فتية آمنو بربهم
انصار الحسين عليه وعليهم السلام
نتلاگه ويّه الموت شيب وشبيبه
لحظه وعرش بلقيس يمك نجيبه
بزودك شدينه الحيل
لو رايد نجم سهيل
يمك نجيبه
...
زلمك وانطينه حچايه گدها وعندك وفايه
اتطيح الروس اعله الغبره وما توگع منها الرايه
توكل بالله ولا تهتم نوصل وياك الغايه
انبيع الدنيه وما بيها ولمرضاتك شرايه
انصاري خير انصار كلش چبيره
إبشر وحگ عيناك كل احنه غيره
كون انراويها الويل
لو رايد نجم سهيل
يمك نجيبه
...
برض الطف شيخ وتامر اشما تطلب تلگاه حاضر
اتعزبلك روح ومنحر انصارك يوم العاشر
روس انطشها اعله اجدامك وتشوف عيونك باچر
حته الخيل نخليها حافر ما يعرف حافر
ما دامك انت بخير لا تهم بيهم
واحدنه ينعد جيش من يعتنيهم
نمطر حجر سجيل
لو رايد نجم سهيل
يمك نجيبه
...
وقعنالك بالعشره من عندك ما نتبره
يا قران الطف نقسم غيرك بالطف ما نقره
كل منحر من سبعينك كاتبلك چلمه بنحره
(لبيك )لگطع لمنحر منعوفك يبن الزهره
گول وفعل وياك يبن الغياره
سبعينك ايصيرون رهن الاشاره
وشحده الراد ايعيل
لو رايد نجم سهيل
يمك نجيبه
...
واعدنه ونكون نوافي ما بينه الطبعه يجافي
چم جيل اليعطش غيره ويشرب منبعنه الصافي
لهذا العسكر لا تهتم بس جون اعليهم كافي
ما بيهم زلمه اليوگف لو شافو عابس حافي
خيرهم المحسوب بالطف مهابه
باچر وراه تشوف بس الترابه
باچر ما بيها ادخيل
لو رايد نجم سهيل
يمك نجيبه
...
اخر چلمه نسولفها گلوب انصارك تعرفها
لمن نتوذر باچر يمك ثابت موقفها
من تصرخ هل مناصر صوتك هذا يرجفها
الاصعب من گطعة نحرك اعداكم زينب تچتفها
هيّن علينه الموت بس يصعب الحال
من تنچتف يحسين زينب بالحبال
ويلا يآخر الليل
لو ردت نجم اسهيل
يمك نجيبه
...
تعليقات
إرسال تعليق