محرم هلاله
اداء باسم الكربلائي
كلمات حمزة السماوي
محرم هلاله. الحسين وجماله
اموت بغيابه. اعيش بوصاله
اجاني واجيته. عمر مانسيته
الحسين وجماله
انا لكل عام لابس اسود وانعه
انا ابن الاربعين وليلة الجمعه
رجع عاشور بس حسين شيرجعه
ثواب وصال عالكيعان متوزعه
تهل يهلال معناها تهل دمعه
ابو التسعه الاصابع بيده بس تسعه
تجيني المصايب. واجيك بمواكب
عشك بالطفوله. وعشك وآنه شايب
حفظته وقريته.... عمر مانسيته
الحسين وجماله
العمر كضيته من منبر الى منبر
شوكت ناسي محرم حتى اتذكر
الهلال بوحده طالع والظلام اكثر
هذاك حسين طالع وحده للعسكر
الهلال يريد الهلال وصعبه يتغير
ابو الاكبر طلع رد راس ابو الاكبر
برماح العوالي. هلال ويلالي
هلالك محرم. اعز لو هلالي
هلالي لكيته. عمر مانسيته
الحسين وجماله
ياشهر الما يجي بس الحزن منه
يالمطلّع علي مفرّع من الجنه
هلالك شفته والد منحني اعله ابنه
يطيح حسين لاجن يركض يحضنه
بعرس جسام رمله هلهلت ونه
برماد الخيمه تلكه الياس والحنه
ياشهر النياحه ياكلبي وجراحه
من الليله تبدي بعد ماكو راحه
عزائي بديته. عمر مانسيته
الحسين وجماله
هلال بيا وجه هذا الشهر طالع
عجيبه شلون يكمل والكمر واكع
لهسه فاطمه اعله المشرعه تنازع
محرم للحسين وخاف ماسامع
محرم ثاني عندي بليلة السابع
لطمتي وونيني. مثل جوده عيني
ادك اعله راسي. واطين جبيني
عطش ما رويته. عمر مانسيته
الحسين وجماله
هلالك ياشهر لوما يهل افضل
يراويني العقيله تصلي عالهزل
الكبل ما طالعه طلعت ركض للتل
شنو موديها لارض الشام ماتندل
ياريت امي السبوها ادعي واتوسل
ولا زينب على ابن زياد تتحول
جواري الاماره. اجن عن يساره
يشمرن عليهن. كلام وحجاره
وعلي ذاك بيته. عمر مانسيته
الحسين وجماله
شهر حزنك يجي دوماً على الميعاد
جديده جروحك شما تنقرا وتنعاد
ياماترحم يالمشيّب علي السجاد
يالمضيّع لمسلم بالصحارى اولاد
بمحرم بيك راحت روس عالميّاد
صفر هو اليرجع الروس لاجساد
يظل يجري دمعي. اظل خادم ادعي
تروح وتجيني. وانا بهذا وضعي
يدمعي البجيته. عمر مانسيته
الحسين وجماله
فتحت جروح ياعاشور ماتنسد
السما خد وهلالك دمعه فوك الخد
شوكت وي ردة اهلالك يجي المارد
شوكت خيمة رقيه تشتعل تخمد
شوكت جمره الحجه عنها النبي تبرد
شوكت ثوب الحسين المنسلب ينرد
احير بسؤالي. تغثني الليالي
يجي المهدي يمته. ويرد كلشي غالي
الهي دعيته. عمر ما نسيته
الحسين وجماله
تعليقات
إرسال تعليق