الليلة الأولى
ها يالهلال گلبك شگال طالع گبالي وتراويني المصيبه
روح لبعيد منّي شتريد عوفني بحالي أنه جروحي غريبه
جايني بيا جرح وآنه شباقي بيّه
كلشي راح وضيّعتني الغاضريه
* * *
ياهلال وياك شحچي وآنه كل ساعاتي ابچي
تدري بمصابي فاگده احبابي الما يرجعولي
حسين اخوي الما نسيته گبال عينك خالي بيته
وحّدي وروحي مگابله جروحي الصايره بطولي
جايني المن وانته تدري بالمصايب حنت ظهري
منيـن ابدي هواي هـنّـه ذبح اخوي وسلب خدري
يوم عاشور بخاطري ايدور ما نسيته حتى اگولن ذكّرتني
بيدي يهلال جرح الحبال والسياط آثارها الهسّه اعله متني
شـفـتـك وناديـتـــك بهاي المسيّه
كلشي راح وضيّعتني الغاضريه
* * *
تريد اذكرك بالجرالي وكربله شسوّت بحالي
خذت عافيتي وهدّمت بيتي وضيّعت ناسي
بيوم واحد والله حيره ضيّعت بالطف عشيره
غالي وي غالي انذبحوا گبالي الهمّه حرّاسي
حسين كلما ولد يفگد ايجيب جرحه گبالي يگعد
هوّه يمّي وآنه اشوفه ما مطـوّل راح يـبــعــــد
احـچـي ويّاه بـنـبـــــرة الآه خويه شد حيلك تره هدمت حيلي
ايگلّي معذور ظهري مكسور راح الأكبر علي المعتبره دليلي
وذر صايـر يخـتي لمّـيـتـه بإديّـه
كلشي راح وضيّعتني الغاضريه
* * *
ياهلال العطش قصّه تاركه بدلّالي غصّه
لمّن احچيها الدنيا ابچّيها بروح ممروده
زغار مثل الورد ذبلت گطره ما بالخيم ظلّت
وكلمة الحيره وين ابو الغيره اليفزع بجوده
هناك طفله چنها ميته واخو يبچي بحضن اخيته
ويا سكينه العذّبـتــني مگابـلـتـني وتبچي سكته
وطفل الحسين فاتح العين چنّه ميّت لكن ايحرّك اشفافه
والدللـــول ها يمدلــول هاك اشرب منّي دمعات الوسافه
ظلّت تهز بالمهـد چـف المـنـيّـه
كلشي راح وضيّعتني الغاضريه
* * *
چان اخوي الكلّه غيره واحد وينعد عشيره
دومه يبرالي ويرفض اخيالي واحد ايشوفه
رايته محجّبني بيها وخطوتي عينه عليها
ايگلّي مولاتي وفوگ خطواتي يطبع چفوفه
هذا اخوي الراح منّي وخلّه اخوه حسين محني
هلال جاي بهالمسيّه وگمر آنه الغــاب عنّي
خلاف عبّاس ريت الأنفاس تنگطع من عندي وي گطعة چفوفه
عالنهر طاح والخدر راح وذاك طولي عيون شمّات التشوفه
چنت زينب صرت من بعده السبيّه
كلشي راح وضيّعتني الغاضريه
* * *
آنه كل يوم اقره مقتل وحدي اوگف وگفة التل
دمعتي بعيني واندب حسيني حرگوا اخيامه
ايگوم وايطيح من اذكره والمثلّث وصل ظهره
اظل محتاره واركض بداره ركضة ايتامه
ثنعش عثره آنه اعثر ودمع عيني ايسيل احمر
وذنّي عثراتي علامه ثنعش طبره على المنحر
يبقى ياحيل واشعر الخيل فوگ گلبي اتدوس من اتدوس صدره
كسر الضلوع صوته مسموع وشفت صدر حسين متساوي وي ظهره
اطحنوا جسمه بالخيول الأعوجيه
كلشي راح وضيّعتني الغاضريه
* * *
تدري يهلال المحرّم ذيچ نيران المخيّم
باقيه بروحي ودمعتي ونوحي ما يطفّيها
چنت اسمع عمّه زينب الحگيلي النار تلهب
وآنه اروح الها النار ادخلها وانچوي بيها
هاي ميته من البواچي ذيچ أذنها بلا تراچي
اركض اجمع باليتامه وللعيل النوب اتاچي
هذا مسحوگ هذا محروگ ذاك من الخوف ميّت والله حيره
سوط وحبال والشمر گال راح خدرچ انتي يازينب اسيره
يا هضيمه انسبي لأبن الدعـيّـــه
كلشي راح وضيّعتني الغاضريه
* * *
نسألكم الدعاء
وسام الشويلي
الليلة الأولى (ملمّع)
ياشهرَ الأسى ذي خير النسا كم آلمتها بالرزءِ الفضيع
فهيَ الناعية جاءت باكية نحوَ كربلا من ارض البقيع
* * *
تدري ياشهر المحرّم من تجي شنهو التجيبه
ويا جرح انته التلچمه بمهجة الزهره الحبيبه
هيّه من تنظر هلالك تذكر الشيبه الخضيبه
والخيــــام الهدّمــوها وذيچ الخدور السليبه
جاءت فاطمة تبكي لاطمة قد ضاقَ بها الكونُ الوسيع
فهيَ الناعية جاءت باكية نحوَ كربلا من ارض البقيع
* * *
ياشهر تدري بهـــلالك تنرسم صورة فجيعه
ومن اجيت بهذا حزنك غـيّرت وجه الطبيعه
فاطمه لزمت ضلعها ونادت بلوعه يشيعه
گوموا للطف ساعدوني ساعدوا الحرّه الوديعه
تلكَ كربلا كربٌ وبلا فيها مهجتي مسلوبٌ صريع
فهيَ الناعية جاءت باكية نحوَ كربلا من ارض البقيع
* * *
يا محـــرّم بت محـمـد انـتـه شمـسـوي بگـلـبـها
الهالوكت غضبانه هيّه اليغضب الباري الغضبها
تسأل بلـوعــة ضلعها عـتـرة الهـادي شـذنـبــها
ظامي عـبـد الله ولكـن نـبـلـه مـسمـومه شـربـها
تنعى ابنها ادمى عينها سهمٌ قاتلٌ في نحرِ الرضيع
فهيَ الناعية جاءت باكية نحوَ كربلا من ارض البقيع
* * *
بكربله تحوم الزچـيــه وبيها ونّتها شـــديـــــده
تواسي زينب بالمصيبه وما تخـلّـيـها وحـيــــده
يمها تحضر يمها تنعه آنـه يـمّـچ مــو بعـيــده
وابني للحومه اعتـنـيته وشفته من حزّوا وريده
قالت قد هوى قلبي وانكوى إذ شاهدتهُ والرأسُ قطيع
فهيَ الناعية جاءت باكية نحوَ كربلا من ارض البقيع
* * *
شافت خيول آل أمـيّـــه بصدر ابنها الغالي تسحگ
ظـلّـت تـنــادي بألـمها يابو فاضل ويـنـك الحــگ
حرگوا خـيـام العـقـيله حـشّـمـت لكـنها تـشــــهگ
من السياط اختك متنها يابو فاضل صايــر ازرگ
يا كفّالها انظرْ حالها ما بين العدى الخدرُ يضيع
فهيَ الناعية جاءت باكية نحوَ كربلا من ارض البقيع
* * *
نسألكم الدعاء
وسام الشويلي
الليلة الثانية
آنه أدورك يبو اليمّه ما ادوّر غيرك
* * *
الناس مخـتـلـفه بطبعها كل شخص غايه وطلب
هذا يركض وره السلطه وذاك يجـمـع بالــــذهب
وآنه اگول الما يكـسـبـك هـذا يحسـيـن شـكـســب
هـوّه بس ويـــــاك والله يصير مضمون التعب
حچايه من السان زلمه ما ادوّر غيرك
* * *
ماني سامع أنه امجرّب والمجـرُّب بي حِـكَم
جرّبت شفت الحـقـيـقه عـنـدك وغيرك وهم
انته نور الله وعظـمـته شمالني اعـبـد صَنـم
الف (لا) الهم گـلتـهـا وإلك للموت (النَعم)
بالفعل مو فقط كلمه ما ادوّر غيرك
* * *
فضل من عندك شكبره الك خادم انحــــــسـب
شنهو آنه حتى اســــمي بدفـتـر أمّـك يـنكـتـب
أنه المـذنـب لكن انـتـه الشيمتك تمحي الذنب
اقترب واتگلّي اريـدك بـعـد اكـثـر تـقـتـرب
انته حبل الله الألزمه ما ادوّر غيرك
* * *
منهو يستاهل احبّه ويستحق منّي العشگ
جرّبت بس ماكو دايم هـيّـه فـتـــــره ونفترگ
الناس خدّاعه بحچيها وانته بس انته الصدگ
تريدني ارتاح وانـتـه بالحــوافــــر تنسحگ
انته خير وانته نعمه ما ادوّر غيرك
* * *
ماكو مثلك يروي ناسه وهوّه مات من الظمه
ماكو مثلك خـيـمـه إلنه وحارگـيـن مخـيّـمــه
ماكو مثلك يبو اليــمّه ملك صاير خـادمـه
ماكو مثلك باب بـيـته ينحسب باب السمه
نزّلك بارينه رحمه ما ادوّر غيرك
* * *
علّمتني اعله الكرامه والحيـــاه عبرة وكت
علّمتني الكلمه ذمّـــه وكون اطبّق لو گلت
علّمتني حُر اصيرن لو عـبــــد لله صرت
علّمتني ابقى عايــش لوعلى الموقف متت
ومن اريد اوصل القمّه ما ادوّر غيرك
* * *
نسألكم الدعاء
وسام الشويلي
الليلة الثانية
لا تحرمني منّك لا تبعدني عنّك
لا رايد مال ولا سلطه ولا سمعه ابين الناس
رايد بس انته التقبلني بداعـة عـيـن العبّاس
* * *
يبو اليمّه معتنيلك ودموعي الدگن بابك
سائل ومديت اديّه واتوضيت من ترابك
الله لا يحرمني منّك اطلب وادعي بأعتابك
ناذر سنيني الخدمتك ابچي والهج بمصابك
يحسين الرحمه بدربك
يحسين اتنفس حـبّــــك
يحسين دموعي تكـتبك يا اعظم انسان
حبّك يابو اليمّه نعمه واكبر نعمه
كلمه واحچيها بوجداني وهاك اسمعها بإحساس
رايـد بس انـتـه التقبلني بداعـة عـيــــن العبّاس
* * *
انته يحسين الوسـيـله وبسمك دوم اتـوسّــــل
دوم اسرح وي خيالي وبـمـعـنـاك اتـأمـــــــل
يا جميل بكل صفـاتـك وبكـلـشي انـتــه الأول
انته وحدك مالي عيني شلــون بغـيــــر اقـبل
مارايد غيرك واحد
مارايد والله الشاهــد
مارايــــد والمارايـد يتمسك بس بيك
اقسملك وعيونك ماعيشن من دونك
ما ينبض گلبي بلا حبّك ماتبقى بصدري انفاس
رايد بس انته التـقـبـلني بداعـة عـيـن العـبّاس
* * *
الضيّعك يحسين هذا يتوصّف هوّه الضايع
انته رحمه انته نعمه وبيديك الكون الواسع
سيدي بهالدنيا مثلك لا ما شايف ما سامع
اشتريك بكل حياتي ويظل خسران البايع
ربحان بحـبـك افـخـر
ربحان وهيهات اخسر
ربحان بيوم المحشر من ايصير حساب
من يصير احسابي حبّك هوّه كتابي
مارايد غيرك يالغالي وبغيرك ما تنقاس
رايد بس انته التقبلني بداعة عين العبّاس
* * *
يبو اليمّه المال لابد يخلص وتروح الشهره
سيدي والسلطه فتره وآنـه الماريــد الفـتـــره
رايد وامنية عمري خادم تـقـبـلني الزهـره
واليحصّل نظره منّك الله يـباركـلـه بعـمـــره
ياماي الرحمه اسگيني
ياماي وبي تحـيــــــني
ياماي الشـلـتـه بعـيـني دونك عميه العين
اقسملك ماعوفك عايش وي طيوفك
خل كل الناس تعاديني مادام انته المقياس
رايد بس انته التقبلني بداعة عين العبّاس
* * *
انسه كلشي يبو اليـــمّه لكن ما انـسـه أيـامــــك
عاري جسمك عالوطيه والخيل اتدوس اعضامك
سـلّـبـوك وانـتـه دامـي ومثـلك سلـبـوها خـيـامك
اخذوا الخـدّر سـبـايــا وسـيـاط بظهـر ايتامك
مذبوح ودمّك جــاري
مذبوح وجسمك عاري
مذبوح وظعنك ساري وذبّاحك حدّاي
عافوك اعله الغبره وعيالك متيسره
وآنه من اقرالك وابچيلك يل گطعوا منّك راس
رايد بس انته التـقـبـــلني بداعـة عـيـن العبّاس
* * *
نسألكم الدعاء
وسام الشويلي
الليلة الثالثة
راح اليمسّـيـني ويصبّحـني
الغالي الحنين فراگه ذابحني
حتى الهوّه من بعده يجرحني صعبه صعبه
* * *
روح ومن الجسد طلعت هيـچ اوصفـنـه الوداع
واليفارگ اعـــــز ناسـه ما تشيل جروحـه گاع
هـيّـه التـضـيّـع ابـــــوها خل تگول العمر ضاع
لأن غـرگـانـه السفـيـنـه من تـظـل بلا شـــراع
راح وتركلي جمرة فراگه
والصبر ما ينفع المشـتـاگه
ميـته أنه ويحيني الملاگـه وگُربه وگُربه
* * *
صعبه البنيّه العزيزه العوّدوها اعله الدلال
تـنـتـرك فجـأه وحيده لا رسالـه ولا سـؤال
آنـه من گد ما علـيـله مابـقى الجسمي خيال
على ملك الموت ادوّر ليش عايـفـني تـعــال
رغم الهوى الموجود مختنگه
وانفاسي شهگه من بعد شهگه
شما ادير عيني والتـفـت الگه غربه غربه
* * *
چــان ابوي الغالي يـمّي مـــا يـنــام الّـه أنـــــام
وجها يضوي وبوجــوده ماعـرف شـنـو الظــلام
هـسّـه كل ماريـد اغـفـه جـرحي يصرخ لا حرام
هـوّه مـن يـنهـدم عـشّــه شلـون يرتــاح الحـمــام
ايدي اعله خدّي وابچي ليليّه
چـنّي صرت بالـدار مـنـسـيّه
عـطشـانـه للـمـلـيان حـنّـيّـــه گلبه گلبه
* * *
الأقرب من الروح احسبه صعـبه من يمشي بعيد
وصعبه من انتظر جـيـته وانـتـظـاري مايـفـيــــد
الكـربـلـه مابـيّـه امـشـي ولا وسـط داري اهـيــد
لا ابوي حـسـيـن يرجــع لا يحـن وكـتي العـنـيــد
حاشـاه لا ماگـول ناسـيـني
بس ليش محتاره يخـلّـيـني
ليل ونهار مشـوبحـه عيني الدربه الدربه
* * *
كلشي ماعافـوا إلـيّــه غـيـر بس الذكـريــات
لا اخـو شلـونـچ يگـلّي ولا تشد جرحي خوات
ورد چـانـلّي خـواتــي بريحهـن عطـر الحيـاة
خايـفـه هوايـه عليـهـن لا يصيـرن ذابــــــلات
إحفظ خواتي ادعي ياربّي
بيهن تعب اشعر مثل تعبي
هـذا سفرهـن تارك بگـلـبي رهبه رهبه
* * *
انـتـظـر يرجـع الغـالـي بكل مسيّه وكل صباح
بهالوضع لن طير اجاني بي ملامـح للـجــــراح
ايرفرف گبالي واعـايـن اثـر دم اعـلـه الجـنـاح
وهـذي مـعـناهـا يگـلّـي يالعلـيـلـه الغـالي راح
هالطــيــر گـوّه ياخـذ انـفـاســــه
واعرفت من نظـراته وإحـسـاسه
الغالي العزيز الشمر گص راسه مسلبه مسلبه
* * *
نسألكم الدعاء
وسام الشويلي
الليلة الثالثة
مجروحه وبوجها ابتسم ويردلي الابتسامه
ما سولفـتـلــه اعله اليتم وادعيله بالسلامه
ما بيّنتله حالي ولا گتله بيتي خالي بس گتله انته غالي
* * *
من سولفت وي والدي حاولت اخفي جروحي
ابتسم كل ما أصد إله وبگلبي اضمّـن نـوحي
كلمته شلونـچ فـاطـمه واعرف عيونه شتوحي
گتله آنه لوني براحتك وانته المهــــم ياروحي
عن صحّته سألته شلونك يبويه انته
خلّه اعله گلبي ايده يفهم شنو الأريده
ما ردت اكدّر خاطره واحچيله عن عذابي
ظلّيت يمّه مكابـــــره ومابـيّـنـت مصابي
حتى من اريد اسأله متحيّره شگلّه وأدري صعب سؤالي
* * *
ويّاه احچي بصحّــــتي چن كل مرض مابيّه
اوگف وإذا عنّي التفت اذبـل وارد محنـيّـه
گلّي اشــوفـچ نــاحـلــه لا گـتـلـه آنـه قـويــه
وردته بكلامي يقـتـنــع بچفوفي شلت ارقيه
بس شفته اخذها منّي يعرف بظهري محني
وبهالوضع رقيه بيد الأبو وبديّه
گتله رقيه مدلّـله عينك تظل عليها
من المدينه الكربله خل إيدك بإديها
مبتسمه يمها واحچي بس گلبي إلها يبچي وبوضعي ما أبالي
* * *
آنه ادري ما يرجع إلي والموت تالي الفرگه
بس بـيـنـتـــله آنه بأمل وانتظر يوم الملگه
عندي الأبو هوّه الهوه وبدونه أظل مختنگه
بس گتله روح براحتك كـلـمه بمثابة شهگه
ما اسمعك الملامه وتبرالك السلامه
يل فارگت ديارك تلگاني بإنتظارك
ماردته يمشي ومنكسر ظهر الأبو عليه
گتله اطمئن بويه استقر ويرد علي إلـيـه
ما اگلك اتركتني لا بويه ما عفتني وحدي وبلايه والي
* * *
گتله أنه مو وحّـــدي عبد الله اخــوي بداري
هـوّه بسفــــركم سلوتي وشوفـتـه تـبـرد ناري
شفت الأبو دنّگ سكت والدمـع عالخــد جاري
وناده اعله زينب عمّتي وسمّعها هاي اخباري
گلّي الرضيع أخذته بس المهد تركته
گتله اعتذر جرحتك آنه فده الدمعتك
يابويه يكفيني المهد ريحة اخوي اشمها
والأم يسليها الولد بي يكتمل حلمها
لكن اريد اشوفه عبد الله وارد اطوفه تظل صورته بخيالي
* * *
بس سافر الغالي طحت وانفتح جرح إحـسـاسي
خطوات عنّي من مشه ثگـلت عـلـيــه انـفــاسي
ما دام مو يـمّــي الأبو خلّي ابچي والطم راسي
ياروحي المن باقـيـه سافــروا اهـلي ونـــاسي
ليش الصبر يروحي ماظل دوه الجروحي
حسرة گلب طويله عافوها للعليله
ما تنتهي من تـبـتـدي ونّاتي والمـنـاحــــه
ذبحتني روحة والدي وبدونه ماكو راحه
شلون احتمل غيابه الدنيا صفت كآبه وياوحشة الليالي
* * *
يامصعب فراگ الأبو والسهل صاير موتي
وآنه متت وي روحته وصار الصبر تابوتي
بالدار لا أم لا إخــت لا عـمّـتـي لا خـوتــي
اصرخ تعــالوا ياهـلي ومحّد يجاوب صوتي
متحيّره بأموري متخوفه من شعوري
اشعر جثث خضيبه صرخة حرم سليبه
چن جسم ابوي اعله الثره وراسه برمح اشوفه
وعـبّـاس سـبـع الگـنـطره متگـطّـعـه چـفـوفـه
وبكربله النهايه كل الحرم سبايه وآنه الهضم صفالي
* * *
نسألكم الدعاء
وسام الشويلي
الليلة الرابعة
انـتــه تــدري انـطي عـمـري
وفدوه يرحولك بنيني الهمّه ذخري
ازرع الدنيا ورود إلي سالم من تعود
انطي عمري
* * *
يل غـبـت لاويــــن تبقى مشبوحه اعله درب السفر عيني
والله حـتـــى العـيـن نـشـف بـيـها الماي من نوحي اونيـني
صبري اجيبه منين ياصبـر يـتـحـمّـل اشـواگي وحـنـيـني
اربــعـه يحـسـيــن قـدمـتـلك ردت بـس سـالــم تـجـيـنـي
منـتـظـرتـك يمـتـه جـيـتــك
ترد روحي من تردلي من سفرتك
ويرد يخضر بيّه عود إلي سالم من تعود
انطي عمري
* * *
يبس عود الروح وصرت اوگع من غيابك ورگه ورگه
هواي بيّه جروح ظالـه وغـيــــرك دوه هـيـهـات الـگـه
المثلي وين تروح كلشي اظلم صار عندي وكلشي خنگه
بين حسره ونوح وبدلـيـلـــي توجـرت نـيـــران فـرگـه
ياعـذابـــــي يامـصـابــــي
يمته چفّك يبو اليمّه يدگ بابي
يختلف شكل الوجود إلي سالم من تعود
انطي عمري
* * *
العسل حنظل صار والنهار وداعـتـك بعـيـوني ظـلـمــه
ويـن مـــا انــــدار صورتك تعرض اگبالي يـبـو اليـمّـه
مادريـت شـصــار وهـذا گـلبي ظل يكـلّـمـني واكـلـمــه
ويـن راعي الـدار وگمت ادوّر عن قميصك حتى اشمّه
اشـتـكـيــلك مـن رحـيــلك
لون بيدي اعتني للطف واجيلك
ينطفي جمر الصدود إلي سالم من تعود
انطي عمري
* * *
اربـعـه الأولاد بكفّه عندي همّه صاروا وانته كفّه
اي يـبـو السجّاد مو اعز مـنّـك وهالمعـنى تعـرفـه
عـندي استعـداد لو بعد امـلك ولـد سـاعـة الكـلـفـه
على الإستشهاد آنـه اقدمـهـم الك وبـشـكل زفّــــه
انـتـه غـالــي ومـا ابـالـــــي
الخاطر يحسين اخلّي بيتي خالي
خل يسكنون اللحود إلي سالم من تعود
انطي عمري
* * *
ماكو طارش جاي ماكو طارش رايح وانطي رساله
حچي عندي هواي ارد اعرف اخباركم وافهـم الحاله
مدري ليش الماي من اشوفـه اصفـن واوگف گبالـه
چنّه يحچي ويـاي يگلّي ابنچ گطعوا ايمينه وشمالـه
المــاي اخـذتــه وما شـربـتــــه
گلت هسّه حسين ظامي هوّه واخته
ترتوي ذيچ الچبود إلي سالم من تعود
انطي عمري
* * *
گمت اسمع صوت هـذا ناعـي وبـشـر ما جايـب بـشـــاره
وبگلب مفـتــــوت رحت اسـألـه شـفـت دمـعـاتـه اتـجـاره
ظل يسولف موت وآنه احس عمري انتهى وما بعد چاره
دنـيـتـي تـابـــوت هـاي هـيّـه حـسـيـن ميـعـود الديــــاره
اي يـروحـي نوحي نـوحـي
بعد ما الچن معالج ياجروحي
ميته بس اعدل اردود إلي سالم من تعود
انطي عمري
* * *
نسألكم الدعاء
وسام الشويلي
الليلة الرابعة
والله نعمه والله رحمه شگد چبيره
الله حـبـني خـلّـه ابـني ابو الغـيـره
* * *
ارد احچي وبتباهي واذكـر نـِعـم إلهـي
ميّزني عن عـبـاده وإنطاني چم كرامه
الأولى علي بعظمته آنه صرت زوجته
هـذا شـرف إلـيّـــه خـدّامـه للإمـامـه
شنهو آنه وعلي بكبره وسأل عنّي
عنده غايه وشي عظيم ايريد منّي
من طلبني وانتجـبـني عن بصيره
الله حـبـني خـلّـه ابني ابو الغـيـره
* * *
بيت الوحي سكنته والمرتضى خِدمته
والخاطر البـتـولـه هـذا وجودي انذره
كلشي يعـود إلـيّـه هـاديـتـه للــزچـيّـه
وأوّل طلب طلبته ياعلي اسمي غَيَره
أنه وأسمي وكل وجودي والأملكه
العلي اولـده وللزچـيّـه راح اتركه
افدي كلشي وابقى امشي بهالمسيره
الله حـبـنــي خـلّـه ابـنـي ابو الغيره
* * *
سبحانه من خلقني أربع ولد رزقني
واحد گمر اشوفـه ومثل النجم ثلاثه
بالغيره رضّعتهـم للغـالي كـبّـرتهـم
صار الوفه طبعهم والمرجـلـه وراثه
ابو فاضل چنت اگلّه مـن اهـزّه
يبني اكبر حتى اشوفك علي وحمزه
الله شاهد هوّه واحد بس عشيره
الله حبني خـلّـه ابني ابو الغـيـره
* * *
عبّاس ابو الرجوله من هوّه بالطفوله
نصب الخيم لعبـته ومخلّي بيده رايه
چانن حرم يسألن هالصبي هذا إلمن
وآنه اگلهن ابني زلمه وجربته هايه
زغير من حسين يعطش غيره ينبض
الماي يتبدّه اعله صدره لأن يركض
بكل قداسـه يحني راسه يَم أمـيـره
الله حـبـنـي خـلّـه ابـنـي ابو الغيره
* * *
عن موعده وكلمته جاوبني من سألـتـه
ما تنگـطع كلـمـتي بس تنگطع چفوفي
گال برحيله عـنّي ياوالـده اطـمـئـنّـي
حسيني فلا اعوفه عوفي الوصيّه عوفي
عينچ تگر يالعزيـــزه بسهـم عـيـني
حسين ديني وكلشي اقدّم لأجل ديني
گتله كلمه عفيه يُمّه الهيچي سيره
الله حبني خلّه ابني ابو الغـيـــره
* * *
ناداني عالشـريـعـه يقسملي بالوديـعـه
الماي آنه ما شربته شارب وفه حليبچ
يتـمنّـه آنـه اشـوفه من گطّعوا چفوفه
يتفاخر بجـروحـه ويگلّي هذا طـيـبچ
صاح ارفعي الراس يمّه انصاب راسي
بيّه احچي ابين اهلي وبـيـن نـاسـي
الوفّه لأهله ماكو مثله ولا نظيره
الله حـبـنـي خلّه ابـنـي ابو الغيره
* * *
نسألكم الدعاء
وسام الشويلي
الليلة الخامسة
مسلم رمز المسلم
مسلم ما يـسـتسلم
مسلم انعم واكرم تعرفه الكوفه
* * *
نعم عن غيره مسلم تـمـيّـز بالبصـيـره
الحسين اختاره يذهب الى الكوفه سفـيـره
شريف وذاتـه تحـمـل معاني كلها غـيـره
وفي وكـلـشـي يـقـدّم لأجل هاي المسيره
ثابت ما يـتـزلزل
ثابـت لا ما يـنـذل
ثابت زوده تسجّل نقره حروفه
* * *
شرف للأمّـه مـسـلم درس لأهل البطوله
بمعاني حروفه نقـره شنو معنى الرجوله
اليتاشد شنهـو اصلـه لأبو طالب اصـولـه
معاني الرفـعه يـمّـه تجي مدنگه خجوله
شامخ مثـل القـمّـه
شامخ زود وهـمّـه
شامخ حتى الأعمه ظل يشوفه
* * *
اجه وبالكوفه ثـبّت مضاميـن الولايـه
ورغم اهل الخيانه يظل حـتى النهـايه
بقى بميدانه وحـده بقى وبچفوفه رايه
يطـيـح وما يهدها ولا اتهـمّه المـنايه
قرّر يرخص عمره
قرّر يـتـرك ذكـــره
قرّر أبـن الـزهــره لا ميعرفه
* * *
شـنـو الدنـيـا وتـغــــرّه ابو النـفـس القـنــوعه
الرجل وكت المصاعب يـبـيّـن شنهـو نوعـه
صرخ وبگـلـبه حـسـره لمـن عافـوه جـموعه
تره الخانوني فــــــدوه الشـيـع نعلـچ يطوعه
يرفض الهـم گـايــل
يرفض درب المايل
يرفض لأهل الباطل يمد چفوفه
* * *
مشه بدربه اليريده ولا غـيّــر جـهـاده
المثل مسلم وسافـه يموت اعله الوساده
وسط ذيچ العساكـر شهر سيف اعـتـقاده
وشرح للدنـيـا كلها شنو معنى الشهاده
صوته بالحـگ يعـلـه
صوته لا للــذلّــــــــه
صوته وعهده ايسجله بزود سيوفه
* * *
البقى بالكوفه وحـده وعَـليّـه عـدوانه لمّه
ملكها الكوفه هـسّـه وصفت مكتوب بسمه
قصر خصمه تهـدّم ولكـن گـبـره قـمّـــه
تجي العالم تزوره هَوه الرحمه وتشمّه
هذا الخاض الصعبه
هذا العـلّاه ربّـــــــه
هذا مـسـلـم كـعـبـه واحنه انطوفه
* * *
نسألكم الدعاء
وسام الشويلي
الليلة الخامسة
گلب اليتيمه ما تنشف جروحه
والله هضيمه فرحـتها مـذبـوحه
حميده يتيمه اويلي عـلـيها
ابوها التريده بعد ما يجيها
* * *
طـبـع البـنـيّـه معـلّـقـه بوالـدها
ولو فارگاها ايظل دمعها بخدها
عالرقّه واعله العاطـفه معـوّدها
بكل وكت عن احوالها ايناشدها
اتعيش بأمانه وبغـيره ماترضه
فارغ مكـانـه ما واحد ايعوضه
شيصبّر گلبها شيسكّت بچيها
ابوها التريده بعـد ما يجـيـها
* * *
خيمه الأبو ولمّن تطيح الخيـمه
معناها يصفه البيت مثل الهـيمه
من دون ابو للفرح متظل قـيمه
والگلب ما يرتاح من گد ضيمه
التفگد ابوها شيظل بعد عدها
يستوحدوها الله يـسـاعـــــدها
اليتيمه اتعرفها ابدمعها ونعيها
ابوها التريـده بـعـد ما يجـيـها
* * *
ويلي الحميـده العـذّبـتها الفـرگـه
سـافـر ابوهـا وعـافـها مخـتـنگـه
كلمتها وحده شوكـت بويه الملگه
من شوگها تروح القميصه تشبگه
تغفه بوجعها تـتـأمّـل تـشـوفـه
ويكثر دمعها لو ماتجي طيوفه
تضيّع عمرها التضيّع وليها
ابوها التريـده بعـد ما يجيها
* * *
ذاك الأبو من فارگت احـضانـه
صارت حميده من السهر ذبلانه
ايگلّولها الأطـفـال العبي ويـانـه
اتگلهم ابوي مـسـافـر وتعـبـانه
الدمعه اعله خدها مكسورة الخاطـر
شـو مـــا فـگـدها والدهـا المسافــر
يفرفح گلبها وتلزمه بإديها
ابوها التريده بعد ما يجيها
* * *
تشوف البنات بعينها كل وحــده
بأحضان ابوها غافـيـه ومـمـتدّه
بس هيّه بأحضان الدمع متوسـده
بلا ماي بالله شلون حال الورده
ليلـيّـه تـســأل ياوالـدي ويـنـــك
هجراني طوّل مشتاگه انه العينك
زغيره وچبيره الجروح ألّي بيها
ابوها التـريـده بعـد مـا يجـيـــها
* * *
ناداها ابو اليـمّـه وخذتها الخوفه
من گام يـمـسـح راسـها بچـفـوفه
بحضن الحسين دموعها مذروفه
تگلّه بعد ما يجي وعيني تشوفه
لازمها بيده ومنّه الدمع هالي
آ ياحـمـيـده عنّچ مشه الغالي
اويه بنته العزيزه رقيّه مشيها
ابوها التريـده بعـد ما يجـيـها
* * *
نسألكم الدعاء
وسام الشويلي
الليلة السادسة
گطّعني وماعوف حسيني
* * *
واحد هـوه ومـاصـح ثـاني
موجود بگـلـبي وشريــاني
ما انـســــاه ولا يـنـســاني
وجفني شلون يفارگ عيني
* * *
محفـوره بدلالـي حـروفـه
إنظر عيني وانـتـه تشـوفه
حتى امن اغفه تمر طيوفه
ودموع مصابه تصحّـيـني
* * *
اسكت احچي حسين ابّالي
اگعد امشي يصيـر گبالي
رايدني اترك حب الغـالي
معناها اكفر واترك ديـني
* * *
ذايب من جدمي لحد راسي
مـتـمـلّك گلبي واحـسـاسـي
لو افرض خلصت انفاسـي
اتـنـفـس حـبّـه ويحـيـيــني
* * *
ماشايف هـيـچ انا وربي
انطيه دمعه وياخـذ ذنبي
هذا حسين الماخذ قـلـبـي
وخل ياخذني ولا ينطيني
* * *
مـا حـبـيـتـه لجـاه وسـمـــعـه
ولا اطـلـب جـنّـه بهالـدمـعــه
من اجله ابچي ومن اجله انعه
خـادم وبـفـضلـه مـخـلّـيــــني
* * *
لو گد نوح تصـيـر ايّـامـــــي
ما تكفي دموعي اعله الظامي
ريت بصف خـيـامـه خـيـامي
واليـچـوي عـيـالـه يچـويـني
* * *
راح اختم هالكلمه وامشـي
آنه اوياي حسين بكل شـي
حتى بموتي وآنه بنعـشـي
لأرض الطف حبه يوديني
* * *
نسألكم الدعاء
وسام الشويلي
الليلة السادسة
حاشه نعوفك وحّدك وانته غريب انشوفك
چا هوّه ينعاف الهوه حتى نگـول انعـوفك
أحنه فده العـيـونـك شنهو العمر من دونك
يالغالي ياحسين
* * *
يامن نصرتك أمـانـه والباري الها دعـانــه
واحنه اجينه الكربله وبسمك رفعـنه لوانه
الموت اعله مودك نريده يحسين وانته العقيده
غالي ولأجل عينك رخص هذا العمر يارجانه
شوفتك كحلة نـظـرنـه وفدوه الترابك عمرنه
احنه ابدونك نخـتـنگ يحسيـن حـبّـك هوانه
يحسين طلّگنه النسه وديارنه عـفـناها
ويّاك يبن المصطفى موتتنه يا محلاها
لا ما نخيب اظنونك شنهو العمر من دونك
يالغالي ياحسين
* * *
هالليـلـه واحـدنـه قـرّر ما يعـوفـك يابو الأكبر
كلشي اعله مودك ينبذل ونعانق الموت الأحمر
من حب محمـد نحـبّــك درب الله يالغالي دربك
منذوره الك هاي النفس ولو عدنه ننطيلك اكثر
بلا نورك الدنيا ظـلـمه والهـوه مـنّـك نـشـمّــه
يارحمـة الله الواسـعـه مابـيـنـه واحـد تـعـذّر
احنه بدونك نختنگ منّك يجي هوانه
ياملك دنيا وآخره حـبّـك يظل أمـانـه
لا والله ما نخونك شنهو العمر من دونك
يالغالي ياحسين
* * *
صيحه بلسان العقـيـده الما يريـدك ما نـريـده
يابن علي وداعة علي الظالم فلا انصافح ايده
ويّاك تحـچـي المشاعـر واسمع نـداء الضماير
بيعة وفاء انبايـعـك ونوصل الغايه البعيده
ويّاك محله الشهاده وشوفتك هيّه السعاده
يالغالي وبدم النحر نكتبلك اجمل قصيده
ما نتخذ ليلك جمل نحـسـب يجي مصباحك
ونصير لخيامك درع ونصير احنه ارماحك
وانّادي من يجونك شنهو العمر من دونك
يالغالي ياحسين
* * *
دين الله انته وكـتـابـه واحنه نعـيـش برحابه
نقسم وحگ كسر الضلع منعوفك الهالعصابه
ابـلـيـس حشّم جـنـوده للحرب والنـيّـه سـوده
واحنه على دين النبـي ويّاك اشرف صحابه
انبايعك لا مانـبـيـعـك تأمر واحنه نطـيـعـك
لا ما يخوّفـنـه العـدد كل احنه زود ومهابه
واحدنه ينعد بألف وتفيض منّه الغيره
مادام موجود النفس لا ماتصير بحيره
كلمك حبيب وجونك شنهو العمر من دونك
يالغالي ياحسين
* * *
شدّينه بسمك حـزمـنـه وجـيـش الخصم ما يهمـنه
يحسين نـقـسم بالحـسـن منـبـيـع بالطـف ذمـمـنـه
تسمعها صرخة جنودك نحيه ونموت اعله مودك
فرصتنه هاي المعركه بـيـها نـتـرجـم قـيـمـنــه
بسمك يـنـور الحـقـيـقه للـبـاري نكـتـب وثـيـقـه
لوحة الحب والتضيحه بالطـف يلـوّنـها دمـنــه
لوحة جنون بكربله يرسمها لأجـلك عـابــس
ايصيح آنه مجنون العشگ ويمزّگ الملابس
بالدم هتف مجنونك شنهو العمر من دونك
يالغالي ياحسين
* * *
من رخصة الكلّه غيره عبّاس راعي البصيره
خل احنه نبديها الحرب وبهـالأمـر نـسـتـشـيره
ايوزّعنه هوّه اعله كيفه والخطّه يرسمها سيفه
شيقرّر احـنـه نلـتـــزم حـد الأنـفـاس الأخـيـره
من نهجم ويانه صوتـه ايخلّي اليلاگـونه مـوته
من تلمع سيوف الغضب عـزريـل يعـلـن نفـيـره
بوجوهنه المستبشره نـتـعـنّـه للمـنـايـــه
يحسين نوگع عالثره وما توگع النه رايه
كل احنه فدوه اللونك شنهو العمر من دونك
يالغالي ياحسين
* * *
نسألكم الدعاء
وسام الشويلي
الليلة السابعة
هايبو الغيره بروحتك نضيع
ارحم بحالي وارحم الرضيع
ما تبقى انفاس بعدك يعبّاس
* * *
يل خذت روحي بطلعتك والگـلـب سلّـمـتـه بـيدك
دمعي گلّك ياعـضـيــدي ارحـم بحـالـة عضـيـدك
تـنگطع انـفـاسي خـويـه تدري لو گطعوا وريدك
زينب وسكـنـه ورقـيّــه والرضيـع الكل يريـدك
انته رحت ولكل صرخ تعال
ويّـانـه ابقى واتـرك الــزلال
مجروح الإحساس بعدك يعبّاس
* * *
منتظر ترجعلـي خـويـه وخايـف تلزمك منيـتك
لن سمعتك بأسمي تندب خويه ادركني واجيـتـك
گلبي طايح شـفـتـه لمّـن عالنهـر طايـح لگـيـتــك
ويّه طولك طولي مرمي ومو دمع من دم بچيتك
يابه الفضل ظهر انكسر عليك
ابچي وانشدك خويه وين اديك
ياهضم ينقاس بعدك يعبّاس
* * *
سهم البعـيـنـك عـماني والله مدري شلون اطلعه
آنـه خايـف مـن اجـرّه خويه فص عيـنـك اشلعه
گمت ادوّر عن چفوفك اعـثـر وكل ساعه وگـعه
ولو لگيت الچف اشمّه وينترس دمعه اعله دمعه
خلّيته چفّك عالگلب واصـيــح
يل طحت بعدك آنه راح اطيح
توليني الأرجاس بعدك يعبّاس
* * *
انته اخوي المالي غيرك من اسولف خاف اجرحك
آنه ابچي من الهضيـمـه والشـمـر ياخويـه يضحك
ارد اشـيـلك مـالي قـــوّه وارجع بحضني اطرحك
واسمع اصوات الشماته باقي بس ساعه ونذبحـك
شافوني مكسور الظهر نحيل
ولو ردت امشي بمشيتي اميل
تتشمت الناس بعدك يعبّاس
* * *
شلون ارد من دونك آنه حيره يل كـلّك حميّه
ومن يلاگـنّي شگـلهــــن زينب وسكنه ورقيّه
شعـتـذر لمّـن يـشـوفـــن دم اديك محنّي اديّــه
والرضيع شأحچي لأمّـه وهوّه بأحضان المنيه
عبد الله منتظرك إله تعود
يابسه شفافه وذابله الخدود
يذبل ورد ياس بعدك يعبّاس
* * *
زيـنب اتلگـتـني وآنــــه محني ومضيّع عيشره
راجــــع بوحـدك تگـلّـي وين اخوي الكلّه غيره
جـاوبـتــها آ يـزيـنــــب حـيـره ما تشبها حيره
راح ابو فاضل واحسبي انـتـه من هـسّـه اسيره
بطيحة الرايه طاحت الخيام
احنه انـتهـيـنه آخــر الكلام
خدر اختك انداس بعدك يعبّاس
* * *
نسألكم الدعاء
وسام الشويلي
الليلة السابعة
الجيش تبلّل والكل يسأل مو موسـم مطر
شنهو الصاير ظهر العاشر شو طالع گمر
مــوت مــوت تمطـر عليهم ويـل
صوت صوت مو هذا وكت الليل
شو طالع گمر
* * *
هاليوم كلشي مختلف هاليوم محتار الوصف
هاليوم ينـعـــد بـألــف بعلـومـه
هاليوم إيـمـان وكـفـر هاليوم حجّـه بلا عذر
هاليوم چن يوم الحشر ورسومه
قصّة يوم الطف قصّه وبيها العبّاس انخصّه
چم راس اليوم ايگصّه نزل
مدري منين انسولفها سالفته وشنوصفها
زلـم سـبـاع ورجّـفـها بطل
يبدي الثوره بسم الزهره وبسمك ياعلي
ليث اقـتـدّم طب ملـثّــم نـيـرانـه تغلي
خـوف خـوف صاب الزلم والخيل
صوت صوت مو هـذا وكت الليل
شو طالع گمر
* * *
ياناس واحدهم سأل ياناس خبروني شحصل
ياناس معقوله الخلل بعيوني
ياناس ساعات الظهر ياناس شيطلع البدر
ياناس اسأل وانتظـر حاچوني
صاحوا نبصم بالعشـره هذا البالحومه انظره
گمر وصاعد على مهره نعم
بس متحيرين بوضعه بالليل اوقات الطلعه
بچفوفه مغطّي الوسعه علم
بـيــــده الرايـه چـانـت آيــه من رب السمه
العسكر يرجف من اترفرف تـبدي الملحمه
صـاح صـاح آنه الأساوي الكيل
صوت صوت مو هذا وكت الليل
شو طالع گمر
* * *
عميان من گد الضوه عميان طيحتهم سوه
عميان والبـيـده الهـوه لاگاهم
عميان وبوكت الركض عميان تاهو بالأرض
عميان طول وبالعرض طرّاهم
تاه المشراد اعليهم يخبطهم ويصفّيهم
يضحك من ايبچّيهم أسد
مرّه من اليمنه ايكفهم مرّه اعله اليسره ايصفهم
للنص ايطب يخسفهم بعــد
ظل يشمرهم وبمنظرهم سد عين الشمس
لا مـا ثـنّــــه حيدر چنّه بي روح القـدس
لاح لاح بيمينه نجم سهيل
صوت صوت مو هذا وكت الليل
شو طالع گمر
* * *
بالصيف ليش مغـيّـمـه بالصيف ما تمطر سمه
بالصيف حر وبي ظمه بنيرانه
بالصيف شمغير الوطر بالصيف شو غيم ومطر
بالصيف ونعايـن بـشـر بردانه
ثاري العبّاس مغيّم مو بس يمطر لا يهدم
حالوب وبيهم يرجم رده
لا مو بردان العسـكر يرجف خوف من الهزبر
عبّاس الموت الأحمر غده
سوّه الدم شط چم فارس غط الما يسبح غرگ
والبي يـسـبح هـم ما يـنـجـح من خوفه اختنگ
مـــاي مــــاي لو دم شبيه السيل
صوت صوت مو هذا وكت الليل
شو طالع گمر
* * *
عبّاس وآلآف اربعه عبّاس هد للمشرعه
عبّاس نازل قـارعـه بصمامه
عبّاس ما همّه الرمي عبّاس ضيغم هاشمي
عبّاس داس العلگمي بجدامه
صاح وسرفن ذرعانه هذا الماي وهذا آنه
جرفينه وكل جريانــه إلي
عبّاس الما يـتـلاگــه شال الماي وما ضاگه
دمعة عينه الحرّاگه تهلي
الماي بجوده ورد بـــزوده ذبّاح العطش
الراد يوگـفـه برمحه يگطفه جثّه بلا نعش
سـيـف سـيـف بيـده ويعـدل الميل
صوت صوت مو هذا وكت الليل
شو طالع گمر
* * *
ياحيف چف طاح وعلم ياحيف غدروه بسهم
ياحيف شـيـهـــــوّد ألــم أحبابه
ياحيف من راح الأبي ياحيف راح ابن النبي
ياحيف زينب تـنـسـبي بغيابه
ظل حسين بلا ناصر وحده ومكسور الخاطر
ناده بصـوتـه الحايـر طحت
خويه اگعـد اسـمـع نوحي عايفني بهاي جروحي
وي روحك طلعت روحي متت
انته انـفـاسـي ورفعـة راسي وحزام الظهر
عمرك عمري بعـدك تدري يـنـحـز النحـر
آه آه ياخويه ماظل حيل
صوت صوت مو هذا وكت الليل
شو طالع گمر
* * *
نسألكم الدعاء
وسام الشويلي
الليلة السابعة
الجيش تبلّل والكل يسأل مو موسـم مطر
شنهو الصاير ظهر العاشر شو طالع گمر
مــوت مــوت تمطـر عليهم ويـل
صوت صوت مو هذا وكت الليل
شو طالع گمر
* * *
هاليوم كلشي مختلف هاليوم محتار الوصف
هاليوم ينـعـــد بـألــف بعلـومـه
هاليوم إيـمـان وكـفـر هاليوم حجّـه بلا عذر
هاليوم چن يوم الحشر ورسومه
قصّة يوم الطف قصّه وبيها العبّاس انخصّه
چم راس اليوم ايگصّه نزل
مدري منين انسولفها سالفته وشنوصفها
زلـم سـبـاع ورجّـفـها بطل
يبدي الثوره بسم الزهره وبسمك ياعلي
ليث اقـتـدّم طب ملـثّــم نـيـرانـه تغلي
خـوف خـوف صاب الزلم والخيل
صوت صوت مو هـذا وكت الليل
شو طالع گمر
* * *
ياناس واحدهم سأل ياناس خبروني شحصل
ياناس معقوله الخلل بعيوني
ياناس ساعات الظهر ياناس شيطلع البدر
ياناس اسأل وانتظـر حاچوني
صاحوا نبصم بالعشـره هذا البالحومه انظره
گمر وصاعد على مهره نعم
بس متحيرين بوضعه بالليل اوقات الطلعه
بچفوفه مغطّي الوسعه علم
بـيــــده الرايـه چـانـت آيــه من رب السمه
العسكر يرجف من اترفرف تـبدي الملحمه
صـاح صـاح آنه الأساوي الكيل
صوت صوت مو هذا وكت الليل
شو طالع گمر
* * *
عميان من گد الضوه عميان طيحتهم سوه
عميان والبـيـده الهـوه لاگاهم
عميان وبوكت الركض عميان تاهو بالأرض
عميان طول وبالعرض طرّاهم
تاه المشراد اعليهم يخبطهم ويصفّيهم
يضحك من ايبچّيهم أسد
مرّه من اليمنه ايكفهم مرّه اعله اليسره ايصفهم
للنص ايطب يخسفهم بعــد
ظل يشمرهم وبمنظرهم سد عين الشمس
لا مـا ثـنّــــه حيدر چنّه بي روح القـدس
لاح لاح بيمينه نجم سهيل
صوت صوت مو هذا وكت الليل
شو طالع گمر
* * *
بالصيف ليش مغـيّـمـه بالصيف ما تمطر سمه
بالصيف حر وبي ظمه بنيرانه
بالصيف شمغير الوطر بالصيف شو غيم ومطر
بالصيف ونعايـن بـشـر بردانه
ثاري العبّاس مغيّم مو بس يمطر لا يهدم
حالوب وبيهم يرجم رده
لا مو بردان العسـكر يرجف خوف من الهزبر
عبّاس الموت الأحمر غده
سوّه الدم شط چم فارس غط الما يسبح غرگ
والبي يـسـبح هـم ما يـنـجـح من خوفه اختنگ
مـــاي مــــاي لو دم شبيه السيل
صوت صوت مو هذا وكت الليل
شو طالع گمر
* * *
عبّاس وآلآف اربعه عبّاس هد للمشرعه
عبّاس نازل قـارعـه بصمامه
عبّاس ما همّه الرمي عبّاس ضيغم هاشمي
عبّاس داس العلگمي بجدامه
صاح وسرفن ذرعانه هذا الماي وهذا آنه
جرفينه وكل جريانــه إلي
عبّاس الما يـتـلاگــه شال الماي وما ضاگه
دمعة عينه الحرّاگه تهلي
الماي بجوده ورد بـــزوده ذبّاح العطش
الراد يوگـفـه برمحه يگطفه جثّه بلا نعش
سـيـف سـيـف بيـده ويعـدل الميل
صوت صوت مو هذا وكت الليل
شو طالع گمر
* * *
ياحيف چف طاح وعلم ياحيف غدروه بسهم
ياحيف شـيـهـــــوّد ألــم أحبابه
ياحيف من راح الأبي ياحيف راح ابن النبي
ياحيف زينب تـنـسـبي بغيابه
ظل حسين بلا ناصر وحده ومكسور الخاطر
ناده بصـوتـه الحايـر طحت
خويه اگعـد اسـمـع نوحي عايفني بهاي جروحي
وي روحك طلعت روحي متت
انته انـفـاسـي ورفعـة راسي وحزام الظهر
عمرك عمري بعـدك تدري يـنـحـز النحـر
آه آه ياخويه ماظل حيل
صوت صوت مو هذا وكت الليل
شو طالع گمر
* * *
نسألكم الدعاء
وسام الشويلي
تعليقات
إرسال تعليق