ليش تخدمون تسالني الناس
الخدمه وي حسين بيمن تنقاس
********
ياسؤال وجرحي عاشور المصيبه
مثلي يلبس ليل من يذكر حبيبه
ليش اسود لبستوا تگلي كلماته
جاوبته بگلب مسموعه وناته
ثوب اسود مثل دخان خيماته
يموت الليل من اطيح نجماته
حرگ الخيمات شيبلي الراس
الخدمه وي حسين بيمن تنقاس
****************
يلومني المايعرف حسين وحسرته
يگلي ليش توزع الماي بحضرته
شحجيلك يا شابع ماي بايامه
حسين من النهر ما شربت ايتامه
عبد الله عطش وانذبح گدامه
حگي لو ذكرته بطبرة الهامه
غيمه بلا ماي عطشانه احساس
الخدمه وي حسين بيمن تنقاس
******************
عااللطم گلي صدركم شنهو ذنبه
شفت كل هاي المجالس ماتعجبه
حگك گتله عاللطامه ماترضى
ما عندك صدر والحافر يرضه
لا عندك جبد بمثلث تشضه
المات بمجلسه هذا شكبر حضه
صدر القرآن بحافر ينداس
الخدمه وي حسين بيمن تنقاس
*******************
هواي مستغرب اذا بالخوه نحجي
كون لو گلت ابو فاضل ليش تبجي
مايدري العقيله لهسه مشتاگه
باالطف الاخوه مايرحم افراگه
زينب عگب اخوها صعدت الناگه
راسه اعله الرمح وي اخته يتلاگه
شلي بدنياي راح العباس
الخدمه وي حسين بيمن تنقاس
ليش تخدمون | علي الساعدي | 2022 | Liesh Etkhadmon
جاري الكتابة نعتذر عن التاخير بسبب كثرة القصائد الجديدة
ليش تخدمون | 2022 | Liesh Etkhadmon أداء | #علي_الساعدي | الشاعر | مصطفى العيساوي | الهندسة الصوتية و التوزيع | علي ميرزا | تصوير | حسن كريم | مساعد مصور | محمد رضا الموسوي | اضائة | حيدر حسن | بلي باك | عباس فاضل | ديكور | حسن النجار | الاشراف | خالد البراك | مونتاج واخراج | نشوان النصراوي | انتاج | قناتي العقيلة وام البنين عليهما السلام
تعليقات
إرسال تعليق