مسلم اولاده. سادت الساده. تشع منارتهم
****
ياهله ومية هله حته الصحن صاح
واليزور اولاد مسلم كلبه يرتاح
العتبه ما واصل بعدني والتعب راح
ذوله لجل حسين عمهم انطو ارواح
طب للمسيب. والله تتعجب. من كرامتهم
*****
تنكظي الحاجه بصحنهم والهم ايزول
اشتحجي عن اولاد مسلم حيره شتكول
والمريض المني عجزو كلهم ايكول
والله يشفه حته لو يا ناس مشلول
ادخل اعليهم. رحمه تلكيهم. وهايه شيمتهم
***
ذوله خدمتهم تضل اشرف خدامه
اليخلص وياهم يحصلها الكرامه
واليجيهم دوم يدعوله بسلامه
والخدمهم كل وكت يعله مقامه
واليريدونه. امراد ينطونه. وغيره غيرتهم
******
يلي عندك حاجه صعبه وللصحن جاي
اعليهم اقسم بالغريب الما شرب ماي
تاخذ امرادك صحت وانه اشهد بهاي
دوم يم اولاد مسلم تربي عيناي
دمهم الطاهر. عالظلم ثائر. قصه قصتهم
*****
شفنه يم اولاد مسلم تلتم الناس
والعليل ايطيب ويرد رافع الراس
بالوفه والمرجله ايشبهون عباس
والكرامات الي عدهم صعبه تنقاس
اليدخل الحضره. فاطمه تنضره. اقره سيرتهم
*****
تمت
تحسين الخفاجي
تعليقات
إرسال تعليق