لو مسك يحسه
درع مني اخذ عثمان.. زبوري لطولك يحرسه
مزاميره اعله لحن الموت.. ترتل والحرب عرسه
وقره عبد الله الك توراة.. يقدم طاعتي ونفسه
حكم طالوت واسراره.. جمعها بنار بتاره
العمر منذور.. لعطش عاشور
اخذ اربع كتب مني
وبعد عندي الك ياحسين.. امانه انجيل من حيدر
ذخر شيبي الحوى اعلوم.. المنايا خادمك جعفر
ابيمينك خاتم سليمان.. وعصا موسى وعذب كوثر
يحضرلك عرش بلقيس.. ويحطم سد الاسكندر
المطر والريح طوع امره.. وسحاب الواقعه مهره
بقلب مجمور.. لعطش عاشور
اخذ اربع كتب مني
ونبي قرآنك العباس.. آياته الرعب والدم
هذا الفاني بسم الله..ذاته وباسمك الاعظم
فرات وظله صار انسان.. جره بعين الدهر زمزم
تنزل بالملك والروح.. وصبح فرقانك المحكم
المحال الردته من عنده.. يجيبه بسورة السجده
القمر مذخور.. لعطش عاشور
اخذ اربع كتب مني
مشيت وروحي عيسى اللي.. نفخ بيها الحزن آيه
وصليبي الفرقه والمصلوب.. دلالي الفقد رايه
الحواريين دمعي وغربتي.. السكته الصبر رايه
مثل راسك مشه بيها.. السبي من ولايه لولايه
جرح يغفه وجرح يسهر.. وجرح قد غيبتك يكبر
وجرح مسجور.. لعطش عاشور
اخذ اربع كتب مني
الهي لكلشي سوه كتاب.. بعلمه من الازل مسطور
كتاب الخلق كتاب الموت.. بخزانة صدرك المكسور
المبين انت الحكيم انت.. المفصل على الثرى المنحور
وكتاب الواقعه المكنون.. العليه الكل الرزايا ادور
الجفر والجامعه اعلومك.. الصحيفه ذاعت اهمومك
بجبد مفطور.. لعطش عاشور
اخذ اربع كتب مني
تعليقات
إرسال تعليق