من المخيم للنهر
جدمي چم مره عثر
ما سمعت اسم الله وادم كلها شمات
ودعت كل حيلي من راعي العلم مات
جدمي چم مره عثر
...
من المخيم للشريعه
الف مره اعثرت يالله اوصلت عباس
حاط ايدي فوگ ظهري
كسرة افراگ ابو فاضل كسره يا ناس
من وصلته ما عرفني
الشيب بيّن بيه من اجدامي للراس
بدنيته الما له أخو
يشمت بحاله العدو
الفاگد العباس يشبع كون طيحات
ودعت كل حيلي من راعي العلم مات
جدمي چم مره عثر
...
آيدنيه ومن رحتله
بالدرب لاگني چفينه وشلتهن
من شفتهن قبلتهن
وطحت فوگاهن وبدموعي اغسلتهن
صحت وينك يا بو فاضل
ها يخويه خيامنه المن عفتهن
إِسمع تصيح الخيم
وين شيال العلم
بطيحتك يعني بعد ماعندي خيمات
ودعت كل حيلي من راعي العلم مات
جدمي چم مره عثر
...
ابو فاضل ينحنيلي
وگبل من اگبُل يجي ويبوس اديه
هاي اول مره صارت
شافني العباس بس ما گام اليه
واعتذرلي وگال كلمه
اوداعتك يحسين ما ناسي الخويه
اخو ماعندك بعد
صوبو راسي بعمد
التفت وبروحي تسعر ديرة آهات
ودعت كل حيلي من راعي العلم مات
جدمي چم مره عثر
...
سولفتله عالعطاشه
گتله سكنه تنتظر جيتك بعدها
خوله گعدت يم رقيه
تگلها عمي جاي والدمعه اعله خدها
ام رضيعي شح لبنها
گاعده وتناغي عبد الله ولدها
يوليدي خلي الماي لا تطلب الماي
كل خوفي من تروح وتگطع حشاي
لو رحت يا ابالفضل
ينذبح بيدي الطفل
ولا وسافه تفيد لا چلمة حرامات
ودعت كل حيلي من راعي العلم مات
جدمي چم مره عثر
...
يخو زينب عفت زينب
اشلون اگولن راح اخوي اگبال اختك
وبعد ساعه يذبحوني
واسمع اعله التل تناديني اعله بختك
والمصيبه لو سبوها
عالهزل تقرالي عالتربان عفتك
يبن امي عالتربان عفتك رميه
عين العمه ولا شوف ذيچ المسيه
صعبه عد هاشم تره
تنسبي الهم مره
عالرمح وانظر فواطمنه سبيات
ودعت كل حيلي من راعي العلم مات
جدمي چم مره عثر
...
خادم الحسين ( عليه السلام)
كرار حسين الكربلائي
( ابو كميل)
تعليقات
إرسال تعليق