الحر الرياحي
جنة يزيد .. بعيوني چنها النار
يمك اريد .. انعد من الانصار
سامحني يا مولاي
من ذنبي تايب جاي
من ذنبي تايب جاي .. انعد من الانصار
...
آنه الحُر يبو الأحرار لنصرتك زحف اتعنه
اجيت بقافلة عذري وتقبل عذري اتمنه
لحظه خيّرت روحي بين النار والجنه
وگلت يا روحي بالمحشر وين انطي الوجه منه
بدنيه الضياع .. شفتك سفينة نوح
امرك مُطاع .. يا اغله من الروح
وبخدمتك منجاي
من ذنبي تايب جاي
من ذنبي تايب جاي .. انعد من الانصار
...
ما دام آنه مو وياك تره فعلي عكس اسمي
أنه بدنياي اصيرن حُر اذا لجلك نزف دمي
الرياحي وما تهزني الريح وگف مثل الجبل عزمي
بسمه حبك تمنيته يشع طول الزمن نجمي
وبكربلاء .. كلٌ عليها فان
انت البقاء .. باقي مع القُرآن
لجلك عفت دنياي
من ذنبي تايب جاي
من ذنبي تايب جاي .. انعد من الانصار
...
هاي الدنيه لا متدوم بيها ما يظل واحد
ويبقه صاحب الموقف وحده بهالدهر خالد
وحق تسبيحة الزهراء الك يا سيدي معاهد
ولا عوفك لحد الموت وسيفي بيمنتي شاهد
بس ترتضيك .. روحي لأجلها اتفوت
ما بين اديك .. بطعم الحياة الموت
تقبلني يا رجواي؟
من ذنبي تايب جاي
من ذنبي تايب جاي .. انعد من الانصار
...
صرت استحضر الحاله بالطف لون دمي سال
تقدم انصارك واهلك وعندك ما تظل ابطال
وانت تنذبح بعدي وجسمك يبقه فوگ ارمال
وانه ميت اظل خجلان اذا جسمي بنعش ينشال
لمن اغيب .. نعشي تشيله الناس
وانت سليب .. وفوگ العوالي راس
لحالك بچيت اهواي
من ذنبي تايب جاي
من ذنبي تايب جاي .. انعد من الانصار
...
خادم الحسين( عليه السلام)
كرار حسين الكربلائي
( ابو كميل)
تعليقات
إرسال تعليق